ਪਠਾਨਕੋਟ : Army Helicopter Crashes: ਪੰਜਾਬ ਦੇ ਪਾਕਿਸਤਾਨ ਸਰਹੱਦ ਨੇੜੇ ਪਠਾਨਕੋਟ ਜ਼ਿਲ੍ਹੇ ’ਚ ਮੰਗਲਵਾਰ ਸਵੇਰੇ ਇਕ ਹੈਲੀਕਾਪਟਰ ਕ੍ਰੈਸ਼ ਹੋ ਗਿਆ। ਹੈਲੀਕਾਪਟਰ ਗੋਤੇ ਖਾਂਦੇ ਹੋਏ ਸਿੱਧਾ ਰਣਜੀਤ ਸਾਗਰ ਡੈਮ ’ਚ ਡਿੱਗ ਗਿਆ। ਇਸ ਹੈਲੀਕਾਪਟਰ ‘ਚ ਪਾਇਲਟ ਸਮੇਤ ਤਿੰਨ ਜਵਾਨ ਮੌਜੂਦ ਸਨ, ਜੋ ਲਾਪਤਾ ਹੋ ਗਏ ਹਨ। ਹੈਲੀਕਾਪਟਰ ਦਾ ਕੁਝ ਮਲਬਾ ਪਾਣੀ ‘ਚ ਤੈਰਦਾ ਨਜ਼ਰ ਆਇਆ, ਪਰ ਪਾਇਲਟ ਤੇ ਜਵਾਨਾਂ ਦਾ ਕੁਝ ਪਤਾ ਨਹੀਂ ਚੱਲ ਪਾਇਆ। ਪੁਲਿਸ ਤੇ ਪ੍ਰਸ਼ਾਸਨਿਕ ਅਮਲਾ ਮੌਕੇ ’ਤੇ ਪਹੁੰਚ ਗਿਆ ਹੈ। ਸੈਨਾ ਦਾ ਜਵਾਨ ਵੀ ਮੌਕੇ ’ਤੇ ਪਹੁੰਚ ਗਏ ਹਨ। ਰਾਹਤ ਤੇ ਬਚਾਅ ਕਾਰਜ ਜਾਰੀ ਹੈ।
ਹੈਲੀਕਾਪਟਰ ਹਾਦਸਾ ਮੰਗਲਵਾਰ ਸਵੇਰੇ ਲਗਪਗ 10 ਵਜ ਕੇ 20 ਮਿੰਟ ’ਤੇ ਹੋਇਆ। ਫ਼ੌਜ ਦੇ ਏਵਨ ਸਕਵਾਡ੍ਰਨ ਦੇ ਹੈਲੀਕਾਪਟਰ ਨੇ ਮਾਮੂਨ ਕੈਂਟ ਤੋਂ ਉਡਾਣ ਭਰੀ ਸੀ। ਹੈਲੀਕਾਪਟਰ ਰਣਜੀਤ ਸਾਗਰ ਡੈਮ ਦੇ ਕਾਫੀ ਨੇੜੇ ਸੀ। ਇਸੀ ਦੌਰਾਨ ਇਹ ਪਹਾੜੀ ਨਾਲ ਟਕਰਾ ਗਿਆ ਅਤੇ ਸਿੱਧਾ ਡੈਮ ’ਚ ਜਾ ਸਮਾਇਆ। NDRF ਵੀ ਮੌਕੇ ’ਤੇ ਪਹੁੰਚ ਚੁੱਕੀ ਹੈ। ਹੈਲੀਕਾਪਟਰ ਨੂੰ ਕੱਢਣ ਦਾ ਯਤਨ ਜਾਰੀ ਹੈ। ਪਾਇਲਟ ਦਾ ਪਤਾ ਲਗਾਇਆ ਜਾ ਰਿਹਾ ਹੈ। ਫ਼ੌਜ ਦੇ ਸੂਤਰਾਂ ਅਨੁਸਾਰ ਹਾਲੇ ਉਨ੍ਹਾਂ ਦਾ ਧਿਆਨ ਰਾਹਤ ਤੇ ਬਚਾਅ ਕਾਰਜ ’ਤੇ ਹੈ। ਹਾਦਸਾ ਕਿਵੇਂ ਅਤੇ ਕਿਉਂ ਹੋਇਆ, ਇਸਦੀ ਪੜਤਾਲ ਬਾਅਦ ’ਚ ਕੀਤੀ ਜਾਵੇਗੀ।
ਦੱਸ ਦੇਈਏ, ਪੰਜਾਬ ’ਚ ਇਸੀ ਸਾਲ ਮਈ ਮਹੀਨੇ ’ਚ ਵੀ ਭਾਰਤੀ ਹਵਾਈ ਫ਼ੌਜ ਦਾ MIG-21 ਕ੍ਰੈਸ਼ ਹੋ ਗਿਆ ਸੀ। ਇਸ ’ਚ ਪਾਇਲਟ ਦੀ ਮੌਤ ਹੋ ਗਈ ਸੀ। ਇਹ ਹਾਦਸਾ ਮੋਗਾ ਸ਼ਹਿਰ ਤੋਂ ਕਰੀਬ 28 ਕਿਲੋਮੀਟਰ ਦੂਰ ਬਾਘਾਪੁਰਾਣਾ ਤੋਂ ਮੁੱਦਕੀ ਰੋਡ ਸਥਿਤ ਪਿੰਡ ਲੰਗੇਆਣਾ ਨਵਾਂ ਨੇੜੇ ਹੋਇਆ ਸੀ। ਜਹਾਜ਼ ਅੱਧੀ ਰਾਤ ਨੂੰ ਖਾਲੀ ਪਏ ਪਲਾਂਟ ’ਚ ਡਿੱਗ ਗਿਆ ਸੀ। ਜਹਾਜ਼ ਦੇ ਡਿੱਗਦਿਆਂ ਹੀ ਚਾਰੋਂ ਪਾਸੇ ਅੱਗ ਹੀ ਅੱਗ ਫੈਲ ਗਈ। ਇਹ ਜਹਾਜ਼ ਨਿਯਮਿਤ ਸਿਖਲਾਈ ਲਈ ਉਡਾਣ ’ਤੇ ਸੀ। ਜਹਾਜ਼ ਦੇ ਪਾਇਲਟ ਨੇ ਪੈਰਾਸ਼ੂਟ ਰਾਹੀਂ ਕੁੱਦ ਕੇ ਆਪਣੀ ਜਾਨ ਬਚਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਛਲਾਂਗ ਲਗਾਉਂਦੇ ਸਮੇਂ ਜਹਾਜ਼ ਦੇ ਕਿਸੇ ਭਾਰੀ ਉਪਕਰਣ ਨਾਲ ਟਕਰਾਉਣ ਕਾਰਨ ਪਾਇਲਟ ਦੀ ਮੌਤ ਹੋ ਗਈ ਸੀ। ਇਸਤੋਂ ਪਹਿਲਾਂ ਨਵਾਂਸ਼ਹਿਰ ’ਚ ਵੀ ਇਕ ਫ਼ੌਜ ਦਾ ਜਹਾਜ਼ ਦੁਰਘਟਨਾਗ੍ਰਸਤ ਹੋਇਆ ਸੀ। ਹਾਲਾਂਕਿ ਇਸ ’ਚ ਸਾਰੇ ਲੋਕ ਬਚ ਗਏ ਸਨ।
