ਜਾਨ ਜ਼ੋਖਮ ‘ਚ ਪਾ ਕੇ ਨੌਜਵਾਨ ਨੂੰ ਰੇਲਗੱਡੀ ਹੇਠ ਆਉਣ ਤੋਂ ਬਚਾਇਆ

ਫਿਲੌਰ : ਰੇਲਵੇ ਸਟੇਸ਼ਨ ਫਿਲੌਰ ‘ਤੇ ਜਦੋਂ ਅਮਰਪਾਲੀ ਰੇਲਗੱਡੀ ਲੁਧਿਆਣੇ ਤੋਂ ਜਲੰਧਰ ਵੱਲ ਚੱਲਣ ਲੱਗੀ ਤਾਂ ਇਕ ਨੌਜਵਾਨ ਨੇ ਚਲਦੀ ਗੱਡੀ ‘ਚੋਂ ਛਾਲ ਮਾਰ ਦਿੱਤੀ। ਉਸ ਵੇਲੇ ਪਲੇਟ ਫਾਰਮ ‘ਤੇ ਹਾਜ਼ਰ ਪੰਜਾਬ ਹੋਮ ਗਾਰਡ ਦੇ ਜਵਾਨ ਕਮਲਜੀਤ ਸਿੰਘ ਨੇ ਉਸ ਨੂੰ ਡਿੱਗਦੇ ਨੂੰ ਵੇਖਿਆ ਅਤੇ ਦੌੜ ਕੇ ਉਸ ਨੂੰ ਰੇਲਗੱਡੀ ਹੇਠਾਂ ਆਉਣ ਤੋਂ ਬਚਾਅ ਲਿਆ। ਇਸ ਬਾਰੇ ਚੌਕੀ ਇੰਚਾਰਜ ਧਰਮਪਾਲ ਨੇ ਦੱਸਿਆ ਕਿ ਗੱਡੀ ‘ਚੋਂ ਹੇਠਾਂ ਡਿੱਗਣ ਕਾਰਨ ਉਕਤ ਨੌਜਵਾਨ ਦੇ ਸੱਟਾਂ ਵੀ ਲੱਗੀਆਂ ਹਨ ਤੇ ਕਮਲਜੀਤ ਨੇ ਉਸ ਨੂੰ ਚੁੱਕਿਆ। ਨੇੜਲੇ ਹਸਪਤਾਲ ਤੋਂ ਮੱਲ੍ਹਮ ਪੱਟੀ ਕਰਵਾਉਣ ਉਪਰੰਤ ਰੇਲਵੇ ਪੁਲਿਸ ਚੌਕੀ ਲਿਆਂਦਾ। ਪੁੱਛਗਿੱਛ ‘ਤੇ ਉਸ ਨੌਜਵਾਨ ਨੇ ਦੱਸਿਆ ਕਿ ਉਸ ਦਾ ਨਾਂ ਫੁਰਸਤ ਅਲੀ ਪੁੱਤਰ ਅਮੀਰ ਅਲੀ ਵਾਸੀ ਉੱਤਰ ਦਿਨਜ਼ਪੁਰ (ਪੱਛਮੀ ਬੰਗਾਲ) ਹੈ। ਉਸ ਨੇ ਦੱਸਿਆ ਕਿ ਉਹ ਆਪਣੇ ਪਿੰਡ ਤੋਂ ਲੁਧਿਆਣਾ ਸ਼ਹਿਰ ਆ ਰਿਹਾ ਸੀ ਪਰ ਨੀਂਦ ਆਉਣ ਕਾਰਨ ਉਸ ਨੂੰ ਲੁਧਿਆਣਾ ਆਉਣ ਦਾ ਪਤਾ ਨਹੀਂ ਲੱਗ ਸਕਿਆ, ਜਦੋਂ ਗੱਡੀ ਫਿਲੌਰ ਤੋਂ ਚੱਲੀ ਤਾਂ ਅੱਖ ਖੁੱਲ੍ਹਣ ‘ਤੇ ਕਿਸੇ ਨੂੰ ਪੁੱਛਣ ‘ਤੇ ਪਤਾ ਲੱਗਾ ਕਿ ਲੁਧਿਆਣਾ ਤਾਂ ਪਿੱਛੇ ਰਹਿ ਗਿਆ ਹੈ ਤੇ ਘਬਰਾਹਟ ਵਿਚ ਉਸ ਨੇ ਚੱਲਦੀ ਗੱਡੀ ‘ਚੋਂ ਛਾਲ ਮਾਰ ਦਿੱਤੀ ਪਰ ਪੁਲਿਸ ਦੇ ਜਵਾਨ ਕਮਲਜੀਤ ਨੇ ਉਸ ਨੂੰ ਗੱਡੀ ਹੇਠਾਂ ਆਉਣ ਤੋਂ ਬਚਾ ਲਿਆ। ਉਸ ਦਾ ਚਾਚਾ ਮੋਹਸਿਨ ਅਲੀ ਫਿਲੌਰ ਦੇ ਪਿੰਡ ਮਨਸੂਰਪੁਰ (ਫਿਲੌਰ) ‘ਚ ਰਹਿੰਦਾ ਹੈ। ਸੁਨੇਹਾ ਮਿਲਣ ‘ਤੇ ਚਾਚਾ ਮੋਹਸਿਨ ਆਪਣੇ ਮਾਲਕ ਪਿ੍ਰਤਪਾਲ ਸਿੰਘ ਨੂੰ ਨਾਲ ਲੈ ਕੇ ਫਿਲੌਰ ਚੌਕੀ ਆ ਗਿਆ ਅਤੇ ਚੌਕੀ ਇੰਚਾਰਜ ਧਰਮਪਾਲ ਅਤੇ ਕਮਲਜੀਤ ਸਿੰਘ ਦਾ ਧੰਨਵਾਦ ਕੀਤਾ।