ਇਹ ਜਾਨਵਰ ਹੈ ਤੁਸੀਂ ਤਾਂ ਇਨਸਾਨ ਬਣੇ ਰਹੋ…ਚੰਡੀਗੜ੍ਹ ‘ਚ ਬੇਜ਼ੁਬਾਨ ਨੂੰ ਡੰਡੇ ਨਾਲ ਕੁੱਟ-ਕੁੱਟ ਕੇ ਕੀਤਾ ਜ਼ਖ਼ਮੀ, ਮੁਲਜ਼ਮ ‘ਤੇ ਹੋਈ ਕਾਰਵਾਈ

ਚੰਡੀਗੜ੍ਹ : ਇਹ ਤਾਂ ਜਾਨਵਰ ਹੈ ਤਾਂ ਤੁਸੀਂ ਤਾਂ ਇਨਸਾਨ ਬਣੋ…ਜੀ ਹਾਂ ਜੇਕਰ ਜਾਨਵਰ ਦੇ ਨਾਲ ਇਨਸਾਨ ਵੀ ਜਾਨਵਰਾਂ ਵਰਗਾ ਸਲੂਕ ਕਰੇਗਾ ਤਾਂ ਇਨਸਾਨ ਤੇ ਜਾਨਵਰ ਵਿਚ ਕੀ ਫ਼ਰਕ ਰਹਿ ਜਾਵੇਗਾ। ਅਜਿਹਾ ਇਸ ਲਈ ਕਿਹਾ ਜਾ ਰਿਹਾ ਹੈ ਕਿਉਂਕਿ ਚੰਡੀਗੜ੍ਹ ਵਿਚ ਬਿਲਕੁਲ ਅਜਿਹਾ ਹੀ ਮਾਮਲਾ ਸਾਹਮਣੇ ਆਇਆ ਹੈ। ਜਿੱਥੇ ਇਕ ਵਿਅਕਤੀ ਨੂੰ ਕਰੂਰਤਾ ਦੇ ਨਾਲ ਇਕ ਬੇਜ਼ੁਬਾਨ ਨੂੰ ਡੰਡਿਆਂ ਨਾਲ ਕੁੱਟ-ਕੁੱਟ ਕੇ ਜ਼ਖ਼ਮੀ ਕਰ ਦਿੱਤਾ, ਪਰ ਇਸ ਤੋਂ ਬਾਅਦ ਉਸ ਸ਼ਖ਼ਸ ‘ਤੇ ਐਨੀਮਲ ਐਕਟ ਤਹਿਤ ਕਾਰਵਾਈ ਕੀਤੀ ਗਈ।

ਮਾਮਲਾ ਚੰਡੀਗੜ੍ਹ ਦੇ ਪਿੰਡ ਖੁੱਡਾ ਜੱਸੂ ਦਾ ਹੈ। ਇੱਥੇ ਇਕ ਕੁੱਤੇ ‘ਤੇ ਬਰਹਿਮੀ ਨਾਲ ਹਮਲਾ ਕਰ ਕੇ ਉਸ ਨੂੰ ਬੁਰੀ ਤਰ੍ਹਾਂ ਜ਼ਖ਼ਮੀ ਕਰਨ ਦੇ ਮਾਮਲੇ ‘ਚ ਐੱਸਪੀਸੀਏ ਨੇ ਮੁਲਜ਼ਮ ਗੁਰਦਰਸ਼ਨ ਸਿੰਘ ‘ਤੇ ਕਾਰਵਾਈ ਕੀਤੀ ਹੈ। ਮਾਮਲੇ ਦੀ ਜਾਣਕਾਰੀ ਦਿੰਦੇ ਹੋਏ ਐੱਸਪੀਸੀਏ ਗਵਰਨਮੈਂਟ ਇਨਫਰਮਰੀ ਦੇ ਇੰਸਪੈਕਟਰ ਧਰਮਿੰਦਰ ਡੋਗਰਾ ਨੇ ਦੱਸਿਆ ਕਿ 14 ਮਈ ਨੂੰ ਖੁੱਡਾ ਜੱਸੂ ਪਿੰਡ ‘ਚ ਇਕ ਕੁੱਤੇ ਨੇ ਗੁਰਦਰਸ਼ਨ ਸਿੰਘ ਨਾਂ ਦੇ ਸ਼ਖ਼ਸ ਨੂੰ ਵੱਢਿਆ ਸੀ। ਇਸ ਤੋਂ ਕੁਝ ਦੇਰ ਬਾਅਦ ਹੀ ਮੁਲਜ਼ਮ ਗੁਰਦਰੁਸ਼ਨ ਨੇ ਡੰਡੇ ਨਾਲ ਕੁੱਤੇ ਨੂੰ ਬਰਹਿਮੀ ਨਾਲ ਕੁੱਟਿਆ। ਇਸ ਹਮਲੇ ‘ਚ ਕੁੱਤਾ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਗਿਆ ਸੀ। ਘਟਨਾ ਦੀ ਜਾਣਕਾਰੀ ਇਕ ਐਨੀਮਲ ਲਵਰ ਗਰੁੱਪ ਨੇ ਕੇਂਦਰੀ ਮੰਤਰੀ ਮੇਨਕਾ ਗਾਂਧੀ ਨੂੰ ਈਮੇਲ ਜ਼ਰੀਏ ਦਿੱਤੀ। ਇਸ ਤੋਂ ਬਾਅਦ ਕੇਂਦਰੀ ਮੰਤਰੀ ਮੇਨਕਾ ਗਾਂਧੀ ਦੇ ਹੁਕਮ ਤੋਂ ਬਾਅਦ ਐੱਸਪੀਸੀਏ ਨੇ ਮੁਲਜ਼ਮ ਗੁਰਦਰਸ਼ਨ ਸਿੰਘ ਖਿਲਾਫ਼ ਕਾਰਵਾਈ ਕਰਦੇ ਹੋਏ ਉਸ ਦਾ ਚਲਾਨ ਕੱਟਿਆ।

ਇੰਸਪੈਕਟਰ ਡੋਗਰਾ ਨੇ ਦੱਸਿਆ ਕਿ ਮੁਲਜ਼ਮ ਨੂੰ ਸ਼ਨਿਚਰਵਾਰ ਜਾਂ ਐਤਵਾਰ ਨੂੰ ਜ਼ਿਲ੍ਹਾ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ। ਪੇਸ਼ੀ ਦੌਰਾਨ ਚਲਾਨ ਦੀ ਰਕਮ ‘ਤੇ ਫ਼ੈਸਲਾ ਜੱਜ ਕਰਨਗੇ। ਉਨ੍ਹਾਂ ਕਿਹਾ ਕਿ ਹਮਲੇ ‘ਚ ਕੁੱਤੇ ਦੀ ਅੱਖ ਉੱਪਰ ਗੰਭੀਰ ਸੱਟ ਲੱਗੀ ਸੀ ਜਿਸ ਦਾ ਬਾਅਦ ਵਿਚ ਇਲਾਜ ਕੀਤਾ ਗਿਆ ਤੇ ਹੁਣ ਕੁੱਤੇ ਦਾ ਜ਼ਖ਼ਮ ਕਾਫੀ ਹੱਦ ਤਕ ਠੀਕ ਹੈ।