ਦੁਬਈ : ਦੁਬਈ ਇਕਨਾਮਿਕ ਡਿਪਾਰਟਮੈਂਟ (ਡੀਈਡੀ) ਨੇ ਵਿਦੇਸ਼ੀ ਨਿਵੇਸ਼ ਵਧਾਉਣ ਤੇ ਵਿਦੇਸ਼ੀ ਨਿਵੇਸ਼ਕਾ ਨੂੰ ਉਤਸ਼ਾਹਤ ਕਰਨ ਲਈ ਸੌ ਫ਼ੀਸਦੀ ਮਲਕੀਅਤ ਵਾਲਾ ਕਾਨੂੰਨ ਪਹਿਲੀ ਜੂਨ 2021 ਤੋਂ ਲਾਗੂ ਕਰ ਦਿੱਤਾ ਹੈ। ਇਸ ਨਾਲ ਹੁਣ ਦੁਬਈ ’ਚ ਵਿਦੇਸ਼ੀ ਨਿਵੇਸ਼ਕਾਂ ਨੂੰ ਨਵਾਂ ਵਪਾਰ ਖੋਲ੍ਹਣ ਲਈ ਅਮੀਰਾਤੀ ਭਾਈਵਾਲ ਦੀ ਜ਼ਰੂਰਤ ਨਹੀਂ ਹੋਵੇਗੀ। ਪੁਰਾਣੇ ਕਾਨੂੰਨ ਤਹਿਤ ਕਾਰੋਬਾਰ ’ਚ 51 ਫ਼ੀਸਦੀ ਅਮੀਰਾਤੀ ਦੀ ਭਾਈਵਾਲੀ ਜ਼ਰੂਰੀ ਸੀ। ਪਿਛਲੇ ਕੁਝ ਸਮੇ ਤੋਂ ਵਿਦੇਸ਼ੀ ਨਿਵੇਸ਼ਕ ਪੂਰੀ ਮਲਕੀਅਤ ਦੀ ਮੰਗ ਕਰ ਰਹੇ ਸੀ
ਦੁਬਈ ਆਰਥਿਕ ਵਿਭਾਗ (ਡੀਈਡੀ) ਦੁਆਰਾ ਜਾਰੀ ਤਾਜਾ ਦਿਸ਼ਾ-ਨਿਰਦੇਸ਼ਾਂ ’ਚ ਇਹ ਵੀ ਦੱਸਿਆ ਗਿਆ ਹੈ ਕਿ ਇੱਥੇ ਵਿਦੇਸ਼ੀ ਕੰਪਨੀਆਂ ਨੂੰ 100% ਮਾਲਕੀ ਲਈ ਕੋਈ ਵਾਧੂ ਫੀਸ, ਗਾਰੰਟੀ ਜਾਂ ਪੂੰਜੀ ਦੀ ਜ਼ਰੂਰਤ ਨਹੀਂ ਹੋਵੇਗੀ। ਵਿਦੇਸ਼ੀ ਨਿਵੇਸ਼ਕਾਂ ਲਈ ਵਪਾਰ ’ਚ ਅਮੀਰਾਤੀ ਦੀ ਭਾਈਵਾਲੀ ਘਟਾਉਣਾ ਜਾਂ ਪੂਰੀ ਤਰ੍ਹਾਂ ਉਸ ਨੂੰ ਖ਼ਤਮ ਕਰਨਾ ਵੀ ਇਸ ਕਾਨੂੰਨਾਂ ਨਾਲ ਸੰਭਵ ਹੋ ਗਿਆ ਹੈ। ਇਹ ਕਾਨੂੰਨ ਵਪਾਰਕ ਕੰਪਨੀਆਂ ’ਤੇ ਲਾਗੂ ਹੁੰਦਾ ਹੈ ਜਦਕਿ ਕਾਰੋਬਾਰੀ ਏਜੰਸੀਆਂ ’ਤੇ ਲਾਗੂ ਨਹੀਂ ਹੁੰਦਾ। ਡੀਈਡੀ ਨੇ ਇਸ ਸਬੰਧੀ 1000 ਤੋਂ ਵੱਧ ਕਾਰੋਬਾਰਾਂ ਦੀ ਲਿਸਟ ਵੀ ਜਾਰੀ ਕੀਤੀ ਹੈ
ਇਸ ਬਾਰੇ ਦੁਬਈ ’ਚ ਵਸਦੇ ਪੰਜਾਬੀ ਨਿਵੇਸ਼ਕ ਕਰਨ ਖੋਸਲਾ ਨੇ ਦੱਸਿਆ ਕਿ ਜਿੱਥੇ ਇਹ ਕਾਨੂੰਨ ਦੁਬਈ ਦੇ ਕਾਰੋਬਾਰ ਲਈ ਫਾਇਦੇਮੰਦ ਹੋਵੇਗਾ ਉੱਥੇ ਹੀ ਵਿਦੇਸ਼ੀ ਨਿਵੇਸ਼ਕਾਂ ਲਈ ਵੀ ਨਵੇ ਰਾਹ ਖੋਲ੍ਹੇਗਾ। ਡੀਈਡੀ ਨੇ ਕਿਹਾ ਇਸ ਫੈਸਲੇ ਨਾਲ ਸੰਯੁਕਤ ਅਰਬ ਅਮੀਰਾਤ ਦੀ ਆਰਥਿਕ ਸਥਿਤੀ ’ਚ ਤੇਜੀ ਆਵੇਗੀ ਤੇ ਦੇਸ਼ ’ਚ ਹੁਣ ਤੱਕ ਹੋਏ ਲਾਭ ’ਚ ਵਾਧਾ ਹੋਵੇਗਾ।
