ਵਿਜੀਲੈਂਸ ਦੇ ਹੱਥੇ ਚੜ੍ਹਿਆ ਡੀਐੱਸਪੀ ਵਰਗੇ ਸ਼ੌਕ ਰੱਖਣ ਵਾਲਾ ਹੋਮਗਾਰਡ

ਅੰਮਿ੍ਤਸਰ : ਵਿਜੀਲੈਂਸ ਦੇ ਹੱਥੇ ਚੜ੍ਹੇ ਏਡੀਸੀਪੀ (2) ਸੰਦੀਪ ਮਲਿਕ ਦੇ ਦਫ਼ਤਰ ਵਿਚ ਤਾਇਨਾਤ ਹੋਮਗਾਰਡ ਜਵਾਨ ਧਰਮ ਸਿੰਘ ਉਰਫ਼ ਧਰਮਾ ਦੇ ਸ਼ੌਕ ਵੀ ਕਾਫ਼ੀ ਉੱਚੇ ਸਨ। ਵੀਰਵਾਰ ਨੂੰ ਕੋਰਟ ਵਿਚ ਪੇਸ਼ੀ ਤੋਂ ਪਹਿਲਾਂ ਚਰਚਾ ਰਹੀ ਕਿ ਮੁਲਜ਼ਮ ਧਰਮ ਸਿੰਘ ਉਰਫ਼ ਧਰਮਾ 28 ਹਜ਼ਾਰ ਤਨਖ਼ਾਹ ਵਿਚ ਇਕ ਡੀਐੱਸਪੀ ਵਰਗਾ ਰੋਅਬ ਕਿਵੇਂ ਰੱਖ ਸਕਦਾ ਹੈ। ਉਸ ਦੇ ਖ਼ਰਚਿਆਂ ਅਤੇ ਰਹਿਣ-ਸਹਿਣ ਨੂੰ ਲੈ ਕੇ ਕਈ ਸਵਾਲੀਆ ਨਿਸ਼ਾਨ ਖੜ੍ਹੇ ਹੋਣੇ ਸ਼ੁਰੂ ਹੋ ਗਏ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਵਿਜੀਲੈਂਸ ਬਿਊਰੋ ਹੁਣ ਹੋਮਗਾਰਡ ਧਰਮ ਸਿੰਘ ਦੀ ਜਾਇਦਾਦ ਦੀ ਜਾਂਚ ਕਰਵਾਉਣ ਦੀ ਤਿਆਰੀ ਵਿਚ ਹੈ।

ਧਰਮਾ ਦੇ ਕਬਜ਼ੇ ‘ਚੋਂ ਮਿਲੇ ਖ਼ਾਲੀ ਸੰਮਨ 

ਪੁਲਿਸ ਜਾਂਚ ‘ਚ ਹੋਮਗਾਰਡ ਧਰਮਾ ਨੇ ਕਾਫ਼ੀ ਗੱਲਾਂ ਕਬੂਲ ਕੀਤੀਆਂ ਹਨ। ਉਸ ਤੋਂ ਬਾਅਦ ਜਦ ਵਿਜੀਲੈਂਸ ਨੇ ਏਡੀਸੀਪੀ ਦਫ਼ਤਰ ਸਥਿਤ ਧਰਮਾ ਦੀ ਸੀਟ ਦੀ ਜਾਂਚ ਕੀਤੀ ਤਾਂ ਉਸ ਦੀ ਟੇਬਲ ‘ਚੋਂ ਖ਼ਾਲੀ ਸੰਮਨ ਬਰਾਮਦ ਕੀਤੇ ਗਏ। ਉਕਤ ਸੰਮਨ ‘ਤੇ ਕਿਸੇ ਵਿਅਕਤੀ ਦਾ ਨਾਂ ਲਿਖ ਕੇ ਉਸ ਨੂੰ ਸੰਮਨ ਕਰ ਅਧਿਕਾਰੀ ਦੇ ਦਰਬਾਰ ਵਿਚ ਤਲਬ ਕੀਤਾ ਜਾ ਸਕਦਾ ਸੀ।

ਇਸ ਤੋਂ ਇਲਾਵਾ ਧਰਮਾ ਦੇ ਟੇਬਲ ਦੇ ਇਕ ਹਿੱਸੇ ਵਿਚ ਤਿੰਨ ਲਿਸਟਾਂ ਬਰਾਮਦ ਹੋਈਆਂ ਹਨ। ਜਿਨ੍ਹਾਂ ‘ਤੇ ਨਾਜਾਇਜ਼ ਸ਼ਰਾਬ ਦਾ ਕਾਰੋਬਾਰ ਕਰਨ ਵਾਲੇ, ਰੇਹੜੀ ਫੜ੍ਹੀ ਅਤੇ ਹੋਟਲ ਵਾਲਿਆਂ ਦੇ ਮੋਬਾਈਲ ਨੰਬਰ ਮਿਲੇ ਹਨ। ਪੁਲਿਸ ਉਕਤ ਸਾਰੇ ਨੰਬਰਾਂ ‘ਤੇ ਕਾਲ ਕਰ ਰਹੀ ਹੈ।

ਧਰਮਾ ਖ਼ਿਲਾਫ਼ ਵਿਜੀਲੈਂਸ ਕੋਲ ਪੁੱਜੀਆਂ ਸਨ ਕਈ ਸ਼ਿਕਾਇਤਾਂ

ਧਰਮਾ ਖ਼ਿਲਾਫ਼ ਵਿਜੀਲੈਂਸ ਬਿਊਰੋ ਦੇ ਕੋਲ ਕਈ ਸ਼ਿਕਾਇਤਾਂ ਪਹੁੰਚੀਆਂ ਹਨ। ਮਜੀਠਾ ਰੋਡ, ਪੁਤਲੀਘਰ, ਰਾਣੀ ਕਾ ਬਾਗ ਤੋਂ ਅੱਧਾ ਦਰਜਨ ਲੋਕ ਆਪਣੇ ਪੱਤਰ ਲੈ ਕੇ ਵਿਜੀਲੈਂਸ ਦਫ਼ਤਰ ਪਹੁੰਚੇ ਸਨ ਤਾਂ ਕਿ ਧਰਮਾ ਖ਼ਿਲਾਫ਼ ਉਨ੍ਹਾਂ ਦੀਆਂ ਸ਼ਿਕਾਇਤਾਂ ਦਰਜ ਕੀਤੀਆਂ ਜਾਣ। ਫਿਲਹਾਲ ਉਨ੍ਹਾਂ ‘ਤੇ ਗ਼ੌਰ ਕੀਤਾ ਜਾ ਰਿਹਾ ਹੈ।