ਜਲੰਧਰ : ਜਲੰਧਰ ਦੇ ਨੂਰਮਹਿਲ ‘ਚ ਬਿਹਾਰ ਦੇ ਪੂਰਨੀਆ ਜ਼ਿਲ੍ਹੇ ਦੇ ਰਹਿਣ ਵਾਲੇ ਪਿਓ-ਪੁੱਤਰ ਦੀ ਹੱਤਿਆ ਦੇ ਮਾਮਲੇ ‘ਚ ਪੁਲਿਸ ਨੇ ਮੁਲਜ਼ਮ ਰਾਮ ਚੰਦਰ ਖਿਲਾਫ਼ ਕੇਸ ਦਰਜ ਕਰਨ ਤੋਂ ਬਾਅਦ ਉਸ ਦੀ ਤਲਾਸ਼ ਸ਼ੁਰੂ ਕਰ ਦਿੱਤੀ ਹੈ। ਉਸ ਦੇ ਸ਼ਹਿਰ ਤੋਂ ਬਾਹਰ ਭੱਜਣ ਦੇ ਖਦਸ਼ੇ ਤਹਿਤ ਸ਼ਹਿਰ ਦੇ ਬੱਸ ਸਟੈਂਡ ਤੇ ਰੇਲਵੇ ਸਟੇਸ਼ਨ ‘ਤੇ ਚੈਕਿੰਗ ਮੁਹਿੰਮ ਚਲਾਈ ਜਾ ਰਹੀ ਹੈ। ਪੁਲਿਸ ਨੇ ਸਾਥੀ ਮੁਲਜ਼ਮ ਦੇ ਮੋਬਾਈਲ ਦੀ ਲੋਕੇਸ਼ਨ ਤੇ ਉਸ ਦੀ ਕਾਲ ਡਿਟੇਲ ਕੱਢੀ ਹੈ। ਇਸ ਗੱਲ ਦਾ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਮੁਲਜ਼ਮ ਨੇ ਇਕੱਲੇ ਇਸ ਵਾਰਦਾਤ ਨੂੰ ਅੰਜਾਮ ਦਿੱਤਾ ਸੀ ਜਾਂ ਫਿਰ ਉਸ ਦੇ ਨਾਲ ਕੋਈ ਹੋਰ ਵੀ ਸ਼ਾਮਲ ਸੀ
ਜ਼ਹਿਰੀਲਾ ਪਦਾਰਥ ਖਵਾਉਣ ਤੋਂ ਬਾਅਦ ਸਾੜੀਆਂ ਸੀ ਲਾਸ਼ਾਂ
ਪੁਲਿਸ ਦੀ ਮੁਢਲੀ ਜਾਂਚ ‘ਚ ਇਹ ਸਾਹਮਣੇ ਆਇਆ ਹੈ ਕਿ ਵਿੱਦਿਆਨੰਦ ਤੇ ਉਸ ਦਾ ਬੇਟਾ ਸ਼ੁਭਮ ਦਿੱਲੀ ‘ਚ ਮਜ਼ਦੂਰੀ ਕਰਦੇ ਸਨ। ਰਾਮਚੰਦਰ ਨੇ ਉਨ੍ਹਾਂ ਨੂੰ ਦਿੱਲੀ ਤੋਂ ਆਪਣੇ ਕੋਲ ਬੁਲਾਇਆ ਸੀ ਪਰ ਦੋਵਾਂ ਕੋਲ 45,000 ਰੁਪਏ ਦੇਖ ਕੇ ਰਾਮਚੰਦਰ ਦਾ ਈਮਾਨ ਡੋਲ ਗਿਆ ਤੇ ਪੈਸਿਆਂ ਦੇ ਲਾਲਚ ‘ਚ ਉਸ ਨੇ ਉਨ੍ਹਾਂ ਨੂੰ ਪਹਿਲਾਂ ਜ਼ਹਿਰੀਲੀ ਚੀਜ਼ ਖਵਾਈ ਤੇ ਫਿਰ ਲਾਸ਼ਾਂ ਸਾੜਨ ਤੋਂ ਬਾਅਦ ਖੁਹ ‘ਚ ਸੁੱਟ ਦਿੱਤੀਆਂ। ਉਹ 45000 ਰੁਪਏ ਤੇ ਉਨ੍ਹਾਂ ਦਾ ਮੋਬਾਈਲ ਲੈ ਕੇ ਫਰਾਰ ਹੋ ਗਿਆ।
12 ਦਿਨਾਂ ਬਾਅਦ ਖੂਹ ‘ਚੋਂ ਬਰਾਮਦ ਹੋਈਆਂ ਲਾਸ਼ਾਂ
ਪੁਲਿਸ ਨੇ ਮ੍ਰਿਤਕਾਂ ਦੀਆਂ ਲਾਸ਼ਾਂ ਐਤਵਾਰ ਨੂੰ ਨੂਰਮਹਿਲ ਥਾਣਾ ਹਲਕੇ ਦੀ ਸਰਹੱਦ ਕਲਾ ਪਿੰਡ ਦੇ ਇਕ ਖੂਹ ‘ਚੋਂ ਬਰਾਮਦ ਕੀਤੀਆਂ ਸਨ। ਬੁਰੇ ਤਰੀਕੇ ਨਾਲ ਸੜੀ ਹੋਈ ਹਾਲਤ ‘ਚ ਉਨ੍ਹਾਂ ਦੀ ਪਛਾਣ ਕਰਨਾ ਵੀ ਮੁਸ਼ਕਲ ਹੋ ਰਿਹਾ ਸੀ। ਪੁੱਛਗਿੱਛ ਵਿਚ ਮੁਲਜ਼ਮ ਰਾਮਚੰਦਰ ਦੀ ਪਤਨੀ ਨੇ ਦੱਸਿਆ ਕਿ ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਦੋਵਾਂ ਦੀ ਹੱਤਿਆ ਕਰ ਕੇ ਲਾਸ਼ਾਂ ਖੂਹ ‘ਚ ਸੁੱਟੀਆਂ ਗਈਆਂ ਹਨ।
ਪੂਰਨੀਆ ‘ਚ ਲਾਪਤਾ ਹੋਣ ਦਾ ਕੇਸ ਦਰਜ ਹੋਣ ਤੋਂ ਬਾਅਦ ਹੋਇਆ ਖੁਲਾਸਾ
ਬਿਹਾਰ ਦੇ ਪੂਰਨੀਆ ਜ਼ਿਲ੍ਹੇ ਦੇ ਰਹਿਣ ਵਾਲੇ ਵਿੱਦਿਆਨੰਦ ਤੇ ਸ਼ੁਭਮ ਦੀ ਗੁੰਮਸ਼ੁਦਗੀ ਦੀ ਰਿਪੋਰਟ ਉਨ੍ਹਾਂ ਦੇ ਪਰਿਵਾਰ ਵਾਲਿਆਂ ਨੇ ਬਿਹਾਰ ਦੇ ਪੂਰਨੀਆ ਥਾਣੇ ‘ਚ ਦਰਜ ਕਰਵਾਈ ਸੀ। ਮਾਮਲੇ ਦੀ ਜਾਂਚ ਲਈ ਪੂਰਨੀਆ ਪੁਲਿਸ ਨੇ ਜਲੰਧਰ ਪੁਲਿਸ ਨਾਲ ਸੰਪਰਕ ਕੀਤਾ ਸੀ। ਮਾਮਲੇ ਦੀ ਜਾਣਕਾਰੀ ਦਿੰਦੇ ਹੋਏ ਐੱਸਐੱਸਪੀ ਨਵੀਨ ਸਿੰਗਲਾ (SSP Naveen Singla) ਨੇ ਦੱਸਿਆ ਕਿ ਉੱਥੇ ਦਰਜ ਰਿਪੋਰਟ ਅਨੁਸਾਰ ਮ੍ਰਿਤਕਾਂ ਦੇ ਪਰਿਵਾਰਕ ਮੈਂਬਰਾਂ ਨੇ ਕਿਹਾ ਸੀ ਕਿ ਉਹ ਦਿੱਲੀ ਤੋਂ ਜਲੰਧਰ ਜਾ ਰਹੇ ਸਨ ਪਰ ਉਹ ਨਾ ਤਾਂ ਜਲੰਧਰ ਪੁੱਜੇ ਤੇ ਨਾ ਹੀ ਦਿੱਲੀ ਜਾਂ ਪੂਰਨੀਆ ਵਾਪਸ ਗਏ। ਇਸ ਤੋਂ ਬਾਅਦ ਮਾਮਲੇ ਦੀ ਜਾਂਚ ਕਰਦੇ ਹੋਏ ਪੁਲਿਸ ਨੇ ਦੋਵਾਂ ਦੀਆਂ ਹੀ ਲਾਸ਼ਾਂ ਸਰਹੱਦੀ ਕਲਾਂ ਪਿੰਡ ਦੇ ਇਕ ਖੂਹ ‘ਚੋਂ ਬਰਾਮਦ ਕਰ ਲਈਆਂ।
