ਕੋਲੇ ਦਾ ਸੰਕਟ ਵਧਿਆ : ਅਗਲੇ ਚਾਰ ਦਿਨ ਪੰਜਾਬ ਨੂੰ ਨਹੀਂ ਮਿਲੇਗਾ ਕੋਲਾ, ਥਰਮਲ ਠੰਡੇ ਹੋਣ ਦਾ ਖਦਸ਼ਾ

ਪਟਿਆਲਾ : ਪੰਜਾਬ ‘ਚ ਕੋਲੇ ਦਾ ਸੰਕਟ ਹੋਰ ਵਧਣ ਲੱਗਿਆ ਹੈ। ਅਗਲੇ ਦਿਨਾਂ ‘ਚ ਕੋਲਾ ਨਾ ਮਿਲਣ ਦੀ ਸੂਰਤ ‘ਚ ਸੂਬੇ ਦੇ ਥਰਮਲ ਠੰਡੇ ਹੋਣ ਦਾ ਖਦਸ਼ਾ ਜਤਾਇਆ ਜਾ ਰਿਹਾ ਹੈ। ਇਸ ਸਮੇਂ ਪੰਜਾਬ ਦੇ ਥਰਮਲਾਂ ਕੋਲ ਤਿੰਨ ਤੋਂ 14 ਦਿਨ ਤਕ ਦਾ ਕੋਲਾ ਉਪਲੱਬਧ ਹੈ ਜੋਕਿ 25 ਤੋਂ 30 ਦਿਨ ਤਕ ਦਾ ਹੋਣਾ ਚਾਹੀਦਾ ਹੈ। ਭਾਵੇਂ ਸ਼ੁੱਕਰਵਾਰ ਤਕ ਝਾਰਖੰਡ ਤੋਂ ਛੇ ਰੈਕ ਕੋਲਾ ਆਉਣਾ ਹੈ ਪਰ ਇਸ ਤੋਂ ਬਾਅਦ ਅਗਲੇ ਚਾਰ ਦਿਨਾਂ ਲਈ ਹੋਰ ਕੋਲੇ ਆਉਣ ਦੀ ਕੋਈ ਸੰਭਾਵਨਾ ਨਹੀਂ ਹੈ। ਕੋਲੇ ਦੀ ਸਥਿਤੀ ਸਬੰਧੀ ਪੀਐੱਸਪੀਸੀਐੱਲ ਦੇ ਡਾਇਰੈਕਟਰ (ਜਨਰੇਸ਼ਨ) ਪਰਮਜੀਤ ਸਿੰਘ ਦਾ ਕਹਿਣਾ ਹੈ ਕਿ ਫਿਲਹਾਲ ਥਰਮਲਾਂ ‘ਚ ਕੋਲਾ ਹੈ ਤੇ ਅਗਲੀ ਸਥਿਤੀ ਲਈ ਕੇਂਦਰ ਸਰਕਾਰ ਦੇ ਪੱਧਰ ‘ਤੇ ਗੱਲਬਾਤ ਚੱਲ ਰਹੀ ਹੈ।

ਜਾਣਕਾਰੀ ਅਨੁਸਾਰ ਪੰਜਾਬ ‘ਚ ਸਥਿਤ ਗੋਇੰਦਵਾਲ ਥਰਮਲ ਪਲਾਂਟ ਕੋਲ ਸਭ ਤੋਂ ਘੱਟ ਸਿਰਫ ਤਿੰਨ ਦਿਨ ਦਾ 5.9 ਟਨ ਕੋਲਾ ਬਚਿਆ ਹੈ। ਇਸ ਤੋਂ ਇਲਾਵਾ ਲਹਿਰਾ ਮੁਹਬਤ ਕੋਲ 8.59 ਟਨ 10 ਦਿਨ, ਰਾਜਪੁਰਾ ਪਲਾਂਟ ਕੋਲ 19.7 ਟਨ 11 ਦਿਨ, ਰੋਪੜ ਕੋਲ 7.76 ਟਨ 14 ਦਿਨ ਅਤੇ ਤਵਲੰਡੀ ਸਾਬੋ ਪਲਾਂਟ ਕੋਲ 18.2 ਟਨ 14 ਦਿਨ ਦਾ ਕੋਲਾ ਬਚਿਆ ਹੈ। ਆਮ ਦਿਨਾਂ ‘ਚ ਪੰਜਾਬ ਦੇ ਥਰਮਲਾਂ ‘ਚ ਰੋਜਾਨਾ 12 ਤੋਂ 15 ਰੈਕ ਕੋਲਾ ਪੁੱਜਦਾ ਹੈ ਪਰ ਸ਼ੁਕਰਵਾਰ ਪੰਜਾਬ ਨੂੰ ਇਸ ਤੋਂ ਅੱਧਾ ਸਿਰਫ ਛੇ ਰੈਕ ਕੋਲਾ ਮਿਲਣ ਜਾ ਰਿਹਾ ਹੈ। ਇਕ ਰੈਕ ‘ਚ ਕਰੀਬ 3400 ਮੀਟ੍ਰਿਕ ਟਨ ਕੋਲਾ ਹੁੰਦਾ ਹੈ ਤੇ 6 ਰੈਕ ਵਿਚਲਾ 20 ਹਜ਼ਾਰ 400 ਮੀਟ੍ਰਿਕ ਟਨ ਕੋਲਾ ਪੰਜ ਥਰਮਲਾਂ ‘ਚ ਵੰਡਿਆ ਜਾਣਾ ਹੈ। ਸੂਤਰਾਂ ਅਨਸਾਰ ਵੀਰਵਾਰ ਦੇਰ ਸ਼ਾਮ ਤਕ ਅਗਲੇ ਚਾਰ ਦਿਨਾਂ ਤਕ ਪੰਜਾਬ ਨੂੰ ਕੋਲਾ ਮਿਲਣ ਦੀ ਕੋਈ ਜਾਣਕਾਰੀ ਨਹੀਂ ਹੈ। ਪਾਵਰ ਮਾਹਰਾਂ ਅਨੁਸਾਰ ਪੰਜਾਬ ਦੇ ਥਰਮਲਾਂ ‘ਚ ਕੋਲੇ ਦੀ ਸਥਿਤੀ ਚਿੰਤਾਜਨਕ ਹੈ। ਨਿੱਜੀ ਤੇ ਸਰਕਾਰੀ ਥਰਮਲਾਂ ਲਈ ਕੋਲਾ ਲਿੰਕੇਜ ਪੀਐੱਸਪੀਸੀਐੱਲ ਵਲੋਂ ਉਪਲੱਬਧ ਕਰਵਾਈ ਜਾਂਦੀ ਹੈ, ਅੱਜ ਆਰਡਰ ਕਰਨ ’ਤੇ ਥਰਮਲਾਂ ਤਕ ਸਟਾਕ ਪੁੱਜਣ ਲਈ ਤਿੰਨ ਤੋਂ ਸੱਤ ਦਿਨ ਦਾ ਸਮਾਂ ਲੱਗਦਾ ਹੈ। ਜੇਕਰ ਅਗਲੇ ਚਾਰ ਦਿਨ ਤਕ ਕੋਲਾ ਨਹੀਂ ਪੁੱਜਦਾ ਤਾਂ ਲਗਪਗ 9 ਦਿਨ ਤਕ ਹੋਰ ਕੋਲੇ ਦੀ ਉਡੀਕ ਕਰਨੀ ਪਵੇਗੀ ਤੇ ਇਸ ਦਾ ਸਿੱਧਾ ਅਸਰ ਥਰਮਲ ਦੀ ਬਿਜਲੀ ਪੈਦਾਵਾਰ ’ਤੇ ਪੈਣਾ ਸੰਭਾਵੀ ਹੈ।