ਕੇਰਲ ਸਮੇਤ ਕਈ ਰਾਜਾਂ ’ਚ ‘ਕੋਲਡ੍ਰਿਫ’ ਕਫ਼ ਸਿਰਪ ’ਤੇ ਪਾਬੰਦੀ : ਬੱਚਿਆਂ ਦੀਆਂ ਮੌਤਾਂ ਨਾਲ ਦਹਿਸ਼ਤ

ਜਲੰਧਰ (ਕੰਵਲਜੀਤ ਸਿੰਘ ਮੱਕੜ) –  ਦਵਾਈ ਸੁਰੱਖਿਆ ਪ੍ਰਣਾਲੀ ’ਤੇ ਵੱਡੇ ਸਵਾਲ ਖੜ੍ਹੇ ਕਰਦਿਆਂ ਦੇਸ਼ ਭਰ ਵਿੱਚ ‘ਕੋਲਡ੍ਰਿਫ’ (Coldrif) ਕਫ਼ ਸਿਰਪ ਨੂੰ ਲੈ ਕੇ ਹੜਕੰਪ ਮਚਿਆ ਹੋਇਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਰਾਜਸਥਾਨ ਅਤੇ ਮੱਧ ਪ੍ਰਦੇਸ਼ ਵਿੱਚ ਇਹ ਸਿਰਪ ਪੀਣ ਕਾਰਨ 12 ਬੱਚਿਆਂ ਦੀ ਮੌਤ ਹੋ ਗਈ। ਇਸ ਤੋਂ ਬਾਅਦ ਕਈ ਰਾਜ ਸਰਕਾਰਾਂ ਤੁਰੰਤ ਹਰਕਤ ਵਿੱਚ ਆ ਗਈਆਂ ਹਨ।

ਸਭ ਤੋਂ ਪਹਿਲਾਂ ਤਾਮਿਲਨਾਡੂ ਵਿੱਚ ਇਸ ਕਫ਼ ਸਿਰਪ ਦੀ ਜਾਂਚ ਹੋਈ। ਉਥੇ ਦੀ ਐਫ.ਡੀ.ਏ. (Food & Drug Administration) ਦੀ ਰਿਪੋਰਟ ਵਿੱਚ ਖੁਲਾਸਾ ਹੋਇਆ ਕਿ ਸਿਰਪ ਦੇ ਸੈਂਪਲ ਵਿੱਚ ਡਾਈਐਥਿਲੀਨ ਗਲਾਈਕੋਲ (Diethylene Glycol – DEG) ਬਹੁਤ ਵੱਧ ਮਾਤਰਾ ਵਿੱਚ ਮਿਲਿਆ ਹੈ। ਇਹ ਰਸਾਇਣ ਬਹੁਤ ਹੀ ਖ਼ਤਰਨਾਕ ਹੈ ਅਤੇ ਕਿਡਨੀ ਨੂੰ ਬੁਰੀ ਤਰ੍ਹਾਂ ਨੁਕਸਾਨ ਪਹੁੰਚਾ ਸਕਦਾ ਹੈ।

ਤਿੰਨ ਰਾਜਾਂ ਵਿੱਚ ਤੁਰੰਤ ਪਾਬੰਦੀ

ਤਾਮਿਲਨਾਡੂ ਨੇ ਜਿੱਥੇ ਇਸ ਕਫ਼ ਸਿਰਪ ’ਤੇ ਪਾਬੰਦੀ ਲਗਾਈ, ਓਥੇ ਹੀ ਮੱਧ ਪ੍ਰਦੇਸ਼ ਅਤੇ ਕੇਰਲ ਨੇ ਵੀ ਇਸ ਦੀ ਵਿਕਰੀ ’ਤੇ ਰੋਕ ਲਾ ਦਿੱਤੀ। ਮੱਧ ਪ੍ਰਦੇਸ਼ ਦੇ ਡਰੱਗ ਕੰਟਰੋਲਰ ਦਿਨੇਸ਼ ਮੌਰਿਆ ਦੇ ਮੁਤਾਬਕ, ਸਿਹਤ ਵਿਭਾਗ ਨੇ ਕੋਲਡ੍ਰਿਫ ਅਤੇ ਨੈਕਸਟ੍ਰੋ ਡੀ.ਐਸ. (Nextro DS) ਦੋਨੋਂ ਕਫ਼ ਸਿਰਪਾਂ ਦੇ ਪ੍ਰੋਡਕਸ਼ਨ ਨੂੰ ਰੁਕਵਾਉਣ ਲਈ ਤਾਮਿਲਨਾਡੂ ਅਤੇ ਹਿਮਾਚਲ ਪ੍ਰਦੇਸ਼ ਸਰਕਾਰਾਂ ਨੂੰ ਪੱਤਰ ਲਿਖਿਆ ਸੀ। ਉਸ ਤੋਂ ਬਾਅਦ ਹੀ ਇਹ ਟੈਸਟ ਹੋਏ ਅਤੇ DEG ਦੀ ਭਾਰੀ ਮਾਤਰਾ ਸਾਹਮਣੇ ਆਈ।

ਰਾਜਸਥਾਨ ਵਿੱਚ ਬੱਚਿਆਂ ਦੀਆਂ ਮੌਤਾਂ

ਰਾਜਸਥਾਨ ਦੇ ਭਰਤਪੁਰ ਅਤੇ ਸੀਕਰ ਜ਼ਿਲ੍ਹਿਆਂ ਵਿੱਚ ਇੱਕ-ਇੱਕ ਬੱਚੇ ਦੀ ਮੌਤ ਦੀ ਪੁਸ਼ਟੀ ਹੋਈ। ਸ਼ੁਰੂਆਤੀ ਜਾਂਚ ਵਿੱਚ Dextromethorphan hydrobromide syrup IP ਦਾ ਨਾਮ ਸਾਹਮਣੇ ਆਇਆ, ਜਿਸ ਨੂੰ ਨਿੱਜੀ ਫਾਰਮਾ ਕੰਪਨੀ ਕੇਸੰਸ ਫਾਰਮਾ ਤਿਆਰ ਕਰਦੀ ਹੈ। ਇਨ੍ਹਾਂ ਮੌਤਾਂ ਦੀ ਵਜ੍ਹਾ ਵੀ ਕਿਡਨੀ ਫੇਲ੍ਹ ਹੋਣ ਨੂੰ ਦੱਸਿਆ ਗਿਆ।
ਇਸ ਤੋਂ ਬਾਅਦ ਰਾਜਸਥਾਨ ਸਰਕਾਰ ਨੇ ਕੇਸੰਸ ਫਾਰਮਾ ਦੀਆਂ ਸਾਰੀਆਂ 19 ਦਵਾਈਆਂ ’ਤੇ ਪਾਬੰਦੀ ਲਾ ਦਿੱਤੀ ਅਤੇ ਰਾਜ ਦੇ ਡਰੱਗ ਕੰਟਰੋਲਰ ਰਾਜਾਰਾਮ ਸ਼ਰਮਾ ਨੂੰ ਮੁਅੱਤਲ ਕਰ ਦਿੱਤਾ, ਕਿਉਂਕਿ ਉਹਨਾਂ ਨੇ ਪਹਿਲਾਂ ਕੰਪਨੀ ਨੂੰ ਕਲੀਨ ਚਿੱਟ ਦਿੱਤੀ ਸੀ।

ਕੇਂਦਰ ਸਰਕਾਰ ਵੀ ਹਰਕਤ ਵਿੱਚ

ਹੁਣ ਕੇਂਦਰੀ ਸਿਹਤ ਮੰਤਰਾਲੇ ਨੇ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਕਿਹਾ ਹੈ ਕਿ 6 ਰਾਜਾਂ ਵਿੱਚ ਇਸ ਕੰਪਨੀ ਦੀਆਂ 19 ਦਵਾਈਆਂ ਦੀ ਜਾਂਚ ਜਾਰੀ ਹੈ।

ਵੱਡਾ ਸਵਾਲ : ਸੁਰੱਖਿਆ ਮਾਪਦੰਡਾਂ ’ਤੇ ਕਿੰਨੀ ਨਿਗਰਾਨੀ?

ਇਸ ਪੂਰੇ ਮਾਮਲੇ ਨੇ ਇੱਕ ਵਾਰ ਫਿਰ ਦਵਾਈਆਂ ਦੇ ਉਤਪਾਦਨ ਵਿੱਚ ਸੁਰੱਖਿਆ ਮਾਪਦੰਡਾਂ ਅਤੇ ਸਰਕਾਰੀ ਨਿਗਰਾਨੀ ਪ੍ਰਣਾਲੀ ’ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਜੇਕਰ ਤਾਮਿਲਨਾਡੂ ਦੀ ਰਿਪੋਰਟ ਸਹੀ ਹੈ ਤਾਂ 48.6% ਤੱਕ ਡਾਈਐਥਿਲੀਨ ਗਲਾਈਕੋਲ ਦਾ ਮਿਲਣਾ ਲੋਕਾਂ ਦੀ ਜ਼ਿੰਦਗੀ ਨਾਲ ਖਿਲਵਾਰ ਤੋਂ ਘੱਟ ਨਹੀਂ।