ਦੋ ਬੱਚਿਆਂ ਦੀ ਮਾਂ ਪ੍ਰੇਮੀ ਨਾਲ ਭੱਜੀ, ਦੁਖੀ ਵਿਅਕਤੀ ਨੇ ਖ਼ੁਦ ਨੂੰ ਅੱਗ ਲਾ ਕੇ ਦਿੱਤੀ ਜਾਨ

ਲੁਧਿਆਣਾ : ਲੁਧਿਆਣਾ ਵਿਚ ਪਤਨੀ ਦੇ ਪ੍ਰੇਮੀ ਨਾਲ ਭੱਜ ਜਾਣ ਤੋਂ ਦੁਖੀ ਹੋਏ ਗੁਰਦੀਪ ਸਿੰਘ ਨੇ ਖ਼ੁਦ ’ਤੇ ਤੇਲ ਛਿੜਕ ਕੇ ਅੱਗ ਲਾ ਲਈ। ਇਲਾਜ ਦੌਰਾਨ ਪੀਜੀਆਈ ਚੰਡੀਗੜ੍ਹ ਵਿਚ ਉਸਦੀ ਮੌਤ ਹੋ ਗਈ। ਹੁਣ ਥਾਣਾ ਟਿੱਬਾ ਪੁਲਿਸ ਨੇ ਪਤਨੀ ਸਣੇ 5 ਲੋਕਾਂ ਖ਼ਿਲਾਫ਼ ਆਤਮ ਹੱਤਿਆ ਨੂੰ ਉਕਸਾਉਣ ਦੇ ਦੋਸ਼ ਵਿਚ ਕੇਸ ਦਰਜ ਕਰ ਕੇ ਉਨ੍ਹਾਂ ਦੀ ਭਾਲ ਸ਼ੁਰੂ ਕੀਤੀ ਹੈ। ਏਐੱਸਆਈ ਸੁਖਦੇਵ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੀ ਪਛਾਣ ਕੰਪਨੀ ਬਾਗ ਨਿਵਾਸੀ ਪ੍ਰੀਤੀ ਰਾਣੀ (ਪਤਨੀ), ਮਾਨਸਾ ਦੇ ਬਿਜਲੀ ਗਰਿੱਡ ਸਾਈਡ ਗਲੀ ਨੰ. 5 ਨਿਵਾਸੀ ਰਾਮਦੇਵ ਵਾਰਵ (ਸਹੁਰਾ), ਸੋਮਾ ਦੇਵੀ (ਸੱਸ), ਕੰਪਨੀ ਬਾਗ ਦੀ ਗਲੀ ਨੰ. 1 ਨਿਵਾਸੀ ਵਿਕਰਮ ਕੁਮਾਰ (ਪ੍ਰੀਤੀ ਦਾ ਪ੍ਰੇਮੀ) ਤੇ ਚੰਦਰਪਾਲ (ਵਿਕਰਮ ਦਾ ਪਿਤਾ) ਦੇ ਰੂਪ ਵਿਚ ਹੋਈ।

ਪੁਲਿਸ ਨੇ ਟਿੱਬਾ ਰੋਡ ਦੇ ਕੰਪਨੀ ਬਾਗ ਦੀ ਗਲੀ ਨੰ. 1 ਨਿਵਾਸੀ ਪਰਵੀਨ ਕਾਂਤਾ ਦੀ ਸ਼ਿਕਾਇਤ ’ਤੇ ਉਨ੍ਹਾਂ ਖ਼ਿਲਾਫ਼ ਕੇਸ ਦਰਜ ਕੀਤਾ। ਆਪਣੇ ਬਿਆਨ ਵਿਚ ਮਹਿਲਾ ਨੇ ਦੱਸਿਆ ਕਿ 2013 ਵਿਚ ਉਸਦੇ ਬੇਟੇ ਗੁਰਦੀਪ ਸਿੰਘ ਦਾ ਵਿਆਹ ਪ੍ਰੀਤੀ ਰਾਣੀ ਨਾਲ ਹੋਇਆ ਸੀ। ਦੋਵਾਂ ਦੇ ਦੋ ਬੇਟੇ ਹਨ। ਉਸੇ ਦਰਮਿਆਨ ਪ੍ਰੀਤੀ ਰਾਣੀ ਦੇ ਵਿਕਰਮ ਨਾਲ ਪ੍ਰੇਮ ਸੰਬੰਧ ਬਣ ਗਏ। ਉਹ ਉਸਦੇ ਨਾਲ ਭੱਜ ਗਈ। ਬਾਅਦ ਵਿਚ ਉਸਦੇ ਵਾਪਸ ਆਉਣ ’ਤੇ ਮਾਨਸਾ ਵਿਚ ਹੋਈ ਪੰਚਾਤਿ ਵਿਚ ਉਸਨੇ ਫਿਰ ਤੋਂ ਨਾ ਭੱਜਣ ਦੀ ਤੌਬਾ ਕੀਤੀ। ਉਸ ਵਿਚ ਉਸਦੇ ਮਾਤਾ-ਪਿਤਾ ਨੇ ਵੀ ਉਸਦੀ ਗਵਾਹੀ ਦਿੱਤੀ, ਪਰ ਉੱਥੋਂ ਘਰ ਵਾਪਿਸ ਆਉਣ ਤੋਂ ਬਾਅਦ ਉਹ ਫਿਰ ਤੋਂ ਉਸਦੇ ਨਾਲ ਭੱਜ ਗਈ। ਇਸ ਤੋਂ ਬਾਅਦ ਗੁਰਦੀਪ ਬੇਹੱਦ ਪਰੇਸ਼ਾਨ ਰਹਿਣ ਲੱਗਾ ਸੀ।

30 ਸਤੰਬਰ ਨੂੰ ਉਸਨੇ ਖ਼ੁਦ ’ਤੇ ਤੇਲ ਛਿੜਕ ਕੇ ਅੱਗ ਲਗਾ ਲਈ। 4 ਅਕਤੂਬਰ ਨੂੰ ਉਸਨੇ ਹਸਪਤਾਲ ਵਿਚ ਦਮ ਤੋੜ ਦਿੱਤਾ। ਉਸਦੀ ਮੌਤ ਤੋਂ ਬਾਅਦ ਪਰਿਵਾਰ ਨੂੰ ਬੈੱਡ ਹੇਠਾਂ ਪਿਆ ਸੁਸਾਈਡ ਨੋਟ ਮਿਲਿਆ, ਜਿਸ ਵਿਚ ਉਸਨੇ ਆਪਣੀ ਮੌਤ ਲਈ ਉਕਤ ਪੰਜਾਂ ਨੂੰ ਜ਼ਿੰਮੇਵਾਰ ਦੱਸਿਆ। ਸੁਖਦੇਵ ਸਿੰਘ ਨੇ ਕਿਹਾ ਕਿ ਦੋਸ਼ੀਆਂ ਦੀ ਗਿ੍ਰਫ਼ਤਾਰੀ ਲਈ ਉਨ੍ਹਾਂ ਦੇ ਟਿਕਾਣਿਆਂ ’ਤੇ ਛਾਪੇ ਮਾਰੇ ਜਾ ਰਹੇ ਹਨ।