ਟਰਾਂਸਪੋਰਟਰ ’ਤੇ ਜਾਨਲੇਵਾ ਹਮਲਾ, ਮਾਲ ਨਾਲ ਭਰਿਆ ਟਰੱਕ ਖੋਹ ਕੇ ਲੁਟੇਰੇ ਫਰਾਰ, ਦੋ ਦਰਜਨ ਲੋਕਾਂ ਵਿਰੁੱਧ ਕੇਸ ਦਰਜ

ਫਤਿਆਬਾਦ : ਸ੍ਰੀ ਗੋਇੰਦਵਾਲ ਸਾਹਿਬ ਵਿਖੇ ਸਥਿਤ ਪੇਂਟ ਫੈਕਟਰੀ ’ਚੋਂ ਮਾਲ ਲੋਡ ਕਰਨ ਦਾ ਠੇਕਾ ਲੈਣ ਦੀ ਰੰਜਿਸ਼ ਰੱਖਦਿਆਂ ਟਰਾਂਸਪੋਰਟਰ ਉੱਪਰ ਕਥਿਤ ਤੌਰ ’ਤੇ ਜਾਨਲੇਵਾ ਹਮਲਾ ਕਰਕੇ ਸਮਾਨ ਨਾਲ ਭਰਿਆ ਟਰੱਕ ਖੋਹਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਥਾਣਾ ਗੋਇੰਦਵਾਲ ਸਾਹਿਬ ਦੀ ਪੁਲਿਸ ਨੇ ਇਕ ਦਰਜਨ ਲੋਕਾਂ ਦੇ ਖਿਲਾਫ ਕਾਤਲਾਨਾਂ ਹਮਲਾ ਕਰਨ ਸਮੇਤ ਹੋਰ ਸੰਗੀਨ ਧਾਰਾਵਾਂ ਤਹਿਤ ਮੁਕੱਦਮਾਂ ਦਰਜ ਕਰਕੇ ਸੱਤ ਲੋਕਾਂ ਨੂੰ ਗਿ੍ਰਫਤਾਰ ਵੀ ਕਰ ਲਿਆ ਹੈ।

ਅਵਤਾਰ ਸਿੰਘ ਪੁੱਤਰ ਮੰਗਲ ਸਿੰਘ ਵਾਸੀ ਸ੍ਰੀ ਗੋਇੰਦਵਾਲ ਸਾਹਿਬ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਦੱਸਿਆ ਕਿ ਉਸਨੇ ਤੇ ਉਸਦੇ ਭਰਾ ਨੇ ਅਮਨ ਗੁੱਡਜ਼ ਕੈਰੀਅਰ ਫਤਿਆਬਾਦ ਦੇ ਨਾਂ ’ਤੇ ਟਰਾਂਸਪੋਰਟ ਬਣਾਈ ਹੋਈ ਹੈ। ਉਨ੍ਹਾਂ ਨੇ ਕਸਬਾ ਸ੍ਰੀ ਗੋਇੰਦਵਾਲ ਸਾਹਿਬ ’ਚ ਸਥਿਤ ਨੈਰੋਲਕ ਫੈਕਟਰੀ ਵਿਚੋਂ ਮਾਲ ਢੋਹਣ ਲਈ ਸਾਲ ਦਾ ਟੈਂਡਰ ਹਾਸਲ ਕੀਤਾ ਹੋਇਆ ਹੈ। ਉਨ੍ਹਾਂ ਕਥਿਤ ਤੌਰ ’ਤੇ ਦੋਸ਼ ਲਗਾਇਆ ਕਿ ਸੁਖਦੇਵ ਸਿੰਘ ਜਿਸਨੇ ਆਪਣੇ ਕੁਝ ਸਾਥੀਆਂ ਅਤੇ ਡਰਾਈਵਰਾਂ ਨਾਲ ਮਿਲਕੇ ਅਣ ਅਧਿਕਾਰਤ ਯੂਨੀਅਨ ਬਣਾਈ ਹੈ, ਉਹ ਲੋਕ ਉਨ੍ਹਾਂ ਨੂੰ ਲੈਰੋਲਕ ਫੈਕਟਰੀ ’ਚੋਂ ਢੋਆ-ਢੁਆਈ ਕਰਨ ਤੋਂ ਰੋਕਦੇ ਸਨ, ਜਿਸਦਾ ਮੋਹਤਬਰਾਂ ਨੇ ਰਾਜ਼ੀਨਾਮਾ ਕਰਵਾ ਦਿੱਤਾ ਸੀ।

ਪਰ ਉਕਤ ਲੋਕ ਫਿਰ ਵੀ ਉਨ੍ਹਾਂ ਕੋਲੋਂ ਸਮਾਨ ਲੋਡ ਕਰਨ ਦੇ ਪੈਸੇ ਮੰਗਦੇ ਅਤੇ ਕਈ ਵਾਰ ਪੈਸੇ ਲੈ ਵੀ ਚੁੱਕੇ ਹਨ। ਲੰਘੇ ਦਿਨ ਉਹ ਆਪਣੇ ਟਰੱਕ ਨੰਬਰ ਪੀਬੀ46-ਐੱਮ 9497 ’ਤੇ ਚਾਲਕ ਸਮੇਤ ਫੈਕਟਰੀ ’ਚੋਂ ਪੇਂਟ ਲੱਦ ਕੇ ਮਨਜਿੰਦਰ ਸਿੰਘ ਜੋ ਉਨ੍ਹਾਂ ਦੇ ਨਾਲ ਵਾਲੀ ਸੀਟ ’ਤੇ ਬੈਠਾ ਸੀ ਸਮੇਤ ਬਾਹਰ ਆ ਰਿਹਾ ਸੀ ਤਾਂ ਸੁਖਦੇਵ ਸਿੰਘ ਆਦਿ ਨੇ ਉਨ੍ਹਾਂ ਉਪਰ ਹਮਲਾ ਕਰ ਦਿੱਤਾ। ਉਨ੍ਹਾਂ ਦੱਸਿਆ ਕਿ ਦੋਵਾਂ ਦੀ ਕੁੱਟਮਾਰ ਕੀਤੀ ਅਤੇ ਜਦੋਂ ਉਹ ਟਰੱਕ ’ਤੇ ਚੜ੍ਹਨ ਲੱਗਾ ਤਾਂ ਮੁਲਜਮ ਚਾਬੀ ਖੋਹ ਕੇ ਟਰੱਕ ਜਿਸ ਵਿਚ 90-95 ਹਜ਼ਾਰ ਦੀ ਨਕਦੀ ਤੋਂ ਇਲਾਵਾ ਫੈਕਟਰੀ ਦਾ ਸਮਾਨ ਲੱਦਿਆ ਸੀ ਲੈ ਕੇ ਫਰਾਰ ਹੋ ਗਏ। ਜ਼ਖ਼ਮੀ ਹੋਣ ਕਰਕੇ ਉਸ ਨੂੰ ਖਡੂਰ ਸਾਹਿਬ ਦੇ ਸਰਕਾਰੀ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ ਹੈ। ਮੌਕੇ ’ਤੇ ਪਹੁੰਚੇ ਏਐੱਸਆਈ ਅਵਤਾਰ ਸਿੰਘ ਨੇ ਦੱਸਿਆ ਕਿ ਅਵਤਾਰ ਸਿੰਘ ਦੀ ਸ਼ਿਕਾਇਤ ’ਤੇ ਸੁਖਦੇਵ ਸਿੰਘ ਪੁੱਤਰ ਗੁਰਾ ਸਿੰਘ ਵਾਸੀ ਭੈਲ ਢਾਏ ਵਾਲਾ, ਹਰਜੀਤ ਸਿੰਘ ਪੁੱਤਰ ਕਿਰਪਾਲ ਸਿੰਘ ਵਾਸੀ ਧੂੰਦਾ, ਜਸਪਾਲ ਸਿੰਘ ਪੁਤੱਰ ਤੇਜਾ ਸਿੰਘ ਵਾਸੀ ਫਤਿਆਬਾਦ, ਅਮਨਪ੍ਰੀਤ ਸਿੰਘ ਪੁੱਤਰ ਹਰਦੇਵ ਸਿੰਘ ਵਾਸੀ ਸ੍ਰੀ ਗੋਇੰਦਵਾਲ ਸਾਹਿਬ, ਰਣਜੀਤ ਸਿੰਘ ਪੁੱਤਰ ਚੈਨ ਸਿੰਘ ਵਾਸੀ ਵੇਂਈ ਪੂਈ, ਅਵਤਾਰ ਸਿੰਘ ਪੁੱਤਰ ਹਰਜਿੰਦਰ ਸਿੰਘ ਵਾਸੀ ਧੂੰਦਾ, ਹਰਵਿੰਦਰ ਸਿੰਘ ਪੁੱਤਰ ਮੰਗਲ ਸਿੰਘ ਵਾਸੀ ਕੱਲ੍ਹਾ, ਹਰਜਿੰਦਰ ਸਿੰਘ ਪੁੱਤਰ ਵਰਿਆਮ ਸਿੰਘ, ਹਰਜਿੰਦਰ ਸਿੰਘ ਪੁੱਤਰ ਦਿਆਲ ਸਿੰਘ ਵਾਸੀ ਧੂੰਦਾ, ਅਮਰਜੀਤ ਸਿੰਘ ਪੁੱਤਰ ਗੁਰਨਾਮ ਸਿੰਘ ਵਾਸੀ ਖੇਲਾ, ਜਸਵੰਤ ਸਿੰਘ ਪੁੱਤਰ ਗੁਰਦੀਪ ਸਿੰਘ ਵਾਸੀ ਫਤਿਆਬਾਦ ਅਤੇ ਜਸਵੰਤ ਸਿੰਘ ਪੁੱਤਰ ਮੁਖਤਿਆਰ ਸਿੰਘ ਵਾਸੀ ਧੂੰਦਾ ਸਮੇਤ 12 ਅਣਪਛਾਤੇ ਲੋਕਾਂ ਵਿਰੁੱਧ ਕੇਸ ਦਰਜ ਕੀਤਾ ਗਿਆ ਹੈ ਅਤੇ ਪਹਿਲੇ ਸੱਤ ਮੁਲਜ਼ਮਾਂ ਨੂੰ ਬਕਾਇਦਾ ਗਿ੍ਰਫਤਾਰ ਵੀ ਕਰ ਲਿਆ ਗਿਆ ਹੈ।