ਲੋਕਾਂ ਦੀਆਂ ਸ਼ਿਕਾਇਤਾਂ ਕਾਰਨ ਐੱਸਡੀਐੱਮ ਵੱਲੋਂ ਸੇਵਾ ਕੇਂਦਰ ਦੀ ਚੈਕਿੰਗ

ਸ਼ਾਹਕੋਟ : ਮੋਗਾ ਰੋਡ ਸਥਿਤ ਸੇਵਾ ਕੇਂਦਰ ‘ਚ ਲੋਕਾਂ ਦੀ ਹੋ ਰਹੀ ਖੱਜਲ ਖੁਆਰੀ ਦੀਆਂ ਸ਼ਿਕਾਇਤਾਂ ਮਿਲਣ ਉਪਰੰਤ ਐੱਸਡੀਐੱਮ ਸ਼ਾਹਕੋਟ ਲਾਲ ਵਿਸ਼ਵਾਸ ਬੈਂਸ ਵੱਲੋਂ ਸ਼ੁਕੱਰਵਾਰ ਨੂੰ ਸੇਵਾ ਕੇਂਦਰ ਤੇ ਪਟਵਾਰਖਾਨੇ ਦੀ ਅਚਨਚੇਤ ਚੈਕਿੰਗ ਕੀਤੀ ਗਈ। ਇਸ ਮੌਕੇ ਉਨ੍ਹਾਂ ਨਾਲ ਸੀਨੀਅਰ ਕਾਂਗਰਸੀ ਆਗੂ ਬਿਕਰਮਜੀਤ ਸਿੰਘ ਹੈਪੀ ਬਜਾਜ ਵੀ ਮੌਜੂਦ ਸਨ। ਇਸ ਮੌਕੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਐੱਸਡੀਐੱਮ ਲਾਲ ਵਿਸ਼ਵਾਸ ਬੈਂਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਕਈ ਦਿਨਾਂ ਤੋਂ ਸੇਵਾ ਕੇਂਦਰ ਦੀਆਂ ਸ਼ਿਕਾਇਤਾਂ ਮਿਲ ਰਹੀਆਂ ਸਨ ਕਿ ਲੋਕ ਸਵੇਰੇ 6 ਵਜੇ ਲਾਈਨਾਂ ‘ਚ ਲੱਗ ਕੇ ਟੋਕਨ ਪ੍ਰਰਾਪਤ ਕਰਦੇ ਹਨ ਤੇ ਸ਼ਾਮ ਤਕ ਵਾਰੀ ਨਾ ਆਉਣ ਕਰ ਕੇ ਖੱਜਲ ਖੁਆਰ ਹੋ ਕੇ ਘਰ ਵਾਪਸ ਚਲੇ ਜਾਂਦੇ ਹਨ ਤੇ ਅਗਲੇ ਦਿਨ ਸੇਵਾ ਕੇਂਦਰ ਵਾਲੇ ਮੁਲਾਜ਼ਮ ਉਨ੍ਹਾ ਨੂੰ ਨਵਾਂ ਟੋਕਨ ਲੈਣ ਲਈ ਕਹਿੰਦੇ ਹਨ। ਇਸ ਮੁਸ਼ਕਲ ਨੂੰ ਦੇਖਦਿਆਂ ਐੱਸਡੀਐੱਮ ਨੇ ਸਟਾਫ ਨੂੰ ਹਦਾਇਤ ਕੀਤੀ ਕਿ ਉਹ ਉਨੇ ਹੀ ਟੋਕਨ ਜਾਰੀ ਕਰਨ ਜਿਸ ਨਾਲ ਲੋਕ ਖੱਜਲ ਖੁਆਰ ਨਾ ਹੋਣਾ ਪਵੇ। ਸੇਵਾ ਕੇਂਦਰ ਇੰਚਾਰਜ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਹਰ ਰੋਜ਼ 120 ਟੋਕਨ ਹੀ ਕੱਢੇ ਜਾਂਦੇ ਹਨ ਪਰ ਕਈ ਵਾਰ ਮਸ਼ੀਨ ਖਰਾਬ ਹੋ ਜਾਣ ਕਰ ਕੇ ਮੁਸ਼ਕਲ ਆ ਜਾਂਦੀ ਹੈ। ਇਸ ਮੌਕੇ ਐੱਸਡੀਐੱਮ ਵੱਲੋਂ ਪਟਵਾਰਖਾਨੇ ਦਾ ਦੌਰਾ ਵੀ ਕੀਤਾ ਗਿਆ ਜਿੱਥੇ ਰਵਿੰਦਰ ਸ਼ਰਮਾ ਕਾਨੂੰਗੋ, ਗੁਰਵੀਰ ਸਿੰਘ ਪਟਵਾਰੀ, ਗੁਰਪ੍ਰਰੀਤ ਸਿੰਘ ਪਟਵਾਰੀ ਲੋਹੀਆਂ, ਗੁਰਪ੍ਰਰੀਤ ਜਾਫਰਵਾਲ, ਭੁਪਿੰਦਰ ਸਿੰਘ ਪਟਵਾਰੀ, ਅਮਿਤ ਵਿੱਗ, ਸੌਰਵ ਸੱਗੂ ਵੱਲੋਂ ਉਨ੍ਹਾਂ ਦਾ ਸਵਾਗਤ ਕੀਤਾ ਗਿਆ।