ਬਰਨਾਲਾ : ਨੇੜਲੇ ਕਸਬੇ ਧਨੌਲਾ ਦੇ ਕੋਠੇ ਗੋਬਿੰਦਪੁਰਾ ਦੇ ਲਵਪ੍ਰੀਤ ਉਰਫ਼ ਲਾਡੀ ਨੇ ਆਪਣੀ ਕੈਨੇਡੀਅਨ ਪਤਨੀ ਦੇ ਧੋਖੇ ਤੋਂ ਦੁਖੀ ਹੋਕੇ ਬੀਤੀ 24 ਜੂਨ ਨੂੰ ਆਪਣੀ ਜੀਵਨ ਲੀਲ੍ਹਾ ਸਮਾਪਤ ਕਰ ਲਈ ਸੀ ਜਿਸ ਤੋਂ ਬਾਅਦ ਉਸਦੀ ਕੈਨੇਡੀਅਨ ਪਤਨੀ ਬੇਅੰਤ ਕੌਰ ਨੂੰ ਕੈਨੇਡਾ ਸਰਕਾਰ ਵਲੋਂ ਡਿਪੋਰਟ ਕਰਨ ਸਬੰਧੀ ਕਈ ਤਰ੍ਹਾਂ ਦੀਆਂ ਚਰਚਾਵਾਂ ਚੱਲ ਰਹੀਆਂ ਹਨ।ਹੁਣ ਕੁੜੀ ਵਲੋਂ ਲਵਪ੍ਰੀਤ ਦੇ ਪਰਿਵਾਰਿਕ ਮੈਂਬਰਾਂ ਨੂੰ ਸਮਝੌਤਾ ਕਰਨ ਦੀਆਂ ਆਫ਼ਰਾਂ ਦਿੱਤੀਆਂ ਜਾਣ ਲੱਗੀਆਂ ਹਨ।
ਲਵਪ੍ਰੀਤ ਦੇ ਚਾਚਾ ਹਰਵਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਭਤੀਜੇ ਲਵਪ੍ਰੀਤ ਸਿੰਘ ਦੀ ਮੰਗਣੀ 2018 ’ਚ ਬੇਅੰਤ ਕੌਰ ਵਾਸੀ ਖੁੱਡੀ ਕਲਾਂ ਨਾਲ ਹੋਈ ਸੀ।
ਇਸ ਦੌਰਾਨ ਅਸੀਂ 25 ਲੱਖ ਰੁਪਏ ਲਾ ਕੇ ਬੇਅੰਤ ਕੌਰ ਕੈਨੇਡਾ ਭੇਜ ਦਿੱਤਾ। ਇਸ ਉਪਰੰਤ 2019 ’ਚ ਲਵਪ੍ਰੀਤ ਸਿੰਘ ਤੇ ਬੇਅੰਤ ਕੌਰ ਦਾ ਵਿਆਹ ਕੀਤਾ ਗਿਆ ਸੀ ਪਰ ਵਿਆਹ ਤੋਂ ਬਾਅਦ ਕਰੀਬ 2 ਸਾਲ ਦੇ ਸਮੇਂ ਦੌਰਾਨ ਬੇਅੰਤ ਕੌਰ ਹਮੇਸ਼ਾ ਲਵਪ੍ਰੀਤ ਸਿੰਘ ਨੂੰ ਕੈਨੇਡਾ ਬੁਲਾਉਣ ਸਬੰਧੀ ਟਾਲਮਟੋਲ ਕਰਦੀ ਰਹਿੰਦੀ ਸੀ ਤੇ ਫ਼ਿਰ ਉਸਨੇ ਉਸ ਨਾਲ ਗੱਲ ਕਰਨੀ ਵੀ ਬੰਦ ਕਰ ਦਿੱਤੀ ਸੀ। ਜਦੋਂ ਲਵਪ੍ਰੀਤ ਸਿੰਘ ਨੇ ਉਸਨੂੰ ਕੈਨੇਡਾ ਨਾ ਬੁਲਾਉਣ ਦੇ ਚਲਦਿਆਂ ਖ਼ੁਦਕੁਸ਼ੀ ਕਰਨ ਦੀ ਗੱਲ ਆਖੀ ਤਾਂ ਕੁੜੀ ਨੇ ਉਸ ਨੂੰ ਅਜਿਹਾ ਕਰਨ ਦੀ ਹੱਲਾਸ਼ੇਰੀ ਦਿੱਤੀ ਜਿਸ ਤੋਂ ਦੁਖੀ ਹੋ ਕੇ ਲਵਪ੍ਰੀਤ ਬੀਤੀ 23 ਜੂਨ ਨੂੰ ਰਾਤ ਕਰੀਬ 9 ਵਜੇ ਆਪਣੇ ਘਰੋਂ ਚਲਾ ਗਿਆ, ਜਿਸਦੀ 24 ਜੂਨ ਨੂੰ ਤੜ੍ਹਕਸਾਰ ਉਸਦੇ ਖੇਤ ’ਚੋਂ ਲਾਸ਼ ਮਿਲੀ ਤੇ ਉਸਦੇ ਮੂੰਹ ’ਚੋਂ ਝੱਗ ਨਿਕਲ ਰਹੀ ਸੀ
ਲਵਪ੍ਰੀਤ ਵਲੋਂ ਖੁਦਕੁਸ਼ੀ ਕਰਨ ਉਪਰੰਤ ਵੱਖ-ਵੱਖ ਜਥੇਬੰਦੀਆਂ ਵਲੋਂ ਬੇਅੰਤ ਕੌਰ ਨੂੰ ਕੈਨੇਡਾ ਤੋਂ ਡਿਪੋਰਟ ਕਰਵਾਉਣ ਦੀ ਮੰਗ ਉਠਣ ਲੱਗੀ ਜਿਸ ਨੂੰ ਸੋਸ਼ਲ ਮੀਡੀਆ ’ਤੇ ਵੀ ਭਰਪੂਰ ਸਮਰਥਨ ਮਿਲਣ ਲੱਗਿਆ ਪਰ ਹੁਣ ਡਿਪੋਰਟ ਹੋਣ ਦੇ ਡਰੋਂ ਬੇਅੰਤ ਕੌਰ ਵਲੋਂ ਮ੍ਰਿਤਕ ਲਵਪ੍ਰੀਤ ਸਿੰਘ ਦੇ ਪਰਿਵਾਰ ਨੂੰ ਸਮਝੌਤੇ ਦੀ ਗੱਲ ਆਖੀ ਜਾ ਰਹੀ ਹੈ ਤੇ ਕਿਹਾ ਜਾ ਰਿਹਾ ਹੈ ਕਿ ਤੁਸੀ 25 ਲੱਖ ਦੇ ਬਦਲੇ 35 ਲੱਖ ਲੈ ਲਓ, ਪਰ ਮੈਨੂੰ ਡਿਪੋਰਟ ਨਾ ਕਰਵਾਓ।
ਉਧਰ, ਲਵਪ੍ਰੀਤ ਦੇ ਪਰਿਵਾਰ ਵਲੋਂ ਕਿਹਾ ਗਿਆ ਕਿ ਤੇਰੇ 35 ਲੱਖ ਨਾਲ ਕਿਹੜਾ ਸਾਡਾ ਪੁੱਤ ਵਾਪਸ ਆ ਜਾਊ। ਉਨ੍ਹਾਂ ਕੁੜੀ ਨੂੰ ਕਿਹਾ ਕਿ ਸਾਰੇ ਪੈਸੇ ਤਾਂ ਅਸੀਂ ਤੈਨੂੰ ਪਹਿਲਾਂ ਦੇ ਚੁੱਕੇ ਹਾਂ, ਹੁਣ ਅਸੀਂ ਤੇਰੇ ਨਾਂ 3 ਕਿਲੇ ਜ਼ਮੀਨ ਲਗਵਾ ਦਿੰਦੇ ਹਾਂ, ਤੂੁੰ ਸਾਡਾ ਪੁੱਤ ਵਾਪਸ ਕਰ ਦੇ। ਮੁੰਡੇ ਦੇ ਪਰਿਵਾਰਿਕ ਮੈਂਬਰਾਂ ਨੇ ਇਨਸਾਫ਼ ਦੀ ਮੰਗ ਕਰਦਿਆਂ ਕਿਹਾ ਕਿ ਬੇਅੰਤ ਕੌਰ ਨੂੰ ਜਲਦ ਤੋਂ ਜਲਦ ਡਿਪੋਰਟ ਕੀਤਾ ਜਾਵੇ ਤਾਂ ਜੋ ਅੱਗੇ ਤੋਂ ਕੋਈ ਵੀ ਕੁੜੀ ਕਿਸੇ ਵੀ ਲੜਕੇ ਨਾਲ ਅਜਿਹਾ ਕਰਨ ਦੀ ਹਿੰਮਤ ਨਾ ਕਰੇ।
