ਜਲੰਧਰ : ਇਨਫੋਰਸਮੈਂਟ ਡਾਇਰੈਕਟੋਰੇਟ ਦਿੱਲੀ ਦੀ ਟੀਮ ਨੇ ਮਨੀ ਲਾਂਡ੍ਰਿੰਗ ਮਾਮਲੇ ’ਚ ਫਗਵਾੜਾ ਦੇ ਸ਼ਿਵਲਾਲ ਪੱਬੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਗ੍ਰਿਫ਼ਤਾਰੀ ਸਮੇਂ ਉਹ ਇੰਦਰਾ ਗਾਂਧੀ ਇੰਟਰਨੈਸ਼ਨਲ ਹਵਾਈ ਅੱਡੇ ਤੋਂ ਪੈਰਿਸ ਲਈ ਫਲਾਈਟ ਫੜਨ ਜਾ ਰਿਹਾ ਸੀ
ਈਡੀ ਨੇ ਉਸ ਨੂੰ ਹਵਾਈ ਅੱਡੇ ’ਤੇ ਗ੍ਰਿਫ਼ਤਾਰ ਕਰ ਲਿਆ। ਸ਼ਿਵਲਾਲ ’ਤੇ ਹਵਾਲਾ ਕਾਰੋਬਾਰ ਦੇ ਜ਼ਰੀਏ ਨੀਦਰਲੈਂਡ ’ਚ ਧੋਖਾਧੜੀ ਅਤੇ ਜਾਅਲਸਾਜ਼ੀ ਕਰਨ ਦਾ ਦੋਸ਼ ਹੈ। ਨੀਦਰਲੈਂਡ ਸਰਕਾਰ ਦੀ ਅਪੀਲ ਤੋਂ ਬਾਅਦ ਈਡੀ ਨੇ ਉਸ ਦੇ ਖ਼ਿਲਾਫ਼ ਜਾਂਚ ਸ਼ੁਰੂ ਕੀਤੀ ਸੀ। ਇਸੇ ਮਾਮਲੇ ’ਚ ਫਰਵਰੀ ’ਚ ਈਡੀ ਨੇ ਕਲੱਬ ਕਬਾਨਾ ਸਮੇਤ ਕਈ ਥਾਵਾਂ ’ਤੇ ਛਾਪੇਮਾਰੀ ਕੀਤੀ ਸੀ।
30 ਸਾਲ ਪਹਿਲਾਂ ਨੀਦਰਲੈਂਡ ਗਿਆ ਸੀ
ਸ਼ਿਵਲਾਲ ਪੱਬੀ 30 ਸਾਲ ਪਹਿਲਾਂ ਫਗਵਾੜਾ ਤੋਂ ਨੀਦਰਲੈਂਡ ਚਲਾ ਗਿਆ ਸੀ। ਉਸ ਨੂੰ 1984 ’ਚ ਉੱਥੋਂ ਦੀ ਨਾਗਰਿਕਤਾ ਮਿਲ ਗਈ ਸੀ। ਦਰਅਸਲ, ਈਡੀ ਨੇ ਸ਼ਿਵਲਾਲ ਸਮੇਤ 6 ਮੁਲਾਜ਼ਮਾਂ ਖ਼ਿਲਾਫ਼ ਨੀਦਰਲੈਂਡ ਸਰਕਾਰ ਦੀ ਅਪੀਲ ’ਤੇ ਜਾਂਚ ਸ਼ੁਰੂ ਕੀਤੀ ਸੀ। ਪੱਬੀ ’ਤੇ ਦੋਸ਼ ਸੀ ਕਿ ਉਸ ਨੇ ਆਪਣੇ ਭਾਰਤੀ ਸਹਿਯੋਗੀਆਂ ਨਾਲ ਮਿਲ ਕੇ ਫ਼ਰਜ਼ੀ ਦਸਤਾਵੇਜ਼ਾਂ ਦੇ ਆਧਾਰ ’ਤੇ ਨੀਦਰਲੈਂਡ ’ਚ ਧੋਖਾਧੜੀ ਅਤੇ ਜਾਅਲਸਾਜ਼ੀ ਕੀਤੀ ਹੈ। ਸ਼ਿਵਲਾਲ ਨੀਦਰਲੈਂਡ ’ਚ ਰੈਡੀਮੇਡ ਗਾਰਮੈਂਟ ਦਾ ਵਪਾਰ ਕਰ ਦਾ ਸੀ, ਜਿਸ ਦਾ ਨੈੱਟਵਰਕ ਦੁਬਈ ਤਕ ਫੈਲਿਆ ਹੋਇਆ ਸੀ। ਸ਼ਿਵਲਾਲ ਅਤੇ ਉਸ ਦੇ ਸਾਥੀਆਂ ’ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਗਾਰਮੈਂਟ ਦੇ ਵਪਾਰ ਦੀ ਆੜ ’ਚ ਹਵਾਲਾ ਕਾਰੋਬਾਰ ਚਲਾਇਆ ਅਤੇ ਕਈ ਬ੍ਰੋਕਰਾਂ ਨਾਲ ਮਿਲ ਕੇ ਕਰੋੜਾਂ ਰੁਪਏ ਦੀ ਰਕਮ ਦਾ ਹੇਰਫੇਰ ਕੀਤਾ।
ਫਗਵਾੜਾ ’ਚ ਭਰਾ ਦੇ ਬੈਂਕ ਖਾਤੇ ’ਚ ਆਏ 25 ਕਰੋੜ ਰੁਪਏ
ਹਵਾਲਾ ਦੇ ਜ਼ਰੀਏ ਸ਼ਿਵਲਾਲ ਅਤੇ ਉਸ ਦੇ ਭਰਾ ਦੇ ਫਗਵਾੜਾ ਦੇ ਇਕ ਬੈਂਕ ਦੇ ਖਾਤੇ ’ਚ ਕਰੋੜਾਂ ਰੁਪਏ ਆਏ। ਦਰਅਸਲ, ਬੀਤੀ ਫਰਵਰੀ ’ਚ ਦਿੱਲੀ ਈਡੀ ਦੀ ਟੀਮ ਨੇ ਜਲੰਧਰ ਕਲੱਬ ਕਬਾਨਾ ਸਮੇਤ ਕਈ ਥਾਵਾਂ ’ਤੇ ਛਾਪੇਮਾਰੀ ਕੀਤੀ ਸੀ। ਈਡੀ ਦੀ ਇਹ ਛਾਪੇਮਾਰੀ ਫਗਵਾੜਾ ਦੇ ਬੈਂਕ ਖਾਤੇ ’ਚ 25 ਕਰੋੜ ਰੁਪਏ ਨੂੰ ਲੈ ਕੇ ਕੀਤੀ ਗਈ, ਜਿਸ ਦੀ ਜਾਂਚ ਅਜੇ ਵੀ ਚੱਲ ਰਹੀ ਹੈ।
