ਪੁਲਿਸ ਨੇ ਨਿਹੰਗ ਦਾ ਕਾਤਲ ਕੀਤਾ ਕਾਬੂ, 500 ਰੁਪਏ ਲੈਣ ਖ਼ਾਤਰ ਖੰਜਰ ਮਾਰ ਕੇ ਕੀਤਾ ਸੀ ਕਤਲ

ਫ਼ਤਹਿਗੜ੍ਹ ਸਾਹਿਬ : ਪੁਲਿਸ ਨੇ 20 ਅਗਸਤ ਨੂੰ ਨਿਹੰਗ ਦਾ ਕਤਲ ਕਰਨ ਵਾਲੇ ਨਿਹੰਗ ਨੂੰ ਗ੍ਰਿਫ਼ਤਾਰ ਕਰਨ ਦਾ ਦਾਅਵਾ ਕੀਤਾ ਹੈ। ਗ੍ਰਿਫ਼ਤਾਰ ਕੀਤੇ ਵਿਅਕਤੀ ਦੀ ਪਛਾਣ ਰਾਮ ਸਿੰਘ ਵਾਸੀ ਜਗਤਗੜ੍ਹ (ਮਾਨਸਾ) ਵਜੋਂ ਹੋਈ ਹੈ। ਥਾਣਾ ਮੁਖੀ ਫ਼ਤਹਿਗੜ੍ਹ ਸਾਹਿਬ ਮਹਿਮਾ ਸਿੰਘ ਨੇ ਦੱਸਿਆ ਕਿ ਉਕਤ ਵਿਅਕਤੀ ਨੇ 20 ਅਗਸਤ ਨੂੰ ਐੱਸਡੀਐੱਮ ਦਫਤਰ ਦੇ ਬਾਹਰ ਬਾਅਦ ਦੁਪਿਹਰ ਕਰੀਬ 2:30 ਵਜੇ ਮ੍ਰਿਤਕ ਬਾਗੀ ਸਿੰਘ ਦੀ ਛਾਤੀ ’ਚ ਖੰਜਰ ਮਾਰ ਕੇ ਕਤਲ ਕਰ ਦਿੱਤਾ ਸੀ।

ਉਨ੍ਹਾਂ ਦੱਸਿਆ ਕਿ ਰਾਮ ਸਿੰਘ ਨੇ ਮ੍ਰਿਤਕ ਤੋਂ 500 ਰੁਪਏ ਲੈਣੇ ਸਨ ਪਰ ਉਸ ਵਲੋਂ ਇਨਕਾਰ ਕਰਨ ’ਤੇ ਉਹ ਉਸ ਦਾ ਕਤਲ ਕਰ ਕੇ ਆਟੋ ’ਚ ਬੈਠ ਕੇ ਫਰਾਰ ਹੋ ਗਿਆ ਸੀ ਜਿਸ ਨੂੰ ਏਐੱਸਆਈ ਪਰਜਿੰਦਰ ਸਿੰਘ ਨੇ ਗੁਰਦੁਆਰਾ ਸ੍ਰੀ ਫ਼ਤਹਿਗੜ੍ਹ ਸਾਹਿਬ ਨੇੜਿਓਂ ਗ੍ਰਿਫਤਾਰ ਕਰਕੇ ਅਦਾਲਤ ’ਚ ਪੇਸ਼ ਕਰ ਕੇ ਉਸ ਵਲੋਂ ਵਰਤਿਆ ਖੰਜਰ ਬਰਾਮਦ ਕਰਨ ਅਤੇ ਉਸ ਦੇ ਸਹਿ ਸਾਥੀਆਂ ਦੀ ਗ੍ਰਿਫਤਾਰੀ ਲਈ ਦਾ 31 ਅਗਸਤ ਤਕ ਪੁਲਿਸ ਰਿਮਾਂਡ ਹਾਸਲ ਕੀਤਾ ਹੈ।