ਗਲ਼ੀ ‘ਚ ਖਿੱਲਰੀ ਬਜਰੀ ਕਾਰਨ ਗੁਆਂਢੀਆਂ ‘ਚ ਚੱਲੇ ਇੱਟਾਂ-ਰੋੜੇ, ਛਾਤੀ ‘ਚ ਇੱਟ ਵੱਜਣ ਨਾਲ 40 ਸਾਲਾ ਵਿਅਕਤੀ ਦੀ ਮੌਤ

ਮਮਦੋਟ : ਥਾਣਾ ਮਮਦੋਟ ਦੇ ਪਿੰਡ ਕੰਧਾਂ ਵੱਲੀਆਂ ਦੇ ਵਿੱਚ ਬਣ ਰਹੀ ਨਵੀਂ ਸੜਕ ਤੋਂ ਪੈਦਾ ਹੋਏ ਝਗੜੇ ਨੇ ਇਕ ਵਿਅਕਤੀ ਦੀ ਜਾਨ ਲੈ ਲਈ। ਜਾਣਕਾਰੀ ਦਿੰਦੇ ਹੋਏ ਮ੍ਰਿਤਕ ਵਿਅਕਤੀ ਦੇ ਭਰਾ ਸੁਰਜੀਤ ਸਿੰਘ ਨੇ ਦੱਸਿਆ ਕਿ ਸੋਮਵਾਰ ਦੁਪਹਿਰੇ ਕਰੀਬ ਤਿੰਨ ਵਜੇ ਘਰ ਦੇ ਅੱਗੋਂ ਨਵੀਂ ਸੜਕ ਬਣ ਰਹੀ ਸੀ ਕਿ ਬਜਰੀ ਖਿੱਲਰੀ ਹੋਣ ਕਰਕੇ ਗੁਆਂਢ ‘ਚ ਰਹਿਣ ਵਾਲੇ ਰਾਜੂ ਤੇ ਉਸ ਦੇ ਪਰਿਵਾਰ ਵਿਚਕਾਰ ਝਗੜਾ ਹੋ ਗਿਆ। ਇਸ ਦੌਰਾਨ ਇੱਟਾਂ-ਵੱਟੇ ਤੇ ਰੋੜੇ ਚੱਲ ਪਏ। ਝਗੜੇ ਦੌਰਾਨ ਉਸ ਦੇ ਛੋਟੇ ਭਰਾ ਗੁਰਮੀਤ ਸਿੰਘ (40) ਦੀ ਛਾਤੀ ‘ਚ ਇੱਟ ਵੱਜਣ ਨਾਲ ਉਹ ਗੰਭੀਰ ਜ਼ਖ਼ਮੀ ਹੋ ਗਿਆ ਜਿਸ ਨੂੰ ਮਮਦੋਟ ਦੇ ਸਿਵਲ ਹਸਪਤਾਲ ਵਿਚ ਲਿਆਂਦਾ ਗਿਆ ਤੇ ਫਿਰੋਜ਼ਪੁਰ ਰੈਫਰ ਕਰਨ ਤੋਂ ਬਾਅਦ ਹਾਲਤ ਗੰਭੀਰ ਵੇਖਦੇ ਹੋਏ ਫ਼ਰੀਦਕੋਟ ਭੇਜ ਦਿੱਤਾ ਗਿਆ। ਜ਼ੇਰੇ ਇਲਾਜ ਗੁਰਮੀਤ ਸਿੰਘ ਦੀ ਅੱਜ ਸਵੇਰੇ ਤੜਕੇ ਚਾਰ ਵਜੇ ਮੌਤ ਹੋ ਗਈ ਹੈ। ਓਧਰ ਥਾਣਾ ਮੁਖੀ ਇੰਸਪੈਕਟਰ ਗੁਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਸੂਚਨਾ ਮਿਲਦਿਆਂ ਹੀ ਤੁਰੰਤ ਕਾਰਵਾਈ ਸ਼ੁਰੂ ਕੀਤੀ ਜਾ ਰਹੀ ਹੈ।