ਲੁਧਿਆਣਾ : ਪੁਰਾਣੀ ਰੰਜਿਸ਼ ਦੇ ਚੱਲਦਿਆਂ ਸੰਜੇ ਗਾਂਧੀ ਕਾਲੋਨੀ ਰਹਿਣ ਵਾਲੇ ਵਿਅਕਤੀ ਅਤੇ ਉਸ ਦੀ ਸੱਸ ਉਪਰ ਹਮਲਾ ਕਰਨ ਦੇ ਆਰੋਪੀਆਂ ਖਿਲਾਫ ਥਾਣਾ ਟਿੱਬਾ ਪੁਲਿਸ ਵੱਲੋਂ ਵੱਖ-ਵੱਖ ਦੋਸ਼ਾਂ ਤਹਿਤ ਪਰਚਾ ਦਰਜ ਕੀਤਾ ਗਿਆ ਹੈ। ਪੁਲਿਸ ਨੇ ਇਹ ਮਾਮਲਾ ਸੰਜੇ ਗਾਂਧੀ ਕਾਲੋਨੀ ਦੇ ਰਹਿਣ ਵਾਲੇ ਵਿਕਰਮਜੀਤ ਸਿੰਘ ਦੇ ਬਿਆਨਾਂ ਉਪਰ ਬਾਬਾ ਨਾਮਦੇਵ ਕਲੋਨੀ ਵਾਸੀ ਬੇਅੰਤ ਸਿੰਘ, ਪੰਚਮ, ਰਾਕੇਸ਼, ਰਮਨ ਅਤੇ ਉਸਦੇ ਅਣਪਛਾਤੇ ਸਾਥੀ ਖ਼ਿਲਾਫ਼ ਦਰਜ ਕੀਤਾ ਹੈ।
ਵਿਕਰਮਜੀਤ ਸਿੰਘ ਮੁਤਾਬਕ ਉਸ ਦੀ ਪਤਨੀ ਨੇ ਆਪਣੇ ਮਾਤਾ-ਪਿਤਾ ਦੀ ਲੜਾਈ ਬਾਰੇ ਦੱਸਿਆ ਤਾਂ ਉਹ ਆਪਣੇ ਸਹੁਰੇ ਘਰ ਬਾਬਾ ਨਾਮਦੇਵ ਕਾਲੋਨੀ ਚਲਾ ਗਿਆ। ਮੌਕੇ ‘ਤੇ ਜਾ ਕੇ ਵੇਖਿਆ ਕਿ ਉਸ ਦੀ ਸੱਸ ਕਮਲੇਸ਼ ਨੂੰ ਆਰੋਪੀ ਬੇਅੰਤ ਸਿੰਘ ਸਰਪੰਚ ਅਤੇ ਕਰੀਬ ਦਰਜਨ ਭਰ ਨੌਜਵਾਨ ਘੇਰ ਕੇ ਖੜ੍ਹੇ ਸਨ। ਮੁੱਦਈ ਮੁਤਾਬਕ ਇਹ ਸਾਰੇ ਆਰੋਪੀ ਉਸ ਦੀ ਸੱਸ ਕਮਲੇਸ਼ ਨਾਲ ਗਾਲੀ ਗਲੋਚ ਕਰ ਰਹੇ ਸਨ। ਜਦ ਉਸ ਨੇ ਜਾ ਕੇ ਰੋਕਿਆ ਤਾਂ ਬੇਅੰਤ ਸਿੰਘ ਸਮੇਤ ਹੋਰ ਨਾਮਜ਼ਦ ਆਰੋਪੀਆਂ ਨੇ ਉਸ ਦੀ ਸੱਸ ਅਤੇ ਮੁੱਦਈ ਨਾਲ ਹੱਥੋਪਾਈ ਕਰਨੀ ਸ਼ੁਰੂ ਕਰ ਦਿੱਤੀ। ਉਨ੍ਹਾਂ ਜਾਨ ਬਚਾਉਣ ਲਈ ਰੌਲਾ ਪਾਉਣਾ ਸ਼ੁਰੂ ਕੀਤਾ ਤਾਂ ਆਰੋਪੀ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੰਦੇ ਹੋਏ ਮੌਕੇ ਤੋਂ ਫ਼ਰਾਰ ਹੋ ਗਏ।
ਸ਼ਿਕਾਇਤਕਰਤਾ ਮੁਤਾਬਕ ਉਸਦੀ ਸੱਸ ਨੇ ਸਰਪੰਚ ਬੇਅੰਤ ਦੇ ਪਿਤਾ ਖ਼ਿਲਾਫ਼ ਥਾਣੇ ਦਰਖਾਸਤ ਦਿੱਤੀ ਸੀ ਅਤੇ ਇਸ ਹਮਲੇ ਵਿੱਚ ਬੇਅੰਤ ਦੇ ਪਿਤਾ ਨੂੰ ਮਾਫ਼ੀ ਮੰਗ ਕੇ ਰਾਜ਼ੀਨਾਮਾ ਕਰਨਾ ਪਿਆ ਸੀ। ਇਸ ਗੱਲ ਤੋਂ ਰੰਜਿਸ਼ ਰੱਖਦਿਆਂ ਬੇਅੰਤ ਨੇ ਉਸ ਦੀ ਸੱਸ ਉੱਪਰ ਹਮਲਾ ਕੀਤਾ।
