ਜਲੰਧਰ : ਜਲੰਧਰ ਅੰਮ੍ਰਿਤਸਰ ਹਾਈਵੇ ਤੇ ਇਸ ਨਾਲ ਲੰਘਦੀ ਲਿੰਕ ਸੜਕ ‘ਤੇ ਲੰਬਾ ਜਾਮ ਲੱਗਾ ਰਿਹਾ। ਤਕਰੀਬਨ ਤਿੰਨ ਤੋਂ ਚਾਰ ਘੰਟੇ ਲੱਗੇ ਲੰਮੇ ਜਾਮ ‘ਚੋਂ ਲੰਘਣ ਲਈ ਭਾਵੇਂ ਲੋਕ ਇਕ ਦੂਜੇ ਨਾਲ ਉਲਝਦੇ ਰਹੇ ਪਰ ਇਸ ਜਾਮ ਨੂੰ ਖੁਲ੍ਹਵਾਉਣ ਲਈ ਕੋਈ ਵੀ ਪੁਲਿਸ ਪ੍ਰਸ਼ਾਸਨ ਦਾ ਅਧਿਕਾਰੀ ਨਜ਼ਰ ਨਹੀਂ ਆਇਆ। ਨਜ਼ਦੀਕ ਸਥਿਤ ਦੁਕਾਨਦਾਰ ਨੇ ਦੱਸਿਆ ਕਿ ਤਿੰਨ ਤੋਂ ਚਾਰ ਘੰਟੇ ਲੱਗੇ ਲੰਬੇ ਜਾਮ ਦੌਰਾਨ ਉਨ੍ਹਾਂ ਵੱਲੋਂ ਪੁਲਿਸ ਕਮਿਸ਼ਨਰ ਨੂੰ ਭਾਵੇਂ ਦੋ ਵਾਰ ਜਾਣੂ ਕਰਵਾਇਆ ਪਰ ਇਸ ਦੇ ਬਾਵਜੂਦ ਵੀ ਕੋਈ ਵੀ ਪੁਲਿਸ ਅਧਿਕਾਰੀ ਮੌਕੇ ‘ਤੇ ਨਹੀਂ ਪੁੱਜਾ। ਕਿਹਾ ਜਾਂਦਾ ਹੈ ਕਿ ਕਿਸੇ ਸੰਕਟ ਤੋਂ ਨਿਜਾਤ ਪਾਉਣ ਲਈ ਫੌਜ ਦੀ ਮਦਦ ਲਈ ਜਾਂਦੀ ਹੈ ਪਰ ਇਸ ਲੰਬੇ ਜਾਮ ‘ਚ ਫ਼ੌਜ ਦੇ ਵਾਹਨ ਵੀ ਫਸੇ ਰਹੇ ਤੇ ਫ਼ੌਜ ਦੇ ਵਾਹਨਾਂ ‘ਚ ਬੈਠੇ ਕਿਸੇ ਵੀ ਫੌਜੀ ਜਵਾਨ ਵੱਲੋਂ ਇਸ ਜਾਮ ਨੂੰ ਖੁਲ੍ਹਵਾਉਣ ਦੀ ਕੋਸ਼ਿਸ਼ ਨਹੀਂ ਕੀਤੀ ਗਈ। ਇਸ ਲੰਬੇ ਜਾਮ ‘ਚ ਏਅਰਪੋਰਟ ਜਾਣ ਵਾਲੀ ਬੱਸ ‘ਚ ਬੈਠੀਆਂ ਸਵਾਰੀਆਂ ਵੱਲੋਂ ਦੱਸਿਆ ਗਿਆ ਕਿ ਉਨ੍ਹਾਂ ਵੱਲੋਂ ਹਵਾਈ ਜਹਾਜ਼ ਦਾ ਸਫ਼ਰ ਕਰਨ ਲਈ ਸਮੇਂ ਸਿਰ ਪੁੱਜਣਾ ਹੈ ਪਰ ਇਸ ਲੰਮੇ ਜਾਮ ਚ ਤਿੰਨ ਘੰਟੇ ਤੋਂ ਵੱਧ ਉਨ੍ਹਾਂ ਨੂੰ ਰੁਕਣਾ ਪਿਆ।ਜਿਸ ਕਰਕੇ ਉਨ੍ਹਾਂ ਦੇ ਜਹਾਜ਼ ਦੀ ਟਿਕਟ ਰੱਦ ਹੋਣ ਦਾ ਖਦਸ਼ਾ ਬਣਿਆ ਹੋਇਆ ਹੈ। ਇਸ ਲੰਮੇ ਜਾਮ ਨਾਲ ਪਠਾਨਕੋਟ ਚੌਕ ਤੋਂ ਲੈ ਕੇ ਤਕਰੀਬਨ ਕਾਲਜ ਐਨਆਈਟੀ ਤਕ ਅਤੇ ਇੰਡਸਟਰੀਅਲ ਏਰੀਏ ਨੂੰ ਜਾਣ ਵਾਲੀ ਸੜਕ ਦੇ ਜਾਮ ਵਿੱਚ ਫਸ ਕੇ ਲੋਕਾਂ ਨੂੰ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ। ਇਸ ਲੰਬੇ ਜਾਮ ਲੱਗਣ ਸਬੰਧੀ ਨੇੜੇ-ਤੇੜੇ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਪਿਛਲੇ ਕੁਝ ਸਮੇਂ ਪਹਿਲਾਂ ਅਦਾਲਤ ਦੇ ਹੁਕਮਾਂ ਅਨੁਸਾਰ ਹਾਈਵੇ ਅਥਾਰਟੀ ਵੱਲੋਂ ਇੰਡਸਟਰੀਅਲ ਏਰੀਏ ਨੂੰ ਹਾਈਵੇ ਤੋਂ ਮੁੜਨ ਵਾਲੀ ਸੜਕ ਨੂੰ ਬੰਦ ਕਰ ਦਿੱਤਾ ਗਿਆ ਸੀ ਪਰ ਕੁਝ ਰਾਜਨੀਤਿਕ ਦਬਾਅ ਕਰਕੇ ਹਾਈਵੇਅ ਅਧਿਕਾਰੀਆਂ ਵੱਲੋਂ ਅਦਾਲਤਾਂ ਦੇ ਹੁਕਮਾਂ ਦੀ ਉਲੰਘਣਾ ਕਰਕੇ ਇਸ ਰਸਤੇ ਨੂੰ ਫਿਰ ਖੋਲ੍ਹ ਦਿੱਤਾ ਗਿਆ ਜਿਸ ਕਰਕੇ ਇਸ ਰਸਤੇ ਤੋਂ ਜਦ ਵੀ ਭਾਰੀ ਵਾਹਨ ਮੁੜਦੇ ਹਨ ਤਾਂ ਇੱਥੇ ਲੰਮਾ ਜਾਮ ਲੱਗ ਜਾਂਦਾ ਹੈ।
ਮੁਲਾਜ਼ਮ ਪੇਪਰਾਂ ‘ਤੇ ਦੇ ਰਹੇ ਨੇ ਡਿਊਟੀ : ਏਸੀਪੀ ਟ੍ਰੈਫਿਕ
ਇਸ ਸਬੰਧੀ ਜਦ ਮੌਕੇ ‘ਤੇ ਹੀ ਏਸੀਪੀ ਟ੍ਰੈਫਿਕ ਹਰਵਿੰਦਰ ਸਿੰਘ ਭੱਲਾ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦਾ ਕਹਿਣਾ ਸੀ ਕਿ ਟਰੈਫਿਕ ਦੇ ਸਾਰੇ ਮੁਲਾਜ਼ਮਾਂ ਦੀ ਡਿਊਟੀ ਜਲੰਧਰ ਵਿੱਚ ਹੋ ਰਹੇ ਪੇਪਰਾਂ ‘ਤੇ ਲੱਗੀ ਹੋਈ ਹੈ ਤੇ ਉਨ੍ਹਾਂ ਕਿਹਾ ਕਿ ਤੁਸੀਂ ਨਜ਼ਦੀਕ ਕਿਸੇ ਪੁਲਿਸ ਅਧਿਕਾਰੀ ਨੂੰ ਸੂਚਨਾ ਦੇ ਦਿਓ। ਇਸ ਤੋਂ ਕੁਝ ਸਮੇਂ ਬਾਅਦ ਟਰੈਫਿਕ ਪੁਲਿਸ ਦੇ ਮੁਨਸ਼ੀ ਵੱਲੋਂ ਮੀਡੀਆ ਨੂੰ ਟੈਲੀਫੋਨ ਰਾਹੀਂ ਜਾਣਕਾਰੀ ਦਿੱਤੀ ਕਿ ਉਨ੍ਹਾਂ ਦੇ ਮੁਲਾਜ਼ਮ ਵੇਰਕਾ ਮਿਲਕ ਪਲਾਂਟ ਨਜ਼ਦੀਕ ਮੌਜੂਦ ਹੋਣਗੇ ਜਿਨ੍ਹਾਂ ਨੂੰ ਉਹ ਮੌਕੇ ਤੇ ਭੇਜ ਦੇਣਗੇ ਪਰ ਇਸ ਦੇ ਬਾਵਜੂਦ ਵੀ ਕੋਈ ਵੀ ਪੁਲੀਸ ਅਧਿਕਾਰੀ ਮੌਕੇ ‘ਤੇ ਨਾ ਪੁੱਜਾ।
