ਚੰਡੀਗੜ੍ਹ : ਕਾਂਗਰਸ ਹਾਈ ਕਮਾਂਡ ਵੱਲੋਂ ਨਵਜੋਤ ਸਿੰਘ ਸਿੱਧੂ (Navjot Singh Sidhu) ਨੂੰ ਪ੍ਰਦੇਸ਼ ਪ੍ਰਧਾਨ ਬਣਨ ਦੇ ਐਲਾਨ ਦੇ ਨਾਲ ਹੀ ਚੰਡੀਗੜ੍ਹ ਸਥਿਤ ਪੰਜਾਬ ਕਾਂਗਰਸ ਹੈੱਡਕੁਆਰਟਰ (Punjab Congress Headquarter) ਦਾ ਰੰਗਰੂਪ ਵੀ ਬਦਲਣ ਲੱਗਾ ਹੈ। ਇੱਥੇ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ (Captain Amarinder Singh) ਦਾ ਪੋਸਟਰ ਲੱਗਾ ਹੁੰਦਾ ਸੀ, ਪਰ ਸਿੱਧੂ ਸਮਰਥਕਾਂ ਨੇ ਰਾਤੋ-ਰਾਤ ਇਸ ਨੂੰ ਬਦਲ ਕੇ ਇੱਥੇ ਨਵਜੋਤ ਸਿੰਘ ਸਿੱਧੂ ਦਾ ਪੋਸਟਰ ਲਗਾ ਦਿੱਤਾ ਹੈ
ਦੱਸ ਦੇਈਏ ਕਿ ਪੰਜਾਬ ‘ਚ ਨਵਜੋਤ ਸਿੰਘ ਸਿੱਧੂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਲਗਾਤਾਰ ਹਮਲਾਵਰ ਰਹੇ ਹਨ। ਲੰਬੇ ਸਮੇਂ ਤੋਂ ਨਵਜੋਤ ਸਿੰਘ ਸਿੱਧੂ ਨੂੰ ਪ੍ਰਦੇਸ਼ ਪ੍ਰਧਾਨ ਬਣਾਉਣ ਦੀ ਚਰਚਾ ਚੱਲ ਰਹੀ ਸੀ, ਪਰ ਕੈਪਟਨ ਅਮਰਿੰਦਰ ਸਿੰਘ ਦਬਾਅ ਕਾਰਨ ਹਾਈ ਕਮਾਂਡ ਕੋਈ ਫ਼ੈਸਲਾ ਨਹੀਂ ਲੈ ਪਾ ਰਹੀ ਸੀ। ਪੁਰਾਣੇ ਕਾਂਗਰਸੀ ਵੀ ਸਿੱਧੂ ਨੂੰ ਪ੍ਰਦੇਸ਼ ਪ੍ਰਧਾਨ ਦਾ ਅਹੁਦਾ ਦੇਣ ਦੇ ਹੱਕ ਵਿਚ ਨਹੀਂ ਸਨ, ਪਰ ਕਾਂਗਰਸ ਹਾਈ ਕਮਾਂਡ ਨੇ ਇਸ ਦੀ ਪਰਵਾਰ ਕੀਤੇ ਬਿਨਾਂ ਬੀਤੀ ਰਾਤ ਨਵਜੋਤ ਸਿੰਘ ਸਿੱਧੂ ਨੂੰ ਪਾਰਟੀ ਦੇ ਪ੍ਰਦੇਸ਼ ਪ੍ਰਧਾਨ ਦੀ ਕਮਾਂਡ ਸੌਂਪ ਦਿੱਤੀ। ਹਾਲਾਂਕਿ ਸਿੱਧੂ ਨੂੰ ਨੱਥ ਪਾਉਣ ਲਈ ਚਾਰ ਕਾਰਜਕਾਰੀ ਪ੍ਰਧਾਨ ਵੀ ਨਿਯੁਕਤ ਕੀਤੇ ਹਨ।
ਸਿੱਧੂ ਜਦੋਂ ਭਾਜਪਾ ਛੱਡ ਕੇ ਕਾਂਗਰਸ ‘ਚ ਆਏ ਸਨ, ਉਦੋਂ ਵੀ ਕੈਪਟਨ ਸਿੱਧੂ ਨੂੰ ਪਾਰਟੀ ‘ਚ ਲਿਆਉਣ ਦੇ ਹੱਕ ‘ਚ ਨਹੀਂ ਸਨ। ਸ਼ੁਰੂਆਤੀ ਇਕ ਸਾਲ ਤਾਂ ਸਿੱਧੂ ਤੇ ਕੈਪਟਨ ‘ਚ ਠੀਕ-ਠੀਕ ਬਣੀ। ਸਿੱਧੂ ਨੂੰ ਕੈਪਟਨ ਨੇ ਆਪਣੇ ਮੰਤਰੀਮੰਡਲ ਵਿਚ ਜਗ੍ਹਾ ਦਿੱਤੀ ਤੇ ਉਨ੍ਹਾਂ ਨੂੰ ਲੋਕਲ ਬਾਡੀ ਮੰਤਰੀ ਬਣਾਇਆ। ਕੁਝ ਸਮੇਂ ਬਾਅਦ ਕੈਪਟਨ ਨੇ ਮੰਤਰੀਮੰਡਲ ‘ਚ ਰੱਦੋ-ਬਦਲ ਕੀਤਾ। ਸਿੱਧੂ ਨੂੰ ਲੋਕਲ ਬਾਡੀ ਦੀ ਬਜਾਏ ਊਰਜਾ ਵਿਭਾਗ ਦਿੱਤਾ ਗਿਆ, ਪਰ ਸਿੱਧੂ ਇਸ ਦੇ ਲਈ ਰਾਜ਼ੀ ਨਹੀਂ ਹੋਏ ਤੇ ਮੰਤਰੀਮੰਡਲ ਤੋਂ ਅਸਤੀਫ਼ਾ ਦੇ ਦਿੱਤਾ।
ਕੈਪਟਨ ਮੰਤਰੀ ਮੰਡਲ ਤੋਂ ਅਸਤੀਫ਼ਾ ਦਿੱਤੇ ਜਾਣ ਤੋਂ ਬਾਅਦ ਸਿੱਧੂ ਲੰਬੇ ਸਮੇਂ ਤਕ ਚੁੱਪ ਰਹੇ, ਪਰ ਇਸ ਦੌਰਾਨ ਇਸ ਸਾਲ ਦੀ ਸ਼ੁਰੂਆਤ ‘ਚ ਉਹ ਅਚਾਨਕ ਸਰਗਰਮ ਹੋ ਗਏ। ਇੰਟਰਨੈੱਟ ਮੀਡੀਆ ਜ਼ਰੀਏ ਸਿੱਧੂ ਨੇ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਨਿਸ਼ਾਨਾ ਵਿੰਨ੍ਹਣਾ ਸ਼ੁਰੂ ਕਰ ਦਿੱਤਾ। ਇਸ ਤੋਂ ਬਾਅਦ ਕੈਪਟਨ ਵਿਰੋਧੀ ਧੜਾ ਬਿਆਨਬਾਜ਼ੀ ਤੇਜ਼ ਕਰਨ ਲੱਗਾ। ਕਾਂਗਰਸ ਹਾਈ ਕਮਾਂਡ ਨੂੰ ਪਾਰਟੀ ‘ਚ ਉੱਠ ਰਹੇ ਬਾਗ਼ੀ ਸੁਰ ਸ਼ਾਂਤ ਕਰਨ ਲਈ ਬੈਠਕਾਂ ਕਰਨੀਆਂ ਪਈਆਂ। ਫਿਰ ਵੀ ਸਿੱਧੂ ਕੈਪਟਨ ‘ਤੇ ਹਮਲਾਵਰ ਰਹੇ। ਹੁਣ ਹਾਈ ਕਮਾਂਡ ਨੇ ਸਿੱਧੂ ਨੂੰ ਪ੍ਰਦੇਸ਼ ਪ੍ਰਧਾਨ ਦੀ ਕਮਾਨ ਸੌਂਪ ਦਿੱਤੀ ਹੈ। ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਚੋਣ ਵਰ੍ਹੇ ‘ਚ ਅੱਗੇ ਸਿੱਧੂ-ਕੈਪਟਨ ਦੀ ਕੀ ਕੈਮਿਸਟਰੀ ਰਹਿੰਦੀ ਹੈ।
