ਕਪੂਰਥਲਾ :ਵਾਰਡ ਨੰਬਰ 39 ਦੀ ਗਲੀ ਜਿਸ ਵਿਚ ਪਹਿਲਾਂ ਇੰਟਰਲਾਕ ਟਾਈਲਾਂ ਲੱਗੀਆਂ ਹੋਈਆਂ ਸਨ ਨੂੰ ਨਵੀਂ ਸੜਕ ਬਣਾਉਣ ਲਈ ਪੁੱਟ ਦਿੱਤਾ ਗਿਆ ਪੰ੍ਤੂ ਅਜੇ ਤਕ ਉੱਥੇ ਸੜਕ ਬਣਾਉਣ ਦਾ ਕੰਮ ਦੁਬਾਰਾ ਸ਼ੁਰੂ ਨਹੀਂ ਹੋਇਆ ਹੈ, ਜਿਸ ਕਾਰਨ ਵਾਰਡ ਵਾਸੀਆਂ ਨੂੰ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਵਾਰਡ ਵਾਸੀ ਹਤੀਸ਼ ਜੈਰਥ, ਹਰਜੀਤ ਸਿੰਘ ਸਾਬ੍ਹੀ, ਲਖਵਿੰਦਰ ਸਿੰਘ ਸੋਨੂੰ, ਹਰਬੰਸ ਬੱਤਰਾ, ਸਾਹਿਲ ਆਨੰਦ, ਜਸਕਰਨ ਸਿੰਘ, ਰਾਕੇਸ਼ ਕੁਮਾਰ, ਰੇਨੂੰ ਜੈਰਥ, ਸਪਨਾ ਆਨੰਦ, ਕਾਂਤਾ ਰਾਣੀ, ਅਮਰਜੀਤ ਕੌਰ, ਭੁਪਿੰਦਰਜੀਤ ਕੌਰ, ਸੱਤਿਆ ਰਾਣੀ, ਅਮਰਜੀਤ ਕੌਰ ਆਦਿ ਨੇ ਦੱਸਿਆ ਕਿ ਬਰਸਾਤ ਦੇ ਮੌਸਮ ਵਿਚ ਇਸ ਪੁੱਟੀ ਗਈ ਸੜਕ ਵਿਚ ਥਾਂ-ਥਾਂ ਪਾਣੀ ਨਾਲ ਟੋਏ ਭਰ ਜਾਂਦੇ ਹਨ ਜਿਸ ਕਾਰਨ ਇਥੋਂ ਲੰਘਣਾ ਮੁਸ਼ਕਿਲ ਹੋ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਪਹਿਲਾਂ ਇਹ ਸੜਕ ਇੰਟਰਲਾਕ ਟਾਈਲਾਂ ਲਗਾ ਕੇ ਬਣੀ ਹੋਈ ਸੀ ਪੰ੍ਤੂ ਹੁਣ ਇਨ੍ਹਾਂ ਲੱਗੀਆਂ ਇੰਟਰਲਾਕ ਟਾਈਲਾਂ ਨੂੰ ਇਥੋਂ ਹਟਾ ਦਿੱਤਾ ਗਿਆ ਤੇ ਕਿਹਾ ਜਾ ਰਿਹਾ ਸੀ ਕਿ ਨਵੀਂ ਸੜਕ ਬਣਾਈ ਜਾ ਰਹੀ ਹੈ ਪੰ੍ਤੂ ਕਾਫੀ ਸਮੇਂ ਤੋਂ ਨਵੀਂ ਸੜਕ ਨੂੰ ਬਣਾਉਣ ਦਾ ਕੰਮ ਸ਼ੁਰੂ ਨਹੀਂ ਹੋਇਆ, ਜਿਸ ਕਾਰਨ ਆਉਣ ਜਾਣ ਵਾਲੇ ਰਾਹਗੀਰਾਂ ਅਤੇ ਬੱਚਿਆਂ ਨੂੰ ਇਸ ਸੜਕ ਤੋਂ ਲੰਘਣ ਵਿਚ ਕਾਫੀ ਪਰੇਸ਼ਾਨੀ ਆਉਂਦੀ ਹੈ। ਇਸ ਮੌਕੇ ਲੋਕਾਂ ਨੇ ਹਲਕਾ ਵਿਧਾਇਕ ਰਾਣਾ ਗੁਰਜੀਤ ਸਿੰਘ ਅਤੇ ਹੋਰ ਪ੍ਰਸ਼ਾਸਨਿਕ ਅਧਿਕਾਰੀਆਂ ਪਾਸੋਂ ਮੰਗ ਕੀਤੀ ਕਿ ਇਸ ਪੁੱਟੀ ਗਈ ਸੜਕ ਨੂੰ ਦੁਬਾਰਾ ਜਲਦੀ ਬਣਵਾਇਆ ਜਾਵੇ ਤਾਂ ਜੋ ਲੋਕਾਂ ਦੀ ਇਸ ਮੁਸ਼ਕਿਲ ਦਾ ਹੱਲ ਨਿਕਲ ਸਕੇ।
ਜਲਦੀ ਹੀ ਵਧੀਆ ਸੜਕ ਬਣਾਈ ਜਾਵੇਗੀ : ਕੌਂਸਲਰ
ਜਦੋਂ ਇਸ ਸਬੰਧੀ ਵਾਰਡ ਨੰਬਰ 39 ਦੇ ਕੌਂਸਲਰ ਸਵਿਤਾ ਸ਼ਰਮਾ ਨਾਲ ਗੱਲ ਕੀਤੀ ਗਈ ਤਾਂ ਉਨਾਂ੍ਹ ਨੇ ਕਿਹਾ ਕਿ ਵਿਧਾਇਕ ਰਾਣਾ ਗੁਰਜੀਤ ਸਿੰਘ ਦੀ ਅਗਵਾਈ ਵਿਚ ਵਿਕਾਸ ਕੰਮ ਜ਼ੋਰਾਂ ‘ਤੇ ਚੱਲ ਰਹੇ ਹਨ। ਇਸ ਸੜਕ ਦਾ ਟੈਂਡਰ ਵੀ ਹੋ ਚੁੱਕਾ ਹੈ ਅਤੇ ਕੰਮ ਚੱਲ ਰਿਹਾ ਹੈ ਅਤੇ 3-4 ਗਲੀਆਂ ਵਿਚ ਆਰ.ਐਮ.ਸੀ. ਪੈ ਚੁੱਕੀ ਹੈ ਅਤੇ 3-4 ਹੋਰ ਗਲੀਆਂ ਵਿਚ ਗੱਟਕਾ ਪੈ ਚੁੱਕਾ ਆਰ.ਐਮ.ਸੀ. ਪੈਣੀ ਬਾਕੀ ਹੈ ਪੰ੍ਤੂ ਬਰਸਾਤ ਕਾਰਨ ਕੰਮ ਬੰਦ ਹੋ ਗਿਆ ਸੀ, ਜੋ ਮੁੜ ਸ਼ੁਰੂ ਹੋ ਗਿਆ ਹੈ। ਉਨਾਂ੍ਹ ਕਿਹਾ ਕਿ ਇਸ ਸੜਕ ਨੂੰ ਮੇਨ ਗਲੀ ਹੋਣ ਕਾਰਨ ਬਾਅਦ ਵਿਚ ਬਣਾਇਆ ਜਾਣਾ ਹੈ ਕਿਉਂਕਿ ਇਸ ਗਲੀ ਰਾਹੀਂ ਹੀ ਸੜਕ ਬਨਾਉਂਣ ਦਾ ਮਟੀਰੀਅਲ ਟਿੱਪਰਾਂ ਰਾਹੀਂ ਬਾਕੀ ਗਲੀਆਂ ਵਾਸਤੇ ਆ ਰਿਹਾ ਜੇਕਰ ਇਹ ਪਹਿਲਾਂ ਬਣਾ ਦਿੱਤੀ ਜਾਂਦੀ ਤਾਂ ਇਹ ਮੁੜ ਟੁੱਟ ਜਾਣੀ ਸੀ ਅਤੇ ਬਾਕੀ ਗਲੀਆਂ ਦਾ ਕੰਮ ਮੁਕੰਮਲ ਹੋਣ ਤੋਂ ਬਾਅਦ ਇਸ ਸੜਕ ਨੂੰ ਵੀ ਵਧੀਆ ਤਰੀਕੇ ਨਾਲ ਬਣਾਇਆ ਜਾਵੇਗਾ।
