ਲੁਧਿਆਣਾ : ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਚੋਣ ਰਣਨੀਤੀਕਾਰ ਪ੍ਰਸ਼ਾਂਤ ਕਿਸ਼ੋਰ ਦੀ ਆਵਾਜ਼ ਵਿਚ ਗੱਲ ਕਰ ਕੇ ਠੱਗੀ ਕਰਨ ਵਾਲੇ ਨਟਵਰ ਲਾਲ ਗੌਰਵ ਸ਼ਰਮਾ ਉਰਫ ਗੋਰਾ ਤੋਂ ਪੁੱਛਗਿੱਛ ਦੌਰਾਨ ਕਈ ਰਾਜ਼ ਸਾਹਮਣੇ ਆ ਰਹੇ ਹਨ। ਹੁਣ ਪਤਾ ਲੱਗਾ ਹੈ ਕਿ ਫੜ੍ਹੇ ਜਾਣ ਤੋਂ ਪਹਿਲਾਂ ਉਸ ਦੀ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਨਾਲ ਪੰਜਾਬ ਵਿਚ ਵਿਧਾਨ ਸਭਾ ਚੋਣਾਂ ਦੌਰਾਨ ਕਾਂਗਰਸ ਦੀ ਟਿਕਟ ਦਿਵਾਉਣ ਲਈ ਡੀਲ ਚੱਲ ਰਹੀ ਸੀ। ਮੁਲਜ਼ਮ ਨੇ 5 ਕਰੋੜ ਰੁਪਏ ‘ਚ ਉਸ ਨੂੰ ਕਾਂਗਰਸ ਦੀ ਟਿਕਟ ਦਿਵਾਉਣ ਦਾ ਝਾਂਸਾ ਦਿੱਤਾ ਸੀ। ਪੁਲਿਸ ਜਾਂਚ ਦੌਰਾਨ ਉਸ ਨੇ ਇਸ ਗੱਲ ਕਬੂਲ ਕੀਤੀ। ਹੁਣ ਪੁਲਿਸ ਇਸ ਦੀ ਪੁਸ਼ਟੀ ਲਈ ਸਿੱਧੂ ਮੂਸੇਵਾਲਾ ਨਾਲ ਸੰਪਰਕ ਕਰਨ ਦੇ ਯਤਨ ਕਰ ਰਹੀ ਹੈ। ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਗੌਰਵ ਦੇ ਨਾਲ ਦੋ ਲੋਕ ਹੋਰ ਫਡ਼ੇ ਗਏ ਹਨ ਪਰ ਉਸ ਦੇ ਹੋਰ ਸਾਥੀ ਵੀ ਹੋ ਸਕਦੇ ਹਨ ਜੋ ਉਸ ਨਾਲ ਇਸ ਧੰਦੇ ਵਿਚ ਜੁਡ਼ੇ ਹਨ। ਇਹ ਵੀ ਪਤਾ ਲੱਗਾ ਹੈ ਕਿ ਸਿੱਧੂ ਮੂਸੇਵਾਲਾ ਨੂੰ ਕਾਂਗਰਸ ਦੀ ਟਿਕਟ ਦਿਵਾਉਣ ਲਈ ਜੋ 5 ਕਰੋੜ ਰੁਪਏ ਦੀ ਡੀਲ ਹੋਈ ਸੀ, ਉਸ ਦੀ ਫੰਡਿੰਗ ਵੀ ਬਾਹਰੋਂ ਹੋਣ ਵਾਲੀ ਸੀ। ਜੇਕਰ ਅਜਿਹਾ ਹੋਇਆ ਤਾਂ ਮਾਮਲੇ ਵਿਚ ਮਨੀ ਲਾਂਡਰਿੰਗ ਕਰਨ ਦੇ ਨਾਂ ’ਤੇ ਫੰਡਿੰਗ ਕਰਨ ਵਾਲੇ ਲੋਕਾਂ ਦੇ ਨਾਂ ਵੀ ਸਾਹਮਣੇ ਆਉਣਗੇ ਤੇ ਉਨ੍ਹਾਂ ’ਤੇ ਮਨੀ ਲਾਂਡਰਿੰਗ ਐਕਟ ਤਹਿਤ ਕੇਸ ਦਰਜ ਕੀਤਾ ਜਾ ਸਕਦਾ ਹੈ। ਰਿਮਾਂਡ ਦੌਰਾਨ ਗੌਰਵ ਤੋਂ ਪੁਲਿਸ ਉਸ ਦੇ ਹੋਰ ਸਾਥੀਆਂ ਦੇ ਨਾਂ ਪੁੱਛਣ ਵਿਚ ਲੱਗੀ ਹੋਈ ਹੈ।
3 ਸਿਆਸਤਦਾਨਾਂ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ
ਬੁੱਧਵਾਰ ਨੂੰ 3 ਸਿਆਸਤਦਾਨਾਂ ਨੇ ਪੁਲਿਸ ਕੋਲ ਪਹੁੰਚ ਕਰ ਕੇ ਗਿਰੋਹ ਬਾਰੇ ਸ਼ਿਕਾਇਤ ਕੀਤੀ ਹੈ। ਇਨ੍ਹਾਂ ਵਿਚੋਂ ਇਕ ਲੁਧਿਆਣਾ, ਦੂਜਾ ਚੰਡੀਗੜ੍ਹ ਤੇ ਤੀਜਾ ਦਿੱਲੀ ਤੋਂ ਹੈ। ਇਨ੍ਹਾਂ ਨਾਲ ਹੀ ਇਹ ਗਿਰੋਹ ਕਰੋੜਾਂ ਰੁਪਏ ਦੀ ਠੱਗੀ ਕਰ ਚੁੱਕਾ ਹੈ। ਜੁਆਇੰਟ ਪੁਲਿਸ ਕਮਿਸ਼ਨਰ ਸਚਿਨ ਗੁਪਤਾ ਨੇ ਦੱਸਿਆ ਕਿ ਮੁਲਜ਼ਮ ਆਪਣੇ ਪੇਸ਼ੇ ਵਿਚ ਪੂਰੀ ਤਰ੍ਹਾਂ ਪੇਸ਼ੇਵਰ ਹਨ। ਪੁਲਿਸ ਨੂੰ ਪੁੱਛਗਿੱਛ ਵਿਚ ਉਹ ਸਹੀ ਗੱਲ ਨਹੀਂ ਦੱਸ ਰਿਹਾ। ਸਵਾਲ ਪੁੱਛਣ ’ਤੇ ਗੋਲਮੋਲ ਜਵਾਬ ਦਿੰਦਾ ਹੈ। ਉਸ ਨੇ ਸਿੱਧੂ ਮੂਸੇਵਾਲਾ ਤੋਂ 5 ਕਰੋੜ ਵਿਚ ਟਿਕਟ ਦੀ ਗੱਲ ਮੰਨੀ ਹੈ। ਜਦੋਂ ਕਈ ਅਧਿਕਾਰੀ ਮਿਲ ਕੇ ਉਸ ਤੋਂ ਪੁੱਛਗਿੱਛ ਕਰਦੇ ਹਨ ਤਾਂ ਕਈ ਵਾਰ ਬੇਚੈਨੀ ਵਿਚ ਉਹ ਸਹੀ ਗੱਲ ਬੋਲ ਜਾਂਦਾ ਹੈ। ਉਨ੍ਹਾਂ ਨੇ ਇਸ ਗਿਰੋਹ ਦੇ ਹੱਥੋਂ ਠੱਗੀ ਦੇ ਸ਼ਿਕਾਰ ਹੋ ਚੁੱਕੇ ਪੰਜਾਬ ਤੇ ਦੂਜੇ ਸੂਬਿਆਂ ਦੇ ਸਿਆਸਤਦਾਨਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਸ਼ਿਕਾਇਤ ਦਰਜ ਕਰਵਾਉਣ ਤਾਂ ਜੋ ਪੁਲਿਸ ਇਸ ਗਿਰੋਹ ਨੂੰ ਸਖ਼ਤ ਸਜ਼ਾ ਦਿਵਾ ਸਕੇ।
ਪੁਲਿਸ ਨੇ ਗਿਰੋਹ ਦੇ ਦੋ ਹੋਰ ਗੁਰਗੇ ਕੀਤੇ ਸੀ ਕਾਬੂ
ਥਾਣਾ ਡੇਹਲੋਂ ਪੁਲਿਸ ਨੇ 14 ਮਈ ਨੂੰ ਅੰਮ੍ਰਿਤਸਰ ਦੇ ਬਟਾਲਾ ਰੋਡ ਸਥਿਤ ਬੋਹੜ ਵਾਲਾ ਸ਼ਿਵਾਲਾ ਵਿਹਾਰ ਗਲੀ ਨੰਬਰ 4 ਵਾਸੀ ਰਾਕੇਸ਼ ਕੁਮਾਰ ਉਰਫ ਭਸੀਨ ਨੂੰ ਜਲੰਧਰ ਤੋਂ ਤੇ ਅੰਮ੍ਰਿਤਸਰ ਦੇ ਝਬਾਲ ਰੋਡ, ਪੀਪਿਆਂ ਵਾਲੀ ਗਲੀ ਵਾਸੀ ਰਜਤ ਕੁਮਾਰ ਪੀਏ ਉਰਫ ਰਾਜਾ ਉਰਫ ਮਦਾਨ ਨੂੰ ਫਗਵਾਡ਼ਾ ਤੋਂ ਗ੍ਰਿਫਤਾਰ ਕੀਤਾ ਸੀ। ਉਨ੍ਹਾਂ ਦੀ ਨਿਸ਼ਾਨਦੇਹੀ ’ਤੇ ਪੁਲਿਸ ਨੇ ਅੰਮ੍ਰਿਤਸਰ ਦੇ ਮਜੀਠਾ ਰੋਡ ਦੇ 88 ਫੁੱਟ ਰੋਡ ਵਾਸੀ ਗਿਰੋਹ ਦੇ ਮਾਸਟਰ ਮਾਈਂਡ ਗੌਰਵ ਸ਼ਰਮਾ ਉਰਫ ਗੋਰਾ ਨੂੰ ਅੰਮ੍ਰਿਤਸਰ ਤੋਂ ਕਾਬੂ ਕੀਤਾ ਸੀ।
