ਭਾਰਤ ਦੀ ਨਹੀਂ ਹੋ ਰਹੀ ਤਰੱਕੀ – ਭੁਟਾਨ, ਨਿਪਾਲ, ਬੰਗਲਾਦੇਸ਼ ਤੇ ਸ੍ਰੀਲੰਕਾ ਤੋਂ ਵੀ ਰਹਿ ਰਿਹਾ ਪਿੱਛੇ

ਨਵੀਂ ਦਿੱਲੀ, 6 ਜੂਨ – ਇਕ ਰਿਪੋਰਟ ਮੁਤਾਬਿਕ ਜਾਰੀ ਰਹਿਣ ਯੋਗ 17 ਵਿਕਾਸ ਟੀਚਿਆਂ (ਐਸ.ਡੀ.ਜੀ.) ਦੀ ਸੂਚੀ ਵਿਚੋਂ ਭਾਰਤ ਦੋ ਪਾਏਦਾਨ ਹੋਰ ਹੇਠਾਂ ਡਿਗ ਕੇ 117ਵੇਂ ਨੰਬਰ ‘ਤੇ ਆਇਆ ਹੈ। ਸੰਯੁਕਤ ਰਾਸ਼ਟਰ ਦੇ 193 ਦੇਸ਼ਾਂ ਨੇ 2015 ਨੂੰ 17 ਸਥਿਰ ਵਿਕਾਸ ਟੀਚੇ 2030 ਏਜੰਡੇ ਲਈ ਮਿਥੇ ਸਨ। ਜਿਨ੍ਹਾਂ ਵਿਚ ਭਾਰਤ ਦੀ ਕਾਰਕਰਦਗੀ ਭੁਟਾਨ, ਨਿਪਾਲ, ਸ੍ਰੀਲੰਕਾ ਤੇ ਬੰਗਲਾਦੇਸ਼ ਤੋਂ ਵੀ ਹੇਠਾਂ ਪਾਈ ਗਈ। ਭਾਰਤ ਦੇ ਐਸ.ਡੀ.ਜੀ. ਅੰਕ 100 ਵਿਚੋਂ 61.9 ਰਹੇ। ਪਿਛਲੇ ਸਾਲ ਭਾਰਤ ਇਸ ਮਾਮਲੇ ਵਿਚ 115ਵੇਂ ਨੰਬਰ ‘ਤੇ ਸੀ। ਭਾਰਤ ਭੁੱਖ, ਖ਼ੁਰਾਕ ਸੁਰੱਖਿਆ, ਲਿੰਗ ਸਮਾਨਤਾ, ਮਜ਼ਬੂਤ ਬੁਨਿਆਦੀ ਢਾਂਚਾ, ਸਮਾਵੇਸ਼ੀ ਤੇ ਸਥਿਰ ਉਦਯੋਗੀਕਰਨ ਅਤੇ ਨਵੀਨਤਾ ਨੂੰ ਉਤਸ਼ਾਹਿਤ ਕਰਨ ਵਰਗੀਆਂ ਚੁਣੌਤੀਆਂ ਦਾ ਅਜੇ ਵੀ ਸਾਹਮਣਾ ਕਰ ਰਿਹਾ ਹੈ