ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਕਾਜੀ ਮੰਡੀ ਇਲਾਕੇ ਵਿੱਚ ਚੱਲ ਰਹੇ ਜੂਏ ’ਤੇ ਲੁੱਟ ਦੇ ਮਾਮਲੇ ਵਿੱਚ ਪੁਲਿਸ ਨੇ ਵੱਡੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਥਾਣਾ ਰਾਮਾਮੰਡੀ ਦੀ ਪੁਲਿਸ ਨੇ ਜੂਏ ਦੀ ਨਕਦੀ ਲੁੱਟ ਮਾਮਲੇ ਵਿੱਚ ਹਰਗੋਬਿੰਦ ਨਗਰ ਦੇ ਵਸਨੀਕ ਚਿੰਟੂ ਸਮੇਤ 7 ਲੋਕਾਂ ਖ਼ਿਲਾਫ਼ ਆਰਮਜ਼ ਐਕਟ ਅਧੀਨ ਕੇਸ ਦਰਜ ਕੀਤਾ ਹੈ। ਇਸ ਮਾਮਲੇ ਵਿੱਚ ਭੀਮ ਨਗਰ ਦੇ ਰਹਿਣ ਵਾਲੇ ਅਨੂਪਦੇਵ ਅਜੈ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।
ਪੁਲਿਸ ਦੇ ਮੁਤਾਬਕ, ਹੋਰ ਮੁਲਜ਼ਮਾਂ ਵਿੱਚ ਹਰਗੋਬਿੰਦ ਨਗਰ ਦਾ ਚਿੰਟੂ, ਸਵਾਮੀ, ਕਿਸ਼ਨਪੁਰਾ ਦਾ ਸੋਬਿਤ, ਢੰਨ ਮੁਹੱਲੇ ਦਾ ਵਿਸ਼ਾਲ ਮੋਟਾ, ਬਸਤੀਆਂ ਦਾ ਗੋਰਾ ਅਤੇ ਆਦਮਪੁਰ ਨਿਵਾਸੀ ਦਵਿੰਦਰ ਉਰਫ਼ ਡੀਸੀ ਸ਼ਾਮਲ ਹਨ, ਜੋ ਫਰਾਰ ਚੱਲ ਰਹੇ ਹਨ। ਪੁਲਿਸ ਵੱਲੋਂ ਜਲਦ ਗ੍ਰਿਫਤਾਰੀ ਦਿਖਾਏ ਜਾਣ ਦੀ ਸੰਭਾਵਨਾ ਹੈ।
ਪੁਲਿਸ ਸਰੋਤਾਂ ਅਨੁਸਾਰ, ਲੁਧਿਆਣਾ ਦੇ ਕੁਝ ਤਸਕਰਾਂ ਨਾਲ ਕਾਜੀ ਮੰਡੀ ਦੇ ਜੂਆਰੀਆਂ ਦੀ ਦੋਸਤੀ ਹੈ। ਇਸੀ ਕਰਕੇ ਲੁਧਿਆਣਾ ਦੇ ਜੂਆਰੀਆਂ ਵੱਲੋਂ ਕਾਜੀ ਮੰਡੀ ਵਿੱਚ ਲੱਖਾਂ ਰੁਪਏ ਦਾ ਜੂਆ ਖੇਡਿਆ ਜਾ ਰਿਹਾ ਸੀ, ਜਿਸ ਵਿੱਚ ਸ਼ਹਿਰ ਦੇ ਕਈ ਜੂਆਰੀ ਸ਼ਾਮਲ ਸਨ।
ਜਦੋਂ ਚਿੰਟੂ ਨੂੰ ਇਸ ਗੱਲ ਦੀ ਜਾਣਕਾਰੀ ਮਿਲੀ ਤਾਂ ਉਹ ਆਪਣੇ ਸਾਥੀਆਂ ਸਮੇਤ ਇਨੋਵਾ ਅਤੇ ਐਕਸਯੂਵੀ ਕਾਰਾਂ ਵਿੱਚ ਅਵੈਧ ਹਥਿਆਰ ਲੈ ਕੇ ਦੌਲਤਪੁਰੀ ਕਾਜੀ ਮੰਡੀ ਪਹੁੰਚ ਗਿਆ। ਉੱਥੇ ਅਵੈਧ ਹਥਿਆਰ ਦਿਖਾ ਕੇ ਜੂਏ ਵਿੱਚ ਲੱਗੇ ਲੱਖਾਂ ਰੁਪਏ ਲੁੱਟ ਕੇ ਫਰਾਰ ਹੋ ਗਏ। ਲੁੱਟ ਕਰਨ ਤੋਂ ਬਾਅਦ ਗਲੀ ਵਿੱਚ ਸ਼ੋਰ ਮਚਾਉਂਦੇ ਹੋਏ ਭੱਜੇ।
ਥਾਣਾ ਰਾਮਾਮੰਡੀ ਦੀ ਪੁਲਿਸ ਨੇ ਸੁਚਨਾ ਮਿਲਦਿਆਂ ਹੀ ਮੌਕੇ ’ਤੇ ਪਹੁੰਚ ਕੇ ਸੀਸੀਟੀਵੀ ਕੈਮਰਿਆਂ ਦੀ ਜਾਂਚ ਕੀਤੀ ਅਤੇ ਇੰਸਪੈਕਟਰ ਐਸ.ਆਈ. ਮਨਜਿੰਦਰ ਸਿੰਘ ਦੇ ਬਿਆਨਾਂ ਅਧਾਰ ’ਤੇ ਕੇਸ ਦਰਜ ਕਰ ਲਿਆ। ਹਾਲਾਂਕਿ ਪੁਲਿਸ ਦੇ ਕਿਸੇ ਅਧਿਕਾਰੀ ਵੱਲੋਂ ਇਸਦੀ ਅਧਿਕਾਰਕ ਪੁਸ਼ਟੀ ਅਜੇ ਤੱਕ ਨਹੀਂ ਕੀਤੀ ਗਈ।
