ਦੋਸਤ ਨੇ ਹੀ ਕੀਤੀ ਆਪਣੇ ਦੋਸਤ ਦੀ ਕੁੱਟਮਾਰ ਤੇ ਢਾਈ ਲੱਖ ਰੁਪਏ ਤੇ ਮੋਬਾਇਲ ਫੋਨ ਖੋਹ ਕੇ ਹੋਇਆ ਫਰਾਰ

ਫਿਰੋਜ਼ਪੁਰ: ਸੈਕਿੰਡ ਹੈਂਡ ਕਾਰ ਦੁਆਉਣ ਦੀ ਜਾਅਲਸਾਜ਼ੀ ਕਰਕੇ ਇਕ ਲੁਟੇਰੇ ਵੱਲੋਂ ਆਪਣੇ ਹੀ ਦੋਸਤ ਤੋਂ ਢਾਈ ਲੱਖ ਰੁਪਏ ਅਤੇ ਇੱਕ ਮੋਬਾਇਲ ਲੁੱਟ ਲੈਣ ਦੀ ਖਬਰ ਹੈ। ਇਸ ਸਬੰਧ ਵਿਚ ਥਾਣਾ ਕੁੱਲਗੜ੍ਹੀ ਦੀ ਪੁਲਿਸ ਨੇ 1 ਬਾਏ ਨੇਮ ਵਿਅਕਤੀ ਤੇ ਇਕ ਅਣਪਛਾਤੇ ਵਿਅਕਤੀ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ।

ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿਚ ਗੁਰਪ੍ਰੀਤ ਸਿੰਘ ਪੁੱਤਰ ਜਗਤਾਰ ਸਿੰਘ ਵਾਸੀ ਬੀਤ ਰਾਓਕੇ ਥਾਣਾ ਨਿਹਾਲ ਸਿੰਘ ਵਾਲਾ ਹਾਲ ਅਬਾਦ ਵਾਰਡ ਨੰਬਰ 12 ਬਸਤੀ ਬਲਾਸ਼ ਨੇੜੇ ਕਾਹਨ ਸਿੰਘ ਵਾਲਾ ਫਾਟਕ ਭੁੱਚੋ ਮੰਡੀ ਜ਼ਿਲ੍ਹਾ ਬਠਿੰਡਾ ਨੇ ਦੱਸਿਆ ਕਿ ਉਸ ਨੇ ਸੈਕੰਡ ਹੈਂਡ ਕਾਰ ਖਰਦੀਣੀ ਸੀ ਤੇ ਉਸ ਨੂੰ ਉਸ ਦੇ ਦੋਸਤ ਅਮਨਦੀਪ ਸਿੰਘ ਉਰਫ ਅਮਨਾ ਪੁੱਤਰ ਸਵਰਨ ਸਿੰਘ ਵਾਸੀ ਨਥਾਣਾ ਜ਼ਿਲ੍ਹਾ ਬਠਿੰਡਾ ਨੇ ਪਿੰਡ ਮੁੱਦਕੀ ਵਿਖੇ ਪੁਰਾਣੀ ਕਾਰ ਵਿਕਾਓ ਖੜੀ ਹੋਣ ਬਾਰੇ ਦੱਸਿਆ। ਜਿਸ ਤੇ ਉਹ ਆਪਣੇ ਭਰਾ ਲਵਪ੍ਰੀਤ ਸਿੰਘ ਤੇ ਮਾਮਲੇ ਸੁਖਪਾਲ ਸਿੰਘ ਨਾਲ ਦੋਸ਼ੀ ਅਮਨਦੀਪ ਸਿੰਘ ਉਰਫ ਅਮਨਾ ਤੇ ਇਕ ਅਣਪਛਾਤਾ ਆਦਮੀ ਕਾਰ ਵਰਨਾ ਰੰਗ ਫਿੱਕਾ ਅਸਮਾਨੀ ਦਿੱਲੀ ਨੰਬਰੀ ਤੇ ਸਵਾਰ ਹੋ ਕੇ ਗੱਡੀ ਵੇਖਣ ਲਈ ਚੱਲ ਪਏ। ਗੁਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਜਦ ਉਹ ਪਿੰਡ ਕੁੱਲਗੜ੍ਹੀ ਪਾਸ ਪਹੁੰਚੇ ਤਾਂ ਅਮਨਦੀਪ ਸਿੰਘ ਨੇ ਗੱਡੀ ਰੋਕ ਲਈ ਤੇ ਉਸ ਦੇ ਭਰਾ ਤੇ ਮਾਮਾ ਸੁਖਪਾਲ ਸਿੰਘ ਨੂੰ ਕੋਲਡ ਡਿ੍ਰੰਕ ਲੈ ਕੇ ਆਉਣ ਲਈ ਭੇਜ ਦਿੱਤਾ ਤੇ ਦੋਸ਼ੀ ਅਮਨਦੀਪ ਸਿੰਘ ਕਾਰ ਭਜਾ ਕੇ ਨੇੜੇ ਦਾਣਾ ਮੰਡੀ ਪੁਲ ਸੂਆ ਕੁੱਲਗੜ੍ਹੀ ਪਾਸ ਲੈ ਗਿਆ ਤੇ ਜਿਥੇ ਦੋਸ਼ੀਅਨ ਨੇ ਉਸ ਨੂੰ ਡਰਾ ਧਮਕਾ ਕੇ ਉਸ ਦੀ ਕੁੱਟਮਾਰ ਕਰਕੇ ਉਸ ਦੀ ਪਹਿਨੀ ਹੋਈ ਲੋਅਰ ਦੀਆਂ ਜੇਬਾਂ ਵਿਚੋਂ ਢਾਈ ਲੱਖ ਰੁਪਏ ਤੇ ਮੋਬਾਇਲ ਫੋਨ ਟੱਚ ਸਕਰੀਨ ਖੋਹ ਲਿਆ ਤੇ ਮੌਕੇ ਤੋਂ ਫਰਾਰ ਹੋ ਗਿਆ। ਇਸ ਮਾਮਲੇ ਦੀ ਜਾਂਚ ਕਰ ਰਹੇ ਏਐੱਸਆਈ ਕਰਮ ਸਿੰਘ ਨੇ ਦੱਸਿਆ ਕਿ ਪੁਲਿਸ ਨੇ ਸ਼ਿਕਾਇਤਕਰਤਾ ਦੇ ਬਿਆਨਾਂ ‘ਤੇ ਅਮਨਦੀਪ ਸਿੰਘ ਉਰਫ ਅਮਨਾ ਤੇ ਇਕ ਅਣਪਛਾਤੇ ਵਿਅਕਤੀ ਖਿਲਾਫ ਮਾਮਲਾ ਦਰਜ ਕਰ ਲਿਆ ਗਿਆ ਹੈ।