ਸ੍ਰੀ ਦਰਬਾਰ ਸਾਹਿਬ ਦੇ ਨਜ਼ਦੀਕ ਖੁਦਾਈ ਦੌਰਾਨ ਮਿਲੇ ਪੁਰਾਣੇ ਇਮਾਰਤੀ ਢਾਂਚੇ

ਅੰਮ੍ਰਿਤਸਰ, 4 ਜੁਲਾਈ -ਸ੍ਰੀ ਦਰਬਾਰ ਸਾਹਿਬ ਦੇ ਬਾਹਰ ਮਾਈ ਸੇਵਾ ਬਾਜ਼ਾਰ ਵਲ ਨੂੰ ਜਾਂਦੇ ਰਸਤੇ `ਤੇ ਮੌਜੂਦ ਜੋੜਾ ਘਰ ਦੇ ਬਿਲਕੁਲ ਨਾਲ ਖੁਦਾਈ ਦੌਰਾਨ ਕੁਝ ਪੁਰਾਣੇ ਇਮਾਰਤੀ ਢਾਂਚੇ ਮਿਲੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਖੁਦਾਈ ਦੌਰਾਨ ਜੇ. ਸੀ. ਬੀ. ਮਸ਼ੀਨ ਵਲੋਂ ਉੱਪਰਲੀਆਂ ਨਵੀਆਂ ਇੱਟਾਂ ਨੂੰ ਹਟਾਉਣ ਉਪਰੰਤ ਕੁਝ ਫੁੱਟ ਹੇਠਾਂ ਇਕ ਪੁਰਾਣੀਆਂ ਛੋਟੀਆਂ ਇੱਟਾਂ ਨਾਲ ਬਣੇ ਘਰ ਜਾਂ ਬੁੰਗੇ ਦੀਆਂ ਦੀਵਾਰਾਂ ਅਤੇ ਦਰਵਾਜ਼ੇ ਮਿਲੇ ਹਨ। ਦੱਸਣਯੋਗ ਹੈ ਕਿ ਜਿਸ ਜਗ੍ਹਾ ਖੁਦਾਈ ਕੀਤੀ ਜਾ ਰਹੀ ਹੈ, ਉਸ ਜਗ੍ਹਾ ਸਿੱਖ ਰਾਜ ਵੇਲੇ ਬੁੰਗੇ ਅਤੇ ਹੋਰ ਪੁਰਾਣੀਆਂ ਇਮਾਰਤਾਂ ਮੌਜੂਦ ਸਨ, ਜਿਨ੍ਹਾਂ ਨੂੰ ਅੰਗਰੇਜ਼ੀ ਰਾਜ ਦੀ ਸਮਾਪਤੀ ਦੇ ਬਾਅਦ ਢਾਹ ਦਿੱਤਾ ਗਿਆ। ਦੱਸਿਆ ਜਾ ਰਿਹਾ ਹੈ ਕਿ ਇੱਥੇ ਆਸ-ਪਾਸ ਖੇਤਰ `ਚ ਖੁਦਾਈ ਦੇ ਦੌਰਾਨ ਪਹਿਲਾਂ ਵੀ ਕਈ ਜ਼ਮੀਨ ਹੇਠਾਂ ਦਫ਼ਨ ਅਜਿਹੇ ਢਾਂਚੇ ਅਤੇ ਖੂਹ ਮਿਲ ਚੁਕੇ ਹਨ।