ਅਹਿਮਦਾਬਾਦ : ਗੁਜਰਾਤ ਦੇ ਸਮੁੰਦਰੀ ਤੱਟ ਨਾਲ ਟਕਰਾਏ ਚੱਕਰਵਾਤ ਤਓਤੇ ਕਾਰਨ ਸੌਰਾਸ਼ਟਰ ‘ਚ ਭਾਰੀ ਨੁਕਸਾਨ ਹੋਇਆ। ਇਸ ਦੀ ਤੀਬਰਤਾ ਠੰਢੀ ਪੈ ਗਈ ਹੈ ਤੇ ਇਹ ਰਾਜਸਥਾਨ ਵੱਲ ਵੱਧ ਰਿਹਾ ਹੈ। ਬਿਜਲੀ ਦੇ ਹਜ਼ਾਰਾਂ ਖੰਭੇ ਤੇ ਦਰੱਖ਼ਤ ਪੁੱਟੇ ਜਾਣ ਨਾਲ ਸੂਬੇ ਦੇ ਕਈ ਇਲਾਕਿਆਂ ਵਿਚ ਬਿਜਲੀ ਦੀ ਸਪਲਾਈ ਠੱਪ ਹੋ ਗਈ ਹੈ। ਸਰਕਾਰ ਨੇ ਹੁਣ ਤਕ 13 ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਕੀਤੀ ਹੈ। ਚੱਕਰਵਾਤ ਨਾਲ ਹੋਏ ਨੁਕਸਾਨ ਦੇ ਸਰਵੇ ਪਿੱਛੋਂ ਸਰਕਾਰ ਮੁਆਵਜ਼ਾ ਦੇਵੇਗੀ। ਉੱਧਰ ਮਹਾਰਾਸ਼ਟਰ ਤੋਂ ਮਿਲੀਆਂ ਖ਼ਬਰਾਂ ਅਨੁਸਾਰ ਸੂਬੇ ਵਿਚ ਤਓਤੇ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ 12 ਹੋ ਗਈ। ਮਹਾਰਾਸ਼ਟਰ ਸਰਕਾਰ ਵੀ ਤੂਫ਼ਾਨ ਤੋਂ ਪ੍ਰਭਾਵਿਤ ਜ਼ਿਲਿ੍ਹਆਂ ਵਿਚ ਰਾਹਤ ਕਾਰਜ ‘ਚ ਲੱਗੀ ਹੋਈ ਹੈ।
ਗੁਜਰਾਤ ਦੇ ਮੁੱਖ ਮੰਤਰੀ ਵਿਜੈ ਰੁਪਾਣੀ ਨੇ ਮੰਗਲਵਾਰ ਸਵੇਰੇ ਸਟੇਟ ਐਮਰਜੈਂਸੀ ਪੱੁਜ ਕੇ ਚੱਕਰਵਾਤ ਨਾਲ ਸੂਬੇ ਦੇ ਹੋਏ ਨੁਕਸਾਨ ਦਾ ਜਾਇਜ਼ਾ ਲਿਆ। ਦੇਰ ਸ਼ਾਮ ਉਨ੍ਹਾਂ ਨੇ ਮੀਡੀਆ ਨੂੰ ਦੂਜੀ ਵਾਰ ਸੰਬੋਧਨ ਕਰਦਿਆਂ ਦੱਸਿਆ ਕਿ ਸੂਬੇ ਵਿਚ ਤੂਫ਼ਾਨ ਨਾਲ ਭਾਰੀ ਤਬਾਹੀ ਹੋਈ ਹੈ। ਉਨ੍ਹਾਂ ਦੱਸਿਆ ਕਿ ਨੁਕਸਾਨ ਦਾ ਸਰਵੇ ਕਰ ਕ ਲੋਕਾਂ ਨੂੰ ਮੁਆਵਜ਼ਾ ਦਿੱਤਾ ਜਾਵੇਗਾ।
ਅਹਿਮਦਾਬਾਦ ਵਿਚ ਸੋਮਵਾਰ ਤੋਂ ਹੀ ਬੱਦਲ ਛਾਏ ਰਹੇ ਤੇ ਲਗਾਤਾਰ ਬਾਰਿਸ਼ ਹੁੰਦੀ ਰਹੀ। ਉੱਤਰੀ ਗੁਜਰਾਤ ਦੇ ਮੇਹਸਾਣਾ, ਪਾਟਨ, ਸਾਬਰਕਾਂਠਾ ਤੇ ਬਨਾਸਕਾਂਠਾ ਵਿਚ ਵੀ ਚੱਕਰਵਾਤ ਕਾਰਨ ਬਾਰਿਸ਼ ਸ਼ੁਰੂ ਹੋ ਗਈ।ਸੂਬੇ ਵਿਚ ਚੱਕਰਵਾਤ ਕਾਰਨ 40 ਹਜ਼ਾਰ ਤੋਂ ਜ਼ਿਆਦਾ ਦਰੱਖ਼ਤ ਪੁੱਟੇ ਗਏ। ਸਰਕਾਰ ਦਾ ਦਾਅਵਾ ਹੈ ਕਿ ਅਗਾਊਂ ਤਿਆਰੀਆਂ ਕਾਰਨ ਸੂਬੇ ਵਿਚ ਜਾਨ-ਮਾਲ ਦਾ ਜ਼ਿਆਦਾ ਨੁਕਸਾਨ ਨਹੀਂ ਹੋਇਆ। ਸੌਰਾਸ਼ਟਰ ਦਾ ਅਮਰੇਲੀ, ਗਿਰ, ਸੋਮਨਾਥ, ਪੋਰਬੰਦਰ, ਰਾਜਕੋਟ, ਭਾਵਨਗਰ ਤੇ ਬੋਟਾਦ ਜ਼ਿਲ੍ਹੇ ਚੱਕਰਵਾਤ ਨਾਲ ਸਭ ਤੋਂ ਜ਼ਿਆਦਾ ਪ੍ਰਭਾਵਿਤ ਹੋਏ ਹਨ। ਅਹਿਮਦਾਬਾਦ ਦੇ ਕੁਲੈਕਰ ਸੰਦੀਪ ਸਾਂਗਲੇ ਨੇ ਲੋਕਾਂ ਨੂੰ ਘਰਾਂ ਵਿਚ ਹੀ ਰਹਿਣ ਦੀ ਅਪੀਲ ਕੀਤੀ ਹੈ। ਸਾਬਰਮਤੀ ਨਦੀ ਦਾ ਪਾਣੀ ਦਾ ਪੱਧਰ ਘਟਾਇਆ ਜਾ ਰਿਹਾ ਹੈ ਤਾਂ ਜੋ ਬਾਰਿਸ਼ ਹੋਣ ਦੀ ਸੂਰਤ ‘ਚ ਮਹਾਨਗਰ ਵਿਚ ਕਿਸੇ ਤਰ੍ਹਾਂ ਦੀ ਹੜ੍ਹ ਦੀ ਸਥਿਤੀ ਨਾ ਪੈਦਾ ਹੋਵੇ। ਅਹਿਮਦਾਬਾਦ ਹਵਾਈ ਅੱਡਾ ਅਥਾਰਟੀ ਨੇ ਹਵਾਈ ਸੇਵਾਵਾਂ ਨੂੰ ਬੰਦ ਕਰ ਦਿੱਤਾ। ਇਸ ਦੌਰਾਨ 44 ਉਡਾਣਾਂ ਰੱਦ ਕੀਤੀਆਂ ਗਈਆਂ। ਰੇਲਵੇ ਨੇ ਸੌਰਾਸ਼ਟਰ ਕੱਛ ਦੀਆਂ 53 ਰੇਲ ਸੇਵਾਵਾਂ ਨੂੰ ਮੁਲਤਵੀ ਰੱਖਿਆ ਜਾਂ ਵਿਚਾਲੇ ਹੀ ਰੋਕ ਦਿੱਤਾ। ਸੌਰਾਸ਼ਟਰ ਦੇ 425 ਕੋਵਿਡ ਹਸਪਤਾਲਾਂ ਵਿਚੋਂ 122 ਵਿਚ ਬਿਜਲੀ ਸੇਵਾ ਪ੍ਰਭਾਵਿਤ ਰਹੀ। ਜਾਣਕਾਰੀ ਅਨੁਸਾਰ ਸੂਬੇ ਦੀਆਂ 56 ਤਹਿਸੀਲਾਂ ਵਿਚ ਇਕ ਇੰਚ ਬਾਰਿਸ਼ ਹੋਈ ਹੈ ਜਦਕਿ 46 ਵਿਚ ਚਾਰ ਇੰਚ ਤੇ ਛੇ ਤਹਿਸੀਲਾਂ ਵਿਚ 6 ਤੋਂ 12 ਇੰਚ ਬਾਰਿਸ਼ ਹੋਈ। ਸਭ ਤੋਂ ਜ਼ਿਆਦਾ ਵਲਸਾਡ ਦੇ ਉਮਰਗਾਮ ਵਿਚ 14 ਇੰਚ ਬਾਰਿਸ਼ ਹੋਈ।
