ਜਲੰਧਰ : ਜੇ ਐਸ ਸੰਧੂ ਤੇ ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਦਿਹਾਤੀ ਪੁਲਿਸ ਨੇ ਫਿਰੋਤੀ ਮੰਗਣ, ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਅਤੇ ਨਜਾਇਜ਼ ਹਥਿਆਰਾਂ ਦੀ ਸਪਲਾਈ ਕਰਨ ਵਾਲੇ ਗਰੋਹਾਂ ਦਾ ਪਰਦਾਫਾਸ ਕਰਦਿਆਂ 07 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਦੋਸ਼ੀਆਂ ਦੇ ਕਬਜ਼ੇ ਤੋਂ 04 ਨਜਾਇਜ਼ ਪਿਸਤੌਲ, 04 ਜਿੰਦੇ ਕਾਰਤੂਸ, 01 ਮੈਗਜ਼ੀਨ, 01 ਖਿਡੌਣਾ ਪਿਸਤੌਲ, 01 ਦਾਤਰ ਅਤੇ ਇੱਕ ਕਰੈਟਾ ਕਾਰ ਬ੍ਰਾਮਦ ਕੀਤੀ ਗਈ ਹੈ।
ਇਹ ਕਾਰਵਾਈ ਸੀਨੀਅਰ ਪੁਲਿਸ ਕਪਤਾਨ ਹਰਵਿੰਦਰ ਸਿੰਘ ਵਿਰਕ ਦੇ ਦਿਸ਼ਾ-ਨਿਰਦੇਸ਼ਾਂ ਹੇਠ ਚਲ ਰਹੀ ਵਿਸ਼ੇਸ਼ ਮੁਹਿੰਮ ਦੇ ਤਹਿਤ ਕੀਤੀ ਗਈ।
ਪਹਿਲੀ ਕਾਰਵਾਈ – ਨਕੋਦਰ, ਥਾਣਾ ਸਦਰ ਨਕੋਦਰ ਦੇ ਮੁੱਖ ਅਫਸਰ ਦਿਲਬਾਗ ਸਿੰਘ ਅਤੇ ਚੌਂਕੀ ਸ਼ੰਕਰ ਦੇ ਇੰਚਾਰਜ ASI ਜਗਤਾਰ ਸਿੰਘ ਦੀ ਅਗਵਾਈ ਹੇਠ ਪੁਲਿਸ ਨੇ 5 ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਕੇ ਉਨ੍ਹਾਂ ਕੋਲੋਂ 03 ਦੇਸੀ ਪਿਸਤੌਲ, 02 ਜਿੰਦੇ ਕਾਰਤੂਸ ਅਤੇ ਇੱਕ ਦਾਤਰ ਬ੍ਰਾਮਦ ਕੀਤਾ।
ਇਹ ਮਾਮਲਾ ਉਸ ਵੇਲੇ ਸਾਹਮਣੇ ਆਇਆ ਜਦੋਂ ਇੰਗਲੈਂਡ ਵਿੱਚ ਰਹਿੰਦੇ ਗੁਰਪ੍ਰੀਤ ਸਿੰਘ ਨੇ ਸ਼ਿਕਾਇਤ ਕੀਤੀ ਕਿ ਉਸਦੀ ਮਾਈਨਰ ਧੀ ਨੂੰ ਪ੍ਰਿੰਸ ਨਾਮਕ ਵਿਅਕਤੀ ਅਗਵਾ ਕਰਕੇ ਲੈ ਗਿਆ ਸੀ। ਬਾਅਦ ਵਿੱਚ ਗੁਰਪ੍ਰੀਤ ਸਿੰਘ ਨੂੰ ਕਨੇਡਾ ਨੰਬਰ ਤੋਂ ਵਟੱਸਐਪ ਕਾਲਾਂ ਤੇ ਵੌਇਸ ਰਿਕਾਰਡਿੰਗ ਰਾਹੀਂ 3 ਲੱਖ ਰੁਪਏ ਦੀ ਫਿਰੋਤੀ ਮੰਗੀ ਗਈ ਅਤੇ ਧਮਕੀਆਂ ਦਿੱਤੀਆਂ ਗਈਆਂ। ਸ਼ਿਕਾਇਤ ਦੇ ਆਧਾਰ ‘ਤੇ ਪੁਲਿਸ ਨੇ ਕਾਰਵਾਈ ਕਰਕੇ ਪ੍ਰਿੰਸ ਅਤੇ ਉਸਦੇ ਸਾਥੀਆਂ ਵਿਰੁੱਧ ਮਾਮਲਾ ਦਰਜ ਕੀਤਾ।
ਦੂਜੀ ਕਾਰਵਾਈ – ਆਦਮਪੁਰ, ਉਪ-ਪੁਲਿਸ ਕਪਤਾਨ ਕੁਲਵੰਤ ਸਿੰਘ ਅਤੇ SHO ਆਦਮਪੁਰ ਦੀ ਟੀਮ ਨੇ ਨਹਿਰੀ ਪੁਲੀ ਨਜ਼ਦੀਕ ਸ਼ੱਕੀ ਹਲਚਲ ਕਰ ਰਹੇ ਦੋ ਵਿਅਕਤੀਆਂ ਨੂੰ ਕਾਬੂ ਕੀਤਾ। ਤਲਾਸ਼ੀ ਦੌਰਾਨ ਉਨ੍ਹਾਂ ਕੋਲੋਂ ਇੱਕ 32 ਬੋਰ ਪਿਸਤੌਲ (ਮੈਗਜ਼ੀਨ ਸਮੇਤ 2 ਜਿੰਦੇ ਰੌਂਦ) ਅਤੇ ਇੱਕ ਹੋਰ ਪਿਸਤੌਲ ਬਿਨਾ ਮੈਗਜ਼ੀਨ ਦੇ ਬ੍ਰਾਮਦ ਕੀਤੀ ਗਈ। ਦੋਸ਼ੀਆਂ ਦੀ ਪਛਾਣ ਮਨੀਸ਼ ਭਾਟੀ (ਵਾਸੀ ਜੋਧਪੁਰ, ਰਾਜਸਥਾਨ) ਅਤੇ ਦਕਸ਼ ਬੰਗਾ (ਵਾਸੀ ਹੁਸ਼ਿਆਰਪੁਰ) ਵਜੋਂ ਹੋਈ।
ਗ੍ਰਿਫਤਾਰ ਦੋਸ਼ੀਆਂ ਦੀ ਪਛਾਣ ਅਤੇ ਬ੍ਰਾਮਦਗੀ
1. ਸੁਖਦੀਪ ਸਿੰਘ ਉਰਫ਼ ਸ਼ੇਰਾ, ਵਾਸੀ ਗੁੜੇ – (ਬ੍ਰਾਮਦ: 315 ਬੋਰ ਦੇਸੀ ਪਿਸਤੌਲ)
2. ਬਲਕਾਰ ਸਿੰਘ ਉਰਫ਼ ਕਾਰਾ, ਵਾਸੀ ਗੁੜੇ – (ਬ੍ਰਾਮਦ: ਖਿਡੌਣਾ ਪਿਸਤੌਲ)
3. ਦਲਜੀਤ ਸਿੰਘ ਉਰਫ਼ ਮੰਨਾ, ਹਾਲ ਵਾਸੀ ਮਾਲੜੀ – (ਬ੍ਰਾਮਦ: 02 ਕਾਰਤੂਸ ਜਿੰਦੇ)
4. ਪ੍ਰਭਜੀਤ ਸਿੰਘ ਉਰਫ਼ ਪਵਾ, ਵਾਸੀ ਟਾਹਲੀ – (ਬ੍ਰਾਮਦ: ਦਾਤਰ)
5. ਹੋਰ ਸਾਥੀ ਦੋਸ਼ੀ – ਕਰੈਟਾ ਕਾਰ ਸਮੇਤ ਗ੍ਰਿਫਤਾਰ
6. ਮਨੀਸ਼ ਭਾਟੀ, ਵਾਸੀ ਜੋਧਪੁਰ – (ਬ੍ਰਾਮਦ: 32 ਬੋਰ ਪਿਸਤੌਲ, ਮੈਗਜ਼ੀਨ, 2 ਰੌਂਦ)
7. ਦਕਸ਼ ਬੰਗਾ, ਵਾਸੀ ਹੁਸ਼ਿਆਰਪੁਰ – (ਬ੍ਰਾਮਦ: ਪਿਸਤੌਲ ਬਿਨਾ ਮੈਗਜ਼ੀਨ)
ਪੁਲਿਸ ਦਾ ਬਿਆਨ, ਸੀਨੀਅਰ ਪੁਲਿਸ ਕਪਤਾਨ ਹਰਵਿੰਦਰ ਸਿੰਘ ਵਿਰਕ ਨੇ ਕਿਹਾ ਕਿ ਗ੍ਰਿਫਤਾਰ ਦੋਸ਼ੀਆਂ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਪੁਲਿਸ ਰਿਮਾਂਡ ਹਾਸਲ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਰਿਮਾਂਡ ਦੌਰਾਨ ਹੋਰ ਵੱਡੀਆਂ ਵਾਰਦਾਤਾਂ ਬੇਨਕਾਬ ਹੋਣ ਦੀ ਸੰਭਾਵਨਾ ਹੈ।
