ਅਬੋਹਰ : ਅਬੋਹਰ-ਸੀਤੋ ਰੋਡ ਸਥਿਤ ਮੈਰਿਜ ਪੈਲੇਸ ਲਾਗੇ ਬਾਅਦ ਦੁਪਹਿਰ ਕਾਰ ਤੇ ਇਕ ਤਿੰਨ-ਪਹੀਆ ਵਾਹਨ ਦੀ ਆਹਮੋ-ਸਾਹਮਣੇ ਦੀ ਟੱਕਰ ਵਿਚ ਕਾਰ ਸਵਾਰ ਨੌਜਵਾਨ ਤੇ ਛੋਟੇ ਹਾਥੀ ਵਿਚ ਸਵਾਰ 2 ਔਰਤਾਂ ਤੇ ਪੁਰਸ਼ ਦੀ ਦਰਦਨਾਕ ਮੌਤ ਹੋ ਗਈ ਹੈ। ਇਸੇ ਦੌਰਾਨ ਛੋਟੇ ਹਾਥੀ (ਟੈਂਪੂ) ਵਿਚ ਸਵਾਰ ਦਰਜਨ ਭਰ ਮਜ਼ਦੂਰ ਜ਼ਖ਼ਮੀ ਹੋ ਗਏ ਹਨ। ਮ੍ਰਿਤਕਾਂ ਦੀਆਂ ਦੇਹਾਂ ਸਰਕਾਰੀ ਹਸਪਤਾਲ ਦੇ ਮੁਰਦਾਘਰ ਵਿਚ ਰਖਾ ਕੇ ਪੁਲਿਸ ਨੇ ਜਾਂਚ ਅਰੰਭ ਦਿੱਤੀ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਸ੍ਰੀ ਮੁਕਤਸਰ ਸਾਹਿਬ ਦੇ ਪਿੰਡ ਕੁੱਤਿਆਂਵਾਲੀ ਤੇ ਫ਼ਤਹਿਵਾਲੀ ਪਿੰਡਾਂ ਤੋਂ ਛੋਟਾ ਹਾਥੀ ਚਾਲਕ ਦਰਜ਼ਨ ਮਜ਼ਦੂਰਾਂ ਨੂੰ ਨਰਮਾ ਚੁਗਾਈ ਲਈ ਸ੍ਰੀ ਗੰਗਾਨਗਰ ਲੈ ਕੇ ਜਾ ਰਿਹਾ ਸੀ। ਜਦ ਇਨ੍ਹਾਂ ਦਾ ਵਾਹਨ ਅਬੋਹਰ ਸੀਤੋ ਰੋਡ ਸਥਿਤ ਸੈਲੀਬਰੇਸ਼ਨ ਪੈਲੇਸ ਕੋਲ ਪੁੱਜਾ ਤਾਂ ਸੰਗਰੀਆਂ (ਰਾਜਸਥਾਨ) ਤੋਂ ਸਥਾਨਕ ਅਜ਼ੀਮਗੜ੍ਹ ਵਾਸੀ ਸੰਜੂ (22 ਸਾਲ) ਦੀ ਕਾਰ ਨਾਲ ਇਨ੍ਹਾਂ ਦੇ ਵਾਹਨ ਦੀ ਆਹਮੋ-ਸਾਹਮਣੇ ਟੱਕਰ ਹੋ ਗਈ ਅਤੇ ਸੰਜੂ ਦੀ ਮੌਕੇ ’ਤੇ ਦਰਦਨਾਕ ਮੌਤ ਹੋ ਗਈ। ਛੋਟੇ ਹਾਥੀ ਵਿਚ ਸਵਾਰ ਰਾਮ ਸਿੰਘ (45 ਸਾਲ), ਕੁਲਦੀਪ ਕੌਰ (60 ਸਾਲ) ਤੇ ਛਿੰਦਰ ਕੌਰ (65 ਸਾਲ) ਦੀ ਹਾਦਸੇ ਦੌਰਾਨ ਮੌਕੇ ’ਤੇ ਮੌਤ ਹੋ ਗਈ।
ਇਸ ਤੋਂ ਇਲਾਵਾ ਦਰਜਨ ਭਰ ਹੋਰ ਮਜ਼ਦੂਰ ਜਸ਼ਨਪ੍ਰੀਤ, ਕਿਰਨ, ਨਿਸ਼ਾ, ਗੁਰਪਿੰਦਰ ਸਿੰਘ, ਜਸਵਿੰਦਰ ਕੌਰ, ਪਰਮਿੰਦਰ ਕੌਰ, ਰਜਿੰਦਰ ਸਿੰਘ, ਕੁਲਦੀਪ ਸਿੰਘ, ਬਖ਼ਸ਼ੀਸ਼ ਸਿੰਘ, ਸੁਖਪ੍ਰੀਤ, ਸੋਨੂੰ, ਨੂਰ, ਪਰਮਜੀਤ ਕੌਰ, ਲਵਪ੍ਰੀਤ, ਕਾਰਤਿਕ ਤੇ ਏਕਮ ਆਦਿ ਜ਼ਖ਼ਮੀ ਹੋ ਗਏ। ਇਨ੍ਹਾਂ ਨੂੰ 108 ਐਬੂਲੈਂਸ ਦੀ ਮਦਦ ਨਾਲ ਸਰਕਾਰੀ ਹਸਪਤਾਲ ਵਿਚ ਇਲਾਜ ਲਈ ਦਾਖ਼ਲ ਕਰਵਾਇਆ ਗਿਆ। ਸੂਚਨਾ ਮਿਲਦੇ ਹੀ ਹਸਪਤਾਲ ਦਾ ਅਮਲਾ ਜ਼ਖ਼ਮੀਆਂ ਦੇ ਇਲਾਜ ਲਈ ਲੱਗ ਗਿਆ ਜਦਕਿ ਦੂਜੇ ਪਾਸੇ ਪੁਲਿਸ ਨੇ ਨੁਕਸਾਨੇ ਵਾਹਨ ਸਾਈਡ ’ਤੇ ਕਰਵਾ ਕੇ ਟਰੈਫਿਕ ਨੂੰ ਬਹਾਲ ਕਰਵਾਇਆ।
