ਗੁੱਸੇ ‘ਚ ਆਏ ਵਿਅਕਤੀ ਵੱਲੋਂ ਬੱਚਿਆਂ ਸਾਹਮਣੇ ਪਤਨੀ ਦਾ ਕੁਹਾੜੀ ਮਾਰ ਕੇ ਕਤਲ

ਅਬੋਹਰ : ਸਬ-ਤਹਿਸੀਲ ਸੀਤੋ ਗੁੰਨੋ ਅਧੀਨ ਆਉਂਦੇ ਪਿੰਡ ਖ਼ੈਰਪੁਰ ਦੀ ਢਾਣੀ ਵਿਚ ਬੀਤੀ ਰਾਤ ਗੁੱਸੇ ਵਿਚ ਆਏ ਵਿਅਕਤੀ ਨੇ ਬੱਚਿਆਂ ਸਾਹਮਣੇ ਆਪਣੀ ਪਤਨੀ ਦਾ ਕੁਹਾੜੀ ਮਾਰ ਕੇ ਕਤਲ ਕਰ ਦਿੱਤਾ। ਇਸ ਦੌਰਾਨ ਬਚਾਅ ਲਈ ਆਏ ਆਪਣੇ ਸਾਲੇ ਨੂੰ ਕੁਹਾੜੀ ਨਾਲ ਜ਼ਖ਼ਮੀ ਕਰ ਕੇ ਉਹ ਫ਼ਰਾਰ ਹੋ ਗਿਆ।

ਵੀਰਵਾਰ ਸਵੇਰੇ ਜਿਵੇਂ ਹੀ ਪੁਲਿਸ ਮੌਕੇ ’ਤੇ ਪੁੱਜੀ ਤਾਂ ਰੋਂਦੇ ਹੋਏ ਬੱਚਿਆਂ ਨੇ ਪੁਲਿਸ ਨੂੰ ਵਾਰਦਾਤ ਬਾਰੇ ਦੱਸਿਆ। ਮ੍ਰਿਤਕਾ ਦੇ ਭਰਾ ਬੱਬਲੂ ਤੇ ਨਰੇਸ਼ ਵਾਸੀ ਅੰਮ੍ਰਿਤਪੁਰ, ਉੱਤਰ ਪ੍ਰਦੇਸ਼ ਨੇ ਦੱਸਿਆ ਕਿ ਉਸ ਦੀ ਭੈਣ ਰਮਾ ਦੇਵੀ ਦਾ ਵਿਆਹ ਬਿੱਲੂ ਨਾਲ ਕੁਝ ਸਾਲ ਪਹਿਲਾਂ ਹੋਇਆ ਸੀ। ਉਨ੍ਹਾਂ ਦੀ ਭੈਣ ਪਿੰਡ ਖ਼ੈਰਪੁਰ ਦੇ ਜਿਮੀਦਾਰ ਓਮ ਪ੍ਰਕਾਸ਼ ਕੋਲ ਆਪਣੇ ਬੱਚਿਆਂ ਨਿਧੀ (10 ਸਾਲ), ਅਨੂ (7 ਸਾਲ) ਅਤੇ ਕਾਕੂ (5 ਸਾਲ) ਨਾਲ ਨਰਮਾ ਚੁਗਣ ਆਈ ਸੀ ਜਦਕਿ ਜੀਜਾ ਬਿੱਲੂ ਹਫ਼ਤਾ ਪਹਿਲਾਂ ਹੀ ਯੂਪੀ ਤੋਂ ਖ਼ੈਰਪੁਰ ਆਇਆ ਸੀ।

ਬੀਤੀ ਸ਼ਾਮ ਜਦੋਂ ਰਮਾ ਕੱਪੜੇ ਧੋ ਰਹੀ ਸੀ ਤਾਂ ਉਸ ਦੇ ਪਤੀ ਨੇ 2 ਹਜ਼ਾਰ ਰੁਪਏ ਮੰਗੇ। ਉਸ ਦੀ ਭੈਣ ਨੇ ਸਵੇਰੇ ਜਿਮੀਦਾਰ ਤੋਂ ਰੁਪਏ ਲੈ ਕੇ ਦੇਣ ਦੀ ਗੱਲ ਕਹੀ ਤਾਂ ਬਿੱਲੂ ਨੇ ਉਥੇ ਨਾਲ ਹੀ ਪਈਆਂ ਇੱਟਾਂ ਨਾਲ ਪਤਨੀ ਨੂੰ ਜ਼ਖ਼ਮੀ ਕੀਤਾ। ਜਦੋਂ ਬਚਾਅ ਲਈ ਔਰਤ ਦੀ ਮਾਸੀ ਦਾ ਪੁੱਤਰ ਪੱਪੂ ਆਇਆ ਤਾਂ ਬਿੱਲੂ ਕਮਰੇ ਵਿਚ ਪਈ ਕੁਹਾੜੀ ਲੈ ਆਇਆ ਅਤੇ ਕੁਹਾੜੀ ਨਾਲ ਦੋਵਾਂ ਦੇ ਵਾਰ ਕਰ ਕੇ ਫ਼ਰਾਰ ਹੋ ਗਿਆ।

ਇਲਾਜ ਲਈ ਦੋਵਾਂ ਨੂੰ ਹਸਪਤਾਲ ਲਿਆਂਦਾ ਗਿਆ, ਜਿੱਥੇ ਦੇਰ ਰਾਤ ਰਮਾ ਨੇ ਦਮ ਤੋੜ ਦਿੱਤਾ। ਹਸਪਤਾਲ ਵਿਚ ਜ਼ੇਰੇ ਇਲਾਜ ਪੱਪੂ ਦੇ ਬਿਆਨ ਲੈਣ ਤੋਂ ਬਾਅਦ ਪੁਲਿਸ ਨੇ ਮ੍ਰਿਤਕ ਔਰਤ ਦੇ ਬੱਚਿਆਂ ਦੇ ਬਿਆਨ ਲਏ ਹਨ। ਇਸ ਦੌਰਾਨ ਬੱਚਿਆਂ ਨੇ ਰੋਂਦੇ ਹੋਏ ਸਾਰੀ ਹੱਡ ਬੀਤੀ ਸੁਣਾਈ ਹੈ।