ਵਿਦੇਸ਼ੀ ਲੜਕੀ ਦੀ ਚੁੰਗਲ ‘ਚ ਫਸੇ ਪੰਜਾਬੀ ਨੌਜਵਾਨ ਨੇ ਗੁਆਏ 9.30 ਲੱਖ, ਸੱਤ ਵਿਅਕਤੀਆਂ ਖ਼ਿਲਾਫ਼ ਮਾਮਲਾ ਦਰਜ

ਅੰਮ੍ਰਿਤਸਰ : ਥਾਣਾ ਛੇਹਰਟਾ ਦੀ ਪੁਲਿਸ ਨੇ ਹਨੀ ਟਰੈਪ ਵਿਚ ਫਸਾ ਕੇ 9.30 ਲੱਖ ਰੁਪਏ ਠੱਗਣ ਦੇ ਦੋਸ਼ ਤਹਿਤ ਲਾਲ ਹਰਿਤਪੁਰੀਆ, ਸੁਨੀਤਾ ਪਟੇਲ, ਅਬਦੁਲ ਅਮਤਿਆਜ਼ ਖਾਨ, ਪੰਕਜ ਦਯਾ ਠਾਕੁਰ, ਅਭਿਜੀਤ ਘੋਸ਼, ਸ਼ੀਤਲ ਦਾਸ ਤੇ ਚਿਨਮਏਨੰਦ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ। ਇਹ ਕਿਸ ਸੂਬੇ ਦੇ ਰਹਿਣ ਵਾਲੇ ਹੈ, ਕੁਝ ਪਤਾ ਨਹੀਂ ਹੈ। ਆਫਿਸਰ ਕਾਲੋਨੀ ਛੇਹਰਟਾ ਵਾਸੀ ਆਨੰਦ ਕੁਮਾਰ ਅਨੁਸਾਰ ਫੇਸਬੁੱਕ ’ਤੇ ਉਸ ਨੂੰ ਵਿਦੇਸ਼ੀ ਲੜਕੀ ਨੇ ਗੱਲਾਂ ’ਚ ਲਗਾ ਕੇ ਫਸਾ ਲਿਆ। ਇਕ ਦਿਨ ਉਸ ਨੂੰ ਮੈਸੇਂਜਰ ’ਤੇ ਸੁਨੇਹਾ ਮਿਲਿਆ ਕਿ ਲੜਕੀ ਉਸ ਨੂੰ ਗਿਫ਼ਟ ਭੇਜਣਾ ਚਾਹੁੰਦੀ ਹੈ। ਲੜਕੀ ਨੇ ਗਿਫ਼ਟ ਕੋਰੀਅਰ ਦੀ ਰਸੀਦ ਵੀ ਭੇਜ ਦਿੱਤੀ। ਉਸ ਨੂੰ ਕੋਰੀਅਰ ਕੰਪਨੀ ਵੱਲੋਂ ਫੋਨ ਵੀ ਆ ਗਿਆ ਕਿ ਤੁਹਾਡਾ ਜੋ ਪਾਰਸਲ ਆਇਆ ਹੈ, ਉਸ ਨੂੰ ਛਡਵਾਉਣ ਲਈ 35 ਹਜ਼ਾਰ ਰੁਪਏ ਲੱਗਣਗੇ। ਉਸ ਨੇ 35 ਹਜ਼ਾਰ ਰੁਪਏ ਦੇ ਦਿੱਤੇ। ਇਸ ਤੋਂ ਬਾਅਦ ਉਹ ਉਸ ਲੜਕੀ ਦੇ ਜਾਲ ਵਿਚ ਪੂਰੀ ਤਰ੍ਹਾਂ ਫਸ ਗਿਆ। ਉਸ ਨੂੰ ਦੁਬਾਰਾ ਫੋਨ ਆਇਆ। ਉਸ ਨੂੰ ਫੋਨ ’ਤੇ ਧਮਕੀ ਦਿੱਤੀ ਗਈ ਕਿ ਪੈਕੇਟ ਵਿਚ ਗਿਫਟ ਨਹੀਂ, 80 ਹਜ਼ਾਰ ਪਾਊਂਡ ਹਨ। ਇਹ ਰਕਮ ਬਹੁਤ ਜ਼ਿਆਦਾ ਹੈ ਤੇ ਗ਼ੈਰ-ਕਾਨੂੰਨੀ ਵੀ ਹੈ। ਹੁਣ ਤੈਨੂੰ ਗ੍ਰਿਫ਼ਤਾਰ ਕੀਤਾ ਜਾਵੇਗਾ। ਇਹ ਸੁਣ ਕੇ ਉਹ ਘਬਰਾ ਗਿਆ ਅਤੇ ਕਿਸੇ ਨੂੰ ਇਸ ਦੀ ਜਾਣਕਾਰੀ ਨਹੀਂ ਦਿੱਤੀ। ਬਾਅਦ ਵਿਚ ਉਸ ਲੜਕੀ ਨੇ ਉਸ ਨੂੰ ਬਲੈਕਮੇਲ ਕਰਨਾ ਸ਼ੁਰੂ ਕਰ ਦਿੱਤਾ। ਕਦੇ ਉਸ ਤੋਂ 50 ਹਜ਼ਾਰ ਰੁਪਏ ਲਏ ਗਏ ਤੇ ਕਦੇ 80 ਹਜ਼ਾਰ। ਉਸ ਨੇ ਇਹ ਰਾਸ਼ੀ ਵੱਖ-ਵੱਖ ਅਕਾਊਂਟ ਵਿਚ ਜਮ੍ਹਾਂ ਕਰਵਾਏ। ਉਸ ਨੇ ਕਰੀਬ 9.30 ਲੱਖ ਰੁਪਏ ਲੜਕੀ ਦੇ ਅਕਾਊਂਟ ਵਿਚ ਜਮ੍ਹਾਂ ਕਰਵਾ ਦਿੱਤੇ ਸਨ।

ਥਾਣਾ ਛੇਹਰਟਾ ਦੇ ਐੱਸਐੱਚਓ ਸੁਖਬੀਰ ਸਿੰਘ ਨੇ ਦੱਸਿਆ ਕਿ ਜਿਨ੍ਹਾਂ ਨੰਬਰਾਂ ਤੋਂ ਆਨੰਦ ਨੂੰ ਫੋਨ ਆਏ ਸਨ, ਉਹ ਸਾਰੇ ਫੇਕ ਹਨ। ਜ਼ਿਆਦਾਤਰ ਫੋਨ ਬੰਦ ਹੋ ਚੁੱਕੇ ਹਨ। ਪੁਲਿਸ ਦੇ ਕੋਲ ਨਾਵਾਂ ਤੋਂ ਇਲਾਵਾ ਕੁਝ ਵੀ ਨਹੀਂ ਹੈ। ਜਿਨ੍ਹਾਂ ਬੈਂਕ ਅਕਾਊਂਟ ਵਿਚ ਪੈਸੇ ਪਾਏ ਗਏ ਸਨ, ਦਾ ਵੇਰਵਾ ਕਢਵਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।