ਬੇਕਾਬੂ ਹੋਈ ਕਾਰ ਦੁਕਾਨ ‘ਚ ਵੜੀ, ਤਿੰਨ ਸਾਲਾ ਮਾਸੂਮ ਦੀ ਮੌਤ, ਤਿੰਨ ਜਣੇ ਜ਼ਖ਼ਮੀ

ਸ੍ਰੀ ਮਾਛੀਵਾੜਾ ਸਾਹਿਬ : ਦੇਰ ਰਾਤ ਕਰੀਬ 9.30 ਵਜੇ ਸ਼ਹਿਰ ਦੇ ਦੁਸਹਿਰਾ ਮੈਦਾਨ ਦੇ ਨੇੜੇ ਚੌਕ ‘ਚ ਬੇਕਾਬੂ ਹੋਈ ਕਾਰ ਸਿੱਧੀ ਦੁਕਾਨ ‘ਚ ਜਾ ਵੜੀ ਜਿਸ ਨਾਲ ਚਾਰ ਲੋਕ ਗੰਭੀਰ ਜ਼ਖ਼ਮੀ ਹੋ ਗਏ। ਹਸਪਤਾਲ ਲੈ ਜਾਂਦੇ ਹੋਏ ਜ਼ਖਮੀਆਂ ‘ਚੋਂ ਤਿੰਨ ਸਾਲਾ ਮਾਸੂਮ ਬੱਚੀ ਦੀ ਮੌਤ ਹੋ ਗਈ। ਜਾਣਕਾਰੀ ਮੁਤਾਬਿਕ ਬੱਸ ਅੱਡੇ ਦੇ ਨੇੜੇ ਵਾਲੇ ਇਸ ਚੌਕ ‘ਚ ਰਾਤ ਵੇਲੇ ਦੁਕਾਨ ‘ਚ ਅਚਾਨਕ ਇੱਕ ਬੇਕਾਬੂੂ ਕਾਰ ਆ ਵੜੀ ਜਿਸ ਨਾਲ ਦੋ ਬੱਚਿਆਂ ਸਮੇਤ ਚਾਰ ਲੋਕ ਜ਼ਖ਼ਮੀ ਹੋ ਗਏ।

ਜ਼ਖ਼ਮੀਆਂ ‘ਚ ਤਿੰਨ ਸਾਲਾ ਸਿ੍ਸ਼ਟੀ, ਅੱਠ ਸਾਲਾ ਅਦਿਤੀ, 26 ਸਾਲਾ ਜੋਗੀਰਾਜ ਤੇ 20 ਸਾਲਾ ਗੋਰਵ ਕੁਮਾਰ ਸਾਮਿਲ ਹਨ। ਚਾਰੇ ਜ਼ਖ਼ਮੀਆਂ ਨੂੰ ਹਸਪਤਾਲ ਲੈ ਜਾਇਆ ਗਿਆ। ਜੋਗੀਰਾਜ ਨੂੰ ਲੁਧਿਆਣਾ ਵਿਖੇ ਰੈਫਰ ਕਰ ਦਿੱਤਾ ਗਿਆ ਤੇ ਤਿੰਨ ਸਾਲਾ ਸਿ੍ਸ਼ਟੀ ਨੇ ਦਮ ਤੋੜ ਦਿੱਤਾ। ਮੌਕੇ ‘ਤੇ ਮੌਜੂਦ ਲੋਕਾਂ ਨੇ ਦੱਸਿਆ ਕਿ ਮਿ੍ਤਕ ਬੱਚੀ ਨੂੰ ਘਟਨਾ ਵਾਲੀ ਥਾਂ ‘ਤੇ ਗੱਡੀ ਦੇ ਟਾਇਰ ਦੇ ਥੱਲੀਓਂ ਗੰਭੀਰ ਹਾਲਤ ‘ਚ ਕੱਢਿਆ ਗਿਆ ਸੀ।

ਐਂਬੂਲੈਂਸ ਸਮੇਂ ‘ਤੇ ਆਉਦੀ ਤਾਂ ਬੱਚ ਜਾਂਦੀ ਬੱਚੀ, ਲੋਕ ਵੀਡੀਉ ਬਣਾਉਣ ‘ਚ ਮਸਤ 

ਕੱਲ੍ਹ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੀ ਆਮਦ ਨੂੰ ਲੈ ਕੇ ਸਾਰੇ ਇਲਾਕੇ ‘ਚ ਪੁਲਿਸ ਤੇ ਪ੍ਰਸ਼ਾਸਨ ਪੂਰੀ ਤਰ੍ਹਾਂ ਮੁਸਤੈਦ ਸੀ ਜਿਸ ਕਾਰਨ ਇਸ ਘਟਨਾ ਤੋਂ ਬਾਅਦ ਇੱਕ ਘੰਟੇ ਤੋਂ ਜ਼ਿਆਦਾ ਸਮੇਂ ਤੱਕ ਐਂਬੂਲੈਂਸ ਦਾ ਨਾ ਪਹੁੰਚਣਾ ਕਈ ਸਵਾਲ ਖੜ੍ਹੇ ਕਰ ਰਿਹਾ ਹੈ। ਲੋਕਾਂ ਨੇ ਦੱਸਿਆ ਕਿ ਵਾਰ ਵਾਰ 108 ਨੰਬਰ ਡਾਇਲ ਕਰਨ ਦੇ ਬਾਵਜੂਦ ਇੱਕ ਘੰਟੇ ਬਾਅਦ ਐਂਬੂਲੈਂਸ ਮੌਕੇ ‘ਤੇ ਪਹੁੰਚੀ ਪਰ ਉਸ ‘ਚ ਵੀ ਆਕਸੀਜਨ ਦਾ ਗੈਸ ਸਿਲੰਡਰ ਨਹੀਂ ਸੀ।

ਮਿ੍ਤਕ ਦੇ ਵਾਰਸਾਂ ਨੇ ਦੱਸਿਆ ਕਿ ਜੇਕਰ ਜਲਦੀ ਹੀ ਬੱਚੀ ਨੂੰ ਮੁੱਢਲਾ ਇਲਾਜ ਮਿਲ ਜਾਂਦਾ ਤਾਂ ਬੱਚੀ ਸ਼ਾਇਦ ਬਚ ਜਾਂਦੀ। ਮੌਕੇ ਤੇ ਜ਼ਿਆਦਾਤਰ ਲੋਕ ਮੋਬਾਈਲ ਵੀਡੀਓ ਬਣਾਉਣ ‘ਚ ਲੱਗੇ ਰਹੇ। ਜ਼ਿਕਰਯੋਗ ਹੈ ਕਿ ਸ਼ਹਿਰ ਦਾ ਸਰਕਾਰੀ ਹਸਪਤਾਲ ਇਸ ਘਟਨਾ ਵਾਲੀ ਥਾਂ ਤੋਂ ਸਿਰਫ 700 ਮੀਟਰ ਦੀ ਦੂਰੀ ‘ਤੇ ਹੀ ਸਥਿਤ ਸੀ।