ਨਵੀਂ ਦਿੱਲੀ : ਭਾਰਤੀ ਹਵਾਈ ਫ਼ੌਜ ਦੇ ਟਰਾਂਸਪੋਰਟ ਬੇਡ਼ੇ ਦੇ ਆਧੁਨਿਕੀਕਰਨ ਦੀ ਦਿਸ਼ਾ ’ਚ ਵੱਡਾ ਕਦਮ ਚੁੱਕਦੇ ਹੋਏ ਰੱਖਿਆ ਮੰਤਰਾਲੇ ਨੇ ਸਪੇਨ ਦੀ ਕੰਪਨੀ ਏਅਰਬੱਸ ਡਿਫੈਂਸ ਐਂਡ ਸਪੇਸ ਨਾਲ 56 ਸੀ-295 ਐੱਮਡਬਲਯੂ ਫ਼ੌਜੀ ਟਰਾਂਸਪੋਰਟ ਜਹਾਜ਼ ਖ਼ਰੀਦਣ ਦਾ ਕਰਾਰ ਕੀਤਾ ਹੈ। 5 ਤੋਂ 10 ਟਨ ਭਾਰ ਢੋਣ ਦੀ ਸਮਰੱਥਾ ਵਾਲੇ ਇਹ ਜਹਾਜ਼ ਭਾਰਤੀ ਹਵਾਈ ਫ਼ੌਜ ਦੇ ਪੁਰਾਣੇ ਹੋ ਚੁੱਕੇ ਏਵਰੋ ਟਰਾਂਸਪੋਰਟ ਜਹਾਜ਼ਾਂ ਦੀ ਥਾਂ ਲੈਣਗੇ।
ਰੱਖਿਆ ਮੰਤਰਾਲੇ ਨੇ ਏਅਰਬੱਸ ਨਾਲ ਸ਼ੁੱਕਰਵਾਰ ਨੂੰ ਕਰੀਬ 22,000 ਕਰੋਡ਼ ਰੁਪਏ ਦੇ ਇਸ ਸੌਦੇ ਦੇ ਸਮਝੌਤੇ ’ਤੇ ਦਸਤਖ਼ਤ ਕੀਤੇ। ਇਸ ਤਹਿਤ 16 ਸੀ-295 ਐੱਮਡਬਲਯੂ ਜਹਾਜ਼ ਪੂਰੀ ਤਰ੍ਹਾਂ ਉਡਾਣ ਭਰਨ ਲਈ ਤਿਆਰ ਸਥਿਤੀ ਵਿਚ ਭਾਰਤ ਲਿਆਂਦੇ ਜਾਣਗੇ। ਜਦਕਿ ਆਤਮਨਿਰਭਰ ਭਾਰਤ ਦੇ ਅਭਿਆਨ ਨੂੰ ਮਜ਼ਬੂਤ ਦੇਣ ਲਈ ਟਾਟਾ ਕੰਸੋਰਟੀਅਮ ਏਅਰਬੱਸ ਡਿਫੈਂਸ ਨਾਲ ਬਾਕੀ 40 ਜਹਾਜ਼ਾਂ ਦਾ ਭਾਰਤ ਵਿਚ ਨਿਰਮਾਣ ਕਰੇਗਾ।
ਰੱਖਿਆ ਮੰਤਰਾਲੇ ਨੇ ਇਸ ਖ਼ਰੀਦ ਸਮਝੌਤੇ ਦੇ ਨਾਲ ਹੀ ਏਅਰਬੱਸ ਡਿਫੈਂਸ ਅਤੇ ਟਾਟਾ ਐਡਵਾਂਸਡ ਸਿਸਟਮ ਦੇ ਸੀ-295 ਟਰਾਂਸਪੋਰਟ ਜਹਾਜ਼ ਬਣਾਉਣ ਦੇ ਸਾਂਝੇ ਪ੍ਰਾਜੈਕਟ ਨੂੰ ਵੀ ਹਰੀ ਝੰਡੀ ਦੇ ਦਿੱਤੀ ਹੈ। ਖ਼ਰੀਦ ਸੌਦੇ ਦੇ ਨਾਲ ਹੀ ਰੱਖਿਆ ਮੰਤਰਾਲੇ ਨੇ ਏਅਰਬੱਸ ਡਿਫੈਂਸ ਦੇ ਐਂਡ ਸਪੇਸ ਨਾਲ ਇਕ ਆਫਸੈੱਟ ਕਰਾਰ ਵੀ ਕੀਤਾ ਹੈ ਜਿਸ ਤਹਿਤ ਏਅਰਬੱਸ ਆਪਣੇ ਭਾਰਤੀ ਭਾਈਵਾਲਾਂ ਤੋਂ ਜ਼ਰੂਰੀ ਉਪਕਰਣਾਂ ਦੀ ਖ਼ਰੀਦ ਅਤੇ ਸੇਵਾਵਾਂ ਲਵੇਗੀ।
ਕੈਬਨਿਟ ਨੇ ਇਸੇ ਮਹੀਨੇ ਖ਼ਰੀਦ ਮਤੇ ਨੂੰ ਦਿੱਤੀ ਸੀ ਮਨਜ਼ੂਰੀ
ਸੁਰੱਖਿਆ ਮਾਮਲਿਆਂ ਦੀ ਕੈਬਨਿਟ ਕਮੇਟੀ ਨੇ ਇਸ ਮਹੀਨੇ ਦੀ ਸ਼ੁਰੂਆਤ ’ਚ ਹੀ ਹਵਾਈ ਫ਼ੌਜ ਲਈ ਇਨ੍ਹਾਂ 56 ਟਰਾਂਸਪੋਰਟ ਜਹਾਜ਼ਾਂ ਦੀ ਖ਼ਰੀਦ ਦੇ ਮਤੇ ਨੂੰ ਮਨਜ਼ੂਰੀ ਦਿੱਤੀ ਸੀ। ਭਾਰਤੀ ਹਵਾਈ ਫ਼ੌਜ ਦੀ ਟਰਾਂਸਪੋਰਟ ਸਮਰੱਥਾ ਅਤੇ ਰਫ਼ਤਾਰ ਨੂੰ ਵਧਾਉਣ ਦੇ ਲਿਹਾਜ਼ ਨਾਲ ਇਨ੍ਹਾਂ ਜਹਾਜ਼ਾਂ ਦੀ ਖ਼ਰੀਦ ਇਕ ਮਹੱਤਵਪੂਰਨ ਰੱਖਿਆ ਸੌਦਾ ਹੈ।
ਸੀ-295 ਐੱਮਡਬਲਯੂ ਦੀਆਂ ਖ਼ਾਸੀਅਤਾਂ
ਸੀ-295 ਐੱਮਡਬਲਯੂ ਟਰਾਂਸਪੋਰਟ ਜਹਾਜ਼ ਦੀ ਖ਼ਾਸ ਗੱਲ ਇਹ ਹੈ ਕਿ ਇਸ ਦੇ ਪਿੱਛੇ ਦੇ ਹਿੱਸੇ ’ਚ ਰੈਂਪ ਡੋਰ ਹੈ ਜਿਹਡ਼ੀ ਫ਼ੌਜੀਆਂ ਜਾਂ ਸਾਮਾਨ ਦੀ ਤੇਜ਼ੀ ਨਾਲ ਪੈਰਾ ਡ੍ਰਾਪਿੰਗ ਲਈ ਪੂਰੀ ਤਰ੍ਹਾਂ ਮੁਫ਼ੀਦ ਹੈ। ਇਹ ਜਹਾਜ਼ ਅੱਧੇ ਅਧੂਰੇ ਏਅਰ ਸਟ੍ਰਿਪ ਨਾਲ ਵੀ ਆਸਾਨੀ ਨਾਲ ਉਡਾਣ ਭਰ ਸਕਦੇ ਹਨ। ਇਨ੍ਹਾਂ ਜਹਾਜ਼ਾਂ ਦੇ ਆਉਣ ਤੋਂ ਬਾਅਦ ਹਵਾਈ ਫ਼ੌਜ ਦੀ ਏਅਰਲਿਫਟ ਰਣਨੀਤਕ ਸਮਰੱਥਾ ਨੂੰ ਕਾਫ਼ੀ ਮਜ਼ਬੂਤੀ ਮਿਲੇਗੀ।
ਟਾਟਾ ਕੰਸੋਰਟੀਅਮ ਦੂਜੇ ਦੇਸ਼ਾਂ ਨੂੰ ਵੀ ਵੇਚ ਸਕੇਗਾ ਇਹ ਜਹਾਜ਼
ਇਨ੍ਹਾਂ ਸਾਰੇ 56 ਜਹਾਜ਼ਾਂ ਨੂੰ ਸਵਦੇਸ਼ ਨਿਰਮਿਤ ਇਲੈਕਟ੍ਰਾਨਿਕ ਵਾਰਫੇਅਰ ਸੁਈਟ ਨਾਲ ਲੈਸ ਕੀਤਾ ਜਾਵੇਗਾ। ਹਵਾਈ ਫ਼ੌਜ ਨੂੰ ਸਾਰੇ ਜਹਾਜ਼ਾਂ ਦੀ ਸਪਲਾਈ ਕਰਨ ਤੋਂ ਬਾਅਦ ਟਾਟਾ ਕੰਸੋਰਟੀਅਮ ਉਨ੍ਹਾਂ ਦੇਸ਼ਾਂ ਨੂੰ ਇਨ੍ਹਾਂ ਜਹਾਜ਼ਾਂ ਨੂੰ ਵੇਚ ਵੀ ਸਕੇਗਾ, ਜਿਨ੍ਹਾਂ ਦੇਸ਼ਾਂ ਨੂੰ ਵੇਚਣ ’ਤੇ ਭਾਰਤ ਸਰਕਾਰ ਨੂੰ ਕੋਈ ਇਤਰਾਜ਼ ਨਹੀਂ ਹੋਵੇਗਾ।
