ਗੱਡੀ ’ਤੇ ਫਾਇਰਿੰਗ ਕਰਨ ਦੇ ਦੋਸ਼ ’ਚ ਚੰਡੀਗੜ੍ਹ ਪੁਲਿਸ ਦਾ ਸਿਪਾਹੀ ਗ੍ਰਿਫ਼ਤਾਰ

ਮੋਹਾਲੀ : ਨਵਾਂ ਗਰਾਓਂ ਪੁਲਿਸ ਨੇ ਚੰਡੀਗੜ੍ਹ ਪੁਲਿਸ ’ਚ ਬਤੌਰ ਸਿਪਾਹੀ ਸਿਕੰਦਰ ਖ਼ਿਲਾਫ਼ ਆਈਪੀਸੀ ਦੀ ਧਾਰਾ-336,427 ਤੇ ਆਰਮਜ਼ ਐਕਟ ਦੀਆਂ ਧਾਰਾਵਾਂ 25,27,54,59 ਤਹਿਤ ਕੇਸ ਦਰਜ ਕੀਤਾ ਹੈ। ਮਾਮਲਾ ਸ਼ਿਵਾਲਿਕ ਵਿਹਾਰ ਨਵਾਂ ਗਰਾਓਂ ਦਾ ਹੈ ਜਿਸ ਬਾਰੇ ਪੁਲਿਸ ਨੂੰ ਸੁਮਿਤ ਵਾਸੀ ਪਾਣੀਪਤ ਹਰਿਆਣਾਂ ਨੇ ਸ਼ਿਕਾਇਤ ਦਿੱਤੀ ਸੀ। ਆਪਣੇ ਬਿਆਨਾਂ ’ਚ ਸੁਮਿਤ ਨੇ ਦੱਸਿਆ ਕਿ ਉਹ ਆਪਣੇ ਦੋਸਤ ਸਿਕੰਦਰ ਨੂੰ ਮਿਲਣ ਲਈ ਉਸ ਦੇ ਘਰ ਨਵਾਂ ਗਰਾਓਂ ਵਿਖੇ ਆਇਆ ਹੋਇਆ ਸੀ ਤੇ ਸਿਕੰਦਰ ਨੇ ਉਸ ਨਾਲ ਬਹਿਸ ਕਰਨੀ ਸ਼ੁਰੂ ਕਰ ਦਿੱਤੀ। ਇਸ ਦੌਰਾਨ ਉਹ ਸਿਕੰਦਰ ਦੀ ਕਾਰ ਮੰਗ ਕੇ ਲੋਕਲ ਕਿਸੇ ਕੰਮ ਲਈ ਚਲਾ ਗਿਆ, ਜਿਸ ਤੋਂ ਬਾਅਦ ਉਸ ਦਾ ਫ਼ੋਨ ਆ ਗਿਆ ਕਿ,‘ਮੇਰੀ ਕਾਰ ਲੈਕੇ ਜਲਦੀ ਵਾਪਿਸ ਪਰਤ ਨਹੀਂ ਤਾਂ ਤੇਰੀ ਕਾਰ(ਸੁਮਿਤ ਦੀ ਕਾਰ ਜੋ ਸਿਕੰਦਰ ਕੇ ਘਰ ਦੀ ਗਲ਼ੀ ’ਚ ਖੜ੍ਹਾਈ ਹੋਈ ਸੀ) ਦਾ ਹਾਲ ਦੇਖ ਲਿਓ।’ ਸੁਮਿਤ ਨੇ ਆਪਣੀ ਸ਼ਿਕਾਇਤ ’ਚ ਦੱਸਿਆ ਹੈ ਕਿ ਜਦੋਂ ਉਹ ਵਪਿਸ ਪਰਤਿਆਂ ਤਾਂ ਉਸ ਦੀ ਸਵਿੱਫ਼ਟ ਕਾਰ ਦੀ ਡਿੱਗੀ ਵਾਲੇ ਸ਼ੀਸ਼ੇ ’ਤੇ ਗੋਲ਼ੀਬਾਰੀ ਦੇ ਨਿਸ਼ਾਨ ਸਨ ਤੇ ਫ਼ਾਇਰ ਅਗਲੇ ਸ਼ੀਸ਼ੇ ’ਚੋਂ ਨਿਕਲਿਆ ਹੋਇਆ ਸੀ। ਇਸ ਮਾਮਲੇ ’ਤੇ ਉਸ ਨੇ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਜਿਸ ਤੋਂ ਬਾਅਦ ਕੇਸ ਦਰਜ ਕਰਕੇ ਮੁਲਜ਼ਮ ਸਿਕੰਦਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।