ਦੋਮੋਰਿਆ ਪੁਲ ਨੇੜੇ ਕਾਂਗਰਸ ਵਿਧਾਇਕ ਦੇ ਦਫ਼ਤਰ ਦੇ ਸਾਹਮਣੇ ਗੈਰਾਜ ‘ਚੋਂ ਚੋਰ ਕਾਰ ਦੀ ਬੈਟਰੀ ਲੈ ਉਡੇ

ਜਲੰਧਰ : ਕੰਵਲਜੀਤ ਸਿੰਘ ਮੱਕੜ- ਮਹਾਨਗਰ ਵਿੱਚ ਚੋਰੀਆਂ ਦੇ ਮਾਮਲੇ ਰੁਕਣ ਦਾ ਨਾਮ ਨਹੀਂ ਲੈ ਰਹੇ। ਤਾਜ਼ਾ ਮਾਮਲਾ ਦੋਮੋਰਿਆ ਪੁਲ ਦੇ ਨੇੜੇ, ਕਾਂਗਰਸ ਵਿਧਾਇਕ ਦੇ ਦਫ਼ਤਰ ਦੇ ਸਾਹਮਣੇ ਬਣੇ ਇਕ ਗੈਰਾਜ ਦਾ ਸਾਹਮਣੇ ਆਇਆ ਹੈ। ਇੱਥੇ ਚੋਰ ਗੈਰਾਜ ਵਿੱਚ ਖੜੀ ਕਾਰ ਦੀ ਬੈਟਰੀ ਚੁਰਾ ਕੇ ਫਰਾਰ ਹੋ ਗਏ। ਪੂਰੀ ਘਟਨਾ ਗੈਰਾਜ ਵਿੱਚ ਲੱਗੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ।

ਸੀਸੀਟੀਵੀ ਫੁਟੇਜ ਅਨੁਸਾਰ, ਰਾਤ ਕਰੀਬ 1:15 ਵਜੇ ਮੂੰਹ ਢੱਕੇ ਐਕਟੀਵਾ ‘ਤੇ ਸਵਾਰ 2 ਅਣਪਛਾਤੇ ਵਿਅਕਤੀ ਆਏ ਤੇ ਸਿਰਫ 14 ਮਿੰਟਾਂ ਵਿੱਚ ਕਾਰ ਦੀ ਬੈਟਰੀ ਉਤਾਰ ਕੇ ਲੈ ਗਏ। ਇਹ ਘਟਨਾ ਉਸ ਸਥਾਨ ‘ਤੇ ਹੋਈ ਜਿੱਥੇ ਰਾਤ ਸਮੇਂ ਪੁਲਿਸ ਗਸ਼ਤ ਰਹਿੰਦੀ ਹੈ ਅਤੇ ਸਾਹਮਣੇ ਹੀ ਕਾਂਗਰਸ ਵਿਧਾਇਕ ਦਾ ਦਫ਼ਤਰ ਮੌਜੂਦ ਹੈ। ਇਸ ਦੇ ਬਾਵਜੂਦ ਚੋਰਾਂ ਨੇ ਬੇਖ਼ੌਫ਼ ਹੋ ਕੇ ਵਾਰਦਾਤ ਨੂੰ ਅੰਜਾਮ ਦੇ ਦਿੱਤਾ।

ਪੀੜਤ ਹੈੱਪੀ ਨੇ ਦੱਸਿਆ ਕਿ ਉਸਦਾ ਡਰਾਈਵਰ ਪਿਛਲੇ ਦਿਨ ਗੱਡੀ ਗੈਰਾਜ ਵਿੱਚ ਖੜੀ ਕਰਕੇ ਗਿਆ ਸੀ, ਪਰ ਸਵੇਰੇ ਜਦੋਂ ਗੱਡੀ ਲੈਣ ਆਇਆ ਤਾਂ ਗੱਡੀ ਸਟਾਰਟ ਨਹੀਂ ਹੋਈ। ਜਾਂਚ ‘ਚ ਪਤਾ ਲੱਗਿਆ ਕਿ ਬੈਟਰੀ ਗਾਇਬ ਹੈ। ਗੈਰਾਜ ਮਾਲਕ ਵੱਲੋਂ ਸੀਸੀਟੀਵੀ ਫੁਟੇਜ ਚੈੱਕ ਕਰਨ ‘ਤੇ ਚੋਰੀ ਦਾ ਖੁਲਾਸਾ ਹੋਇਆ।

ਯਾਦ ਰਹੇ ਕਿ ਥਾਣਾ ਨੰਬਰ 3 ਦੇ ਇਲਾਕੇ ਵਿੱਚ ਪਿਛਲੇ ਕੁਝ ਸਮੇਂ ਤੋਂ ਚੋਰੀਆਂ ਦੇ ਕਈ ਮਾਮਲੇ ਸਾਹਮਣੇ ਆਏ ਹਨ, ਪਰ ਜ਼ਿਆਦਾਤਰ ਕੇਸ ਪੁਲਿਸ ਵੱਲੋਂ ਸਿਰਫ਼ ਜਾਂਚ ਦਾ ਭਰੋਸਾ ਦੇ ਕੇ ਠੰਡੇ ਬਸਤਿਆਂ ਪਾ ਦਿੱਤੇ ਜਾਂਦੇ ਹਨ। ਇਸ ਕਾਰਨ ਇਲਾਕੇ ਦੇ ਨਿਵਾਸੀਆਂ ਵਿੱਚ ਅਸੁਰੱਖਿਆ ਦੀ ਭਾਵਨਾ ਵੱਧ ਰਹੀ ਹੈ।