ਜਲੰਧਰ : ਥਾਣਾ ਸਿਟੀ ਨਕੋਦਰ ‘ਚ ਇਕ ਔਰਤ ਨੂੰ 10 ਹਜ਼ਾਰ ਰੁਪਏ ਦਾ ਸਰਕਾਰੀ ਲੋਨ ਦਿਵਾਉਣ ਦੇ ਨਾਂ ‘ਤੇ ਬਾਈਕ ਏਜੰਸੀ ਦੇ ਮੈਨੇਜਰ ਨੇ ਤਿੰਨ ਸਾਥੀਆਂ ਨਾਲ ਮਿਲ ਕੇ ਉਸ ਦੇ ਨਾਂ ‘ਤੇ 3 ਐਕਟਿਵਾ ਫਾਈਨਾਂਸ ਕਰਵਾ ਲਈ। ਜਦੋਂ ਔਰਤ ਨੂੰ ਇਸ ਦੀ ਜਾਣਕਾਰੀ ਹੋਈ ਤਾਂ ਮੈਨੇਜਰ ਨੇ ਉਸ ਨੂੰ ਕਿਹਾ ਕਿ ਆਪਣਾ ਘਰ ਤੇ ਨੰਬਰ ਬਦਲ ਲਓ। ਇਸ ਤੋਂ ਬਾਅਦ ਪੀੜਤ ਨੇ ਮਾਮਲੇ ਦੀ ਸ਼ਿਕਾਇਤ ਪੁਲਿਸ ਨੂੰ ਕੀਤੀ। ਸ਼ਿਕਾਇਤ ਦੀ ਜਾਂਚ ਤੋਂ ਬਾਅਦ ਪੁਲਿਸ ਨੇ ਬਾਈਕ ਏਜੰਸੀ ਦੇ ਮੈਨੇਜਰ ਸਮੇਤ ਚਾਰ ਖਿਲਾਫ਼ ਕੇਸ ਦਰਜ ਕਰ ਲਿਆ ਹੈ।
ਗੱਡੀ ਦੀ ਆਰਸੀ ਘਰ ਪਹੁੰਚਣ ‘ਤੇ ਲੱਗਿਆ ਪਤਾ
ਸੁੰਦਰ ਨਗਰ ਦੀ ਮੰਜੂ ਦੇਵੀ ਨੇ ਦੱਸਿਆ ਕਿ ਗੁਰੂ ਨਾਨਕਪੁਰਾ ਦੀ ਰਹਿਣ ਵਾਲੀ ਰਣਜੀਤ ਕੌਰ ਨਾਲ ਉਸ਼ ਦੀ ਪੁਰਾਣੀ ਜਾਣ-ਪਛਾਣ ਸੀ। ਕੋਰੋਨਾ ਕਾਲ ਦੌਰਾਨ ਜਦੋਂ ਉਸ ਨੂੰ ਪੈਸਿਆਂ ਦੀ ਲੋੜ ਪਈ ਤਾਂ ਉਸ ਨੇ ਰਣਜੀਤ ਕੌਰ ਨਾਲ ਸੰਪਰਕ ਕੀਤਾ। ਉਸ ਨੇ ਉਨ੍ਹਾਂ ਨੂੰ ਸਰਕਾਰੀ ਸਕੀਮ ਤਹਿਤ 10,000 ਰੁਪਏ ਦਾ ਕਰਜ਼ ਕਰਵਾਉਣ ਦੀ ਗੱਲ ਕਹੀ। ਅਗਲੇ ਦਿਨ ਰਣਜੀਤ ਕੌਰ ਨੇ ਕਿਹਾ ਕਿ ਕਰਜ਼ ਦਾ ਇੰਤਜ਼ਾਮ ਹੋ ਗਿਆ ਹੈ। ਇਸ ਦੇ ਲਈ ਆਧਾਰ ਕਾਰਡ ਰਾਹੀਂ ਜਨਧਨ ਖਾਤਾ ਖੁੱਲ੍ਹਵਾਉਣਾ ਪਵੇਗਾ।
ਅਨਪੜ੍ਹ ਹੋਣ ਦਾ ਚੁੱਕਿਆ ਫਾਇਦਾ
ਰਣਜੀਤ ਕੌਰ ਕੁਝ ਦਿਨਾਂ ਬਾਅਦ ਮੰਜੂ ਨੂੰ ਲੈ ਕੇ ਲਾਂਬੜਾ ਸਥਿਤ ਇਕ ਬੈਂਕ ਪਹੁੰਚੀ ਤੇ ਉਸ ਦਾ ਖਾਤਾ ਖੁੱਲ੍ਹਵਾ ਦਿੱਤਾ। ਉਸ ਦੇ ਅਨਪੜ੍ਹ ਹੋਣ ਦਾ ਫਾਇਦਾ ਚੁੱਕ ਕੇ ਮੁਲਜ਼ਮਾਂ ਨੇ ਉਸ ਤੋਂ ਚੈਕਬੁੱਕ ‘ਤੇ ਵੀ ਅੰਗੂਠਾ ਲਗਵਾ ਲਿਆ। ਇਸ ਤੋਂ ਬਾਅਦ ਉਹ ਉਨ੍ਹਾਂ ਨੂੰ ਲਾਂਬੜਾ ਸਥਿਤ ਹਾਂਡਾ ਏਜੰਸੀ ਲੈ ਗਏ। ਉੱਥੇ ਪਹਿਲਾਂ ਤੋਂ ਹੀ ਏਜੰਸੀ ਦਾ ਮੈਨੇਜਰ ਬਲਵਿੰਦਰ ਸਿੰਘ, ਫਾਇਨਾਂਸ ਮੁਲਾਜ਼ਮ ਰਾਹੁਲ ਗੁਗਲਾਨੀ ਤੇ ਸੰਨੀ ਖੜ੍ਹੇ ਸਨ। ਇਸ ਦੌਰਾਨ ਉਸ ਨੂੰ ਇਕ ਸਕੂਟੀ ਦੇ ਸਾਹਮਣੇ ਖੜ੍ਹਾ ਕੀਤਾ ਗਿਆ ਤੇ ਫੋਟੋ ਖਿੱਚੀ ਗਈ। ਵਿਰੋਧ ਕਰਨ ‘ਤੇ ਮੁਲਜ਼ਮਾਂ ਨੇ ਦੱਸਿਆ ਕਿ ਸਰਕਾਰੀ ਕਰਜ਼ ਲੈਣ ਲਈ ਅਜਿਹਾ ਕਰਨਾ ਜ਼ਰੂਰੀ ਹੈ। ਫੋਟੋ ਖਿਚਵਾਉਣ ਤੋਂ ਬਾਅਦ ਉਨ੍ਹਾਂ ਨੇ ਮੰਜੂ ਦੇਵੀ ਨੂੰ 4.5 ਹਜ਼ਾਰ ਰੁਪਏ ਦਿੱਤੇ। ਫਿਰ ਉਹ ਉਸ ਨੂੰ ਜਲੰਧਰ ਬੱਸ ਸਟੈਂਡ ਲੈ ਆਏ। ਇੱਥੇ ਇਕ ਹੋਰ ਸਕੂਟੀ ਸਾਹਮਣੇ ਖੜ੍ਹੇ ਕਰ ਕੇ ਫੋਟੋ ਖਿੱਚੀ ਤੇ 5 ਹਜ਼ਾਰ ਰੁਪਏ ਦੇ ਕੇ ਘਰ ਭੇਜ ਦਿੱਤਾ। ਇਸ ਦੌਰਾਨ ਮੁਲਜ਼ਮਾਂ ਨੇ ਉਸ ਤੋਂ ਜਬਰਨ ਅੰਗੂਠੇ ਵੀ ਲਗਵਾਏ। ਫਿਰ, ਉਸ ਦੇ ਮੋਬਾਈਲ ਦਾ ਸਿਮ ਮੁਲਜ਼ਮਾਂ ਕੱਢ ਲਿਆ ਤੇ ਉਸ ਨੂੰ ਇਕ ਹਫ਼ਤੇ ਬਾਅਦ ਦਿੱਤਾ।
ਕੁਝ ਦਿਨਾਂ ਬਾਅਦ ਮੰਜੂ ਦੇਵੀ ਦੇ ਘਰ ਕੋਰੀਅਰ ਰਾਹੀਂ ਐਕਟਿਵ ਦੇ ਤਿੰਨ ਰਜਿਸਟ੍ਰੇਸ਼ਨ ਸਰਟੀਫਿਕੇਟ ਪਹੁੰਚੇ। ਇਸ ਤੋਂ ਬਾਅਦ ਬੈਂਕ ਮੁਲਾਜ਼ਮ ਉਸ ਦੇ ਘਰ ਕਿਸ਼ਤ ਲੈਣ ਆਉਣ ਲੱਗੇ। ਜਦੋਂ ਉਨ੍ਹਾਂ ਨੇ ਰਣਜੀਤ ਕੌਰ ਨੂੰ ਇਸ ਬਾਰੇ ਪੁੱਛਿਆ ਤਾਂ ਉਸ ਨੇ ਕਿਹਾ ਕਿ ਆਫਣਾ ਸਿਮ ਕਾਰਡ ਕੱਢ ਕੇ ਸੁੱਟ ਦਿਉ ਤੇ ਕਿਤੇ ਹੋਰ ਜਾ ਕੇ ਰਹੋ। ਮੁਲਜ਼ਮਾਂ ਨੇ ਉਸ ਦੇ ਬੇਟੇ ਪੰਕਜ ਨੂੰ ਘਰੋਂ ਬਾਹਰ ਬੁਲਾ ਕੇ ਆਰਸੀ ਮੰਗੀ ਤੇ ਨਾ ਦੇਣ ‘ਤੇ ਉਸ ਨਾਲ ਕੁੱਟਮਾਰ ਕੀਤੀ। ਉਸ ਨੂੰ ਜਾਨੇਂ ਮਾਰਨ ਦੀਆਂ ਧਮਕੀਆਂ ਦਿੱਤੀਆਂ। ਇਸ ਤੋਂ ਬਾਅਦ ਉਨ੍ਹਾਂ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ।
