ਲੁਧਿਆਣਾ : ਕੰਵਲਜੀਤ ਸਿੰਘ ਮੱਕੜ – ਨਾਰਦਰਨ ਰੇਲਵੇ ਐਮਪਲਾਇਜ਼ ਯੂਨੀਅਨ (ਐਨ.ਆਰ.ਈ.ਯੂ.) ਫਿਰੋਜ਼ਪੁਰ ਡਿਵੀਜ਼ਨ ਵੱਲੋਂ ਅੱਜ ਡੀਜ਼ਲ ਸ਼ੈਡ ਤੇ ਇਲੈਕਟ੍ਰਿਕ ਸ਼ੈਡ ਲੁਧਿਆਣਾ ‘ਚ ਪੁਰਾਣੀ ਪੈਨਸ਼ਨ ਸਕੀਮ (Old Pension Scheme – OPS) ਦੀ ਬਹਾਲੀ ਲਈ ਜਾਗਰੂਕਤਾ ਮੁਹਿੰਮ ਚਲਾਈ ਗਈ।
ਇਸ ਮੌਕੇ ਤੇ ਐਨ.ਆਰ.ਈ.ਯੂ. ਦੇ ਡਿਵੀਜ਼ਨ ਪ੍ਰਧਾਨ ਸ਼੍ਰੀ ਅਜੈ ਕੁਮਾਰ ਮੱਟੂ ਦੀ ਅਗਵਾਈ ਹੇਠ ਗੇਟ ਮੀਟਿੰਗ ਕਰਵਾਈ ਗਈ ਜਿਸ ਵਿੱਚ ਕਈ ਕਰਮਚਾਰੀਆਂ ਨੇ ਹਿੱਸਾ ਲਿਆ। ਇਹ ਜਾਗਰੂਕਤਾ ਮੁਹਿੰਮ 25 ਨਵੰਬਰ 2025 ਨੂੰ ਦਿੱਲੀ ਦੇ ਰਾਮਲੀਲਾ ਮੈਦਾਨ ‘ਚ ਹੋਣ ਵਾਲੀ ਵੱਡੀ ਜਨ ਸਭਾ ਦੀ ਤਿਆਰੀ ਦਾ ਹਿੱਸਾ ਹੈ, ਜਿਸ ਦਾ ਮੁੱਖ ਉਦੇਸ਼ ਪੁਰਾਣੀ ਪੈਨਸ਼ਨ ਸਕੀਮ ਦੀ ਬਹਾਲੀ ਲਈ ਸਰਕਾਰ ਤੱਕ ਕਰਮਚਾਰੀਆਂ ਦੀ ਅਵਾਜ਼ ਪਹੁੰਚਾਉਣਾ ਹੈ।
ਅੱਜ ਦੀ ਮੁਹਿੰਮ ‘ਚ ਐਨ.ਆਰ.ਈ.ਯੂ. ਲੁਧਿਆਣਾ ਟੀਮ ਦੇ ਮੈਂਬਰ ਸ਼ਾਮਲ ਰਹੇ, ਜਿਨ੍ਹਾਂ ਵਿੱਚ ਸ਼੍ਰੀ ਸੁਨੀਲ ਕੁਮਾਰ, ਆਰ.ਸੀ. ਮੀਨਾ, ਹਰਕਿਸ਼ਨ, ਹਰੀਮੋਹਨ, ਹੰਸਰਾਜ, ਸਾਹਿਰਾਮ, ਰਣਜੀਤ ਸਿੰਘ, ਅਜੈ ਮੱਟੂ ਆਦਿ ਸ਼ਾਮਲ ਸਨ। ਸਾਰੇ ਮੈਂਬਰਾਂ ਨੇ ਸ਼ਾਂਤੀਪੂਰਨ ਢੰਗ ਨਾਲ ਆਪਣਾ ਸੰਦੇਸ਼ ਕਰਮਚਾਰੀਆਂ ਤੱਕ ਪਹੁੰਚਾਇਆ ਤੇ ਪੁਰਾਣੀ ਪੈਨਸ਼ਨ ਬਹਾਲੀ ਲਈ ਇਕੱਠੇ ਆਵਾਜ਼ ਉਠਾਉਣ ਦਾ ਸੰਕਲਪ ਕੀਤਾ।
ਯੂਨੀਅਨ ਵੱਲੋਂ ਦੱਸਿਆ ਗਿਆ ਕਿ ਇਹ ਜਾਗਰੂਕਤਾ ਅਭਿਆਨ ਅਗਲੇ ਦਿਨਾਂ ਵਿੱਚ ਵੀ ਵੱਖ-ਵੱਖ ਸ਼ੈਡਾਂ ਤੇ ਵਿਭਾਗਾਂ ਵਿੱਚ ਜਾਰੀ ਰਹੇਗਾ ਤਾਂ ਜੋ ਵੱਧ ਤੋਂ ਵੱਧ ਕਰਮਚਾਰੀ ਇਸ ਮੁਹਿੰਮ ਨਾਲ ਜੁੜ ਸਕਣ।
