ਗੇਟਮੈਨ ਸੁੱਤਾ ਰਹਿ ਗਿਆ, ਖੁੱਲ੍ਹੇ ਜੌੜਾ ਫਾਟਕ ‘ਤੇ ਆਣ ਪੁੱਜੀ ਟ੍ਰੇਨ ਤੇ ਫਿਰ ਜੋ ਹੋਇਆ ਉਹ…

ਅੰਮ੍ਰਿਤਸਰ : ਜੌੜਾ ਫਾਟਕ ‘ਤੇ ਵਾਪਰੇ ਰੇਲ ਹਾਦਸੇ ਤੋਂ ਹਾਲੇ ਵੀ ਰੇਲਵੇ ਵਿਭਾਗ ਸਬਕ ਲੈਂਦਾ ਨਜ਼ਰ ਨਹੀਂ ਆ ਰਿਹਾ। ਐਤਵਾਰ ਸਵੇਰੇ ਤੜਕੇ ਸਾਢੇ 5 ਵਜੇ ਇਕ ਵਾਰ ਫਿਰ ਖੁੱਲ੍ਹੇ ਫਾਟਕ ‘ਤੇ ਟ੍ਰੇਨ ਆਣ ਪੁੱਜੀ ਪਰ ਗੇਟਮੈਨ ਸੁੱਤਾ ਰਹਿ ਗਿਆ। ਲੋਕਾਂ ਨੇ ਗੇਟਮੈਨ ਨੂੰ ਉਠਾਇਆ ਤਾਂ ਛੇਤੀ-ਛੇਤੀ ਉਸ ਨੇ ਫਾਟਕ ਬੰਦ ਕੀਤਾ ਤੇ ਟ੍ਰੇਨ ਨੂੰ ਰਵਾਨਾ ਕੀਤਾ।

ਐਤਵਾਰ ਸਵੇਰੇ ਜਲੰਧਰ ਤੋਂ ਆ ਰਹੀ ਟ੍ਰੇਨ ਜੌੜਾ ਫਾਟਕ ‘ਤੇ ਪਹੁੰਚ ਗਈ ਪਰ ਗੇਟਮੈਨ ਨੂੰ ਫਾਟਕ ਬੰਦ ਨਹੀਂ ਕੀਤਾ। ਲੋਕਾਂ ਨੇ ਜਦੋਂ ਗੇਟਮੈਨ ਦੇ ਕਮਰੇ ‘ਚ ਦੇਖਿਆ ਤਾਂ ਉਹ ਸੌਂ ਰਿਹਾ ਸੀ। ਲੋਕਾਂ ਨੇ ਉਠਾਇਆ ਤਾਂ ਉਸ ਨੇ ਛੇਤੀ ਨਾਲ ਫਾਟਕ ਬੰਦ ਕੀਤਾ। ਜਦੋਂ ਲੋਕਾਂ ਨੇ ਉਸ ਨੂੰ ਝਾੜ ਪਾਈ ਤਾਂ ਬਹਾਨੇਬਾਜ਼ੀ ਕਰਨ ਲੱਗਾ। ਕਦੀ ਬੋਲਿਆ ਟ੍ਰੇਨ ਨਹੀਂ ਆਉਣੀ ਸੀ ਤੇ ਕਦੀ ਬੋਲਿਆ ਫਾਟਕ ਖਰਾਬ ਹੈ।

ਦੱਸ ਦੇਈਏ ਕਿ 1 ਸਤੰਬਰ ਨੂੰ ਵੀ ਜੌੜਾ ਫਾਟਕ ‘ਤੇ ਤਿੰਨ ਟ੍ਰੇਨਾਂ ਖੁੱਲ੍ਹੇ ਫਾਟਕ ਤੋਂ ਲੰਘ ਗਈਆਂ ਸਨ। ਉਦੋਂ ਵੀ ਗੇਟਮੈਨ ਨੇ ਗ਼ਲਤੀ ਮੰਨਣ ਦੀ ਬਜਾਏ ਉੱਥੇ ਪੁੱਜੇ ਮੀਡੀਆ ਮੁਲਾਜ਼ਮਾਂ ਨਾਲ ਹੀ ਬਦਤਮੀਜ਼ੀ ਕੀਤੀ ਸੀ। ਇਸ ਦੀ ਸ਼ਿਕਾਇਤ ਕੀਤੀ ਗਈ ਸੀ ਤੇ ਗੇਟਮੈਨ ਨੂੰ ਫਿਰੋਜ਼ਪੁਰ ਡਵੀਜ਼ਨ ਤਲਬ ਵੀ ਕੀਤਾ ਗਿਆ ਸੀ ਪਰ ਕੋਈ ਕਾਰਵਾਈ ਨਹੀਂ ਹੋਈ। ਇਹ ਉਹੀ ਜੌੜਾ ਫਾਟਕ ਹੈ ਜਿੱਥੇ ਸਾਲ 2018 ‘ਚ ਦੁਸਹਿਰੇ ਵਾਲੇ ਦਿਨ 59 ਲੋਕਾਂ ਦੀ ਜਾਨ ਚਲੀ ਗਈ ਸੀ ਤੇ ਸੌ ਤੋਂ ਜ਼ਿਆਦਾ ਲੋਕ ਜ਼ਖ਼ਮੀ ਹੋਏ ਸਨ।