ਪਰਿਵਾਰ ਨੂੰ ਨਸ਼ੀਲੀ ਚੀਜ਼ ਪਿਆ ਕੇ ਕੁੜੀ ਸਹੇਲੀ ਨਾਲ ਫ਼ਰਾਰ

ਬਠਿੰਡਾ : ਜ਼ਿਲ੍ਹੇ ਦੇ ਕਸਬਾ ਨਥਾਣਾ ਵਿਚ ਇਕ ਨੌਜਵਾਨ ਕੁੜੀ ਆਪਣੇ ਪਰਿਵਾਰਕ ਮੈਂਬਰਾਂ ਨੂੰ ਨਸ਼ੀਲੀ ਚੀਜ਼ ਪਿਆ ਕੇ ਰਾਤ ਸਮੇਂ ਆਪਣੀ ਸਹੇਲੀ ਨਾਲ ਫ਼ਰਾਰ ਹੋ ਗਈ। ਨਥਾਣਾ ਪੁਲਿਸ ਨੇ ਫਰਾਰ ਹੋਈ ਕੁੜੀ ਦੀ ਮਾਤਾ ਸੁਮਨ ਲਤਾ ਦੇ ਬਿਆਨਾਂ ਦੇ ਆਧਾਰ ‘ਤੇ ਦੋਵਾਂ ਕੁੜੀਆਂ ਖ਼ਿਲਾਫ਼ ਕੇਸ ਦਰਜ ਕਰ ਕੇ ਉਨ੍ਹਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਕੋਲ ਦਰਜ ਕਰਵਾਏ ਬਿਆਨਾਂ ਵਿਚ ਕੁੜੀ ਦੀ ਮਾਤਾ ਨੇ ਦੱਸਿਆ ਕਿ ਬੀਤੀ ਰਾਤ ਉਸ ਦੀ ਲੜਕੀ ਸਵਿਤਾ ਰਾਣੀ ਨੇ ਮੈਂਗੋ ਸ਼ੇਕ ਬਣਾਇਆ ਸੀ ਜਿਸ ਨੂੰ ਪੀਣ ਬਾਅਦ ਸਾਰਾ ਪਰਿਵਾਰ ਗੂੜ੍ਹੀ ਨੀਂਦ ਸੌਂ ਗਿਆ। ਰਾਤ ਸਮੇਂ ਉਸ ਦੀ ਕੁੜੀ ਸ਼ਵੇਤਾ ਆਪਣੀ ਸਹੇਲੀ ਪਰਵਿੰਦਰ ਕੌਰ ਨਾਲ ਫ਼ਰਾਰ ਹੋ ਗਈ। ਪਹਿਲਾਂ ਵੀ ਉਕਤ ਦੋਵੇਂ ਕੁੜੀਆਂ ਘਰੋਂ ਚਲੀਆਂ ਗਈਆਂ ਸਨ ਅਤੇ ਉਹ ਇਕੱਠੀਆਂ ਗਿੱਦੜਬਹਾ ਰਹਿਣ ਲੱਗੀਆਂ ਸਨ। ਥਾਣਾ ਨਥਾਣਾ ਦੇ ਸਹਾਇਕ ਥਾਣੇਦਾਰ ਤਰਵਿੰਦਰ ਸਿੰਘ ਨੇ ਦੱਸਿਆ ਕਿ ਦੋਵੇਂ ਕੁੜੀਆਂ ਖ਼ਿਲਾਫ਼ ਕੇਸ ਦਰਜ ਕਰਕੇ ਉਨ੍ਹਾਂ ਦੀ ਭਾਲ ਸ਼ੁਰੂ ਕੀਤੀ ਗਈ ਹੈ।