ਜਲੰਧਰ : ਤਿੰਨ ਮਹੀਨਿਆਂ ਵਿਚ ਹੀ ਆਂਡੇ ਦੀ ਕੀਮਤ ਵਿਚ 100 ਰੁਪਏ ਪ੍ਰਤੀ ਸੌ ਦਾ ਵਾਧਾ ਹੋਇਆ ਹੈ। ਅਕਤੂਬਰ ਵਿਚ 421 ਰੁਪਏ ਪ੍ਰਤੀ ਸੌ ਦੇ ਹਿਸਾਬ ਨਾਲ ਵਿਕਣ ਵਾਲੇ ਅੰਡੇ ਇਨ੍ਹਾਂ ਦਿਨਾਂ ਵਿਚ 527 ਰੁਪਏ ਪ੍ਰਤੀ ਸੌ ਤਕ ਪਹੁੰਚ ਗਏ ਹਨ। ਅਜਿਹਾ ਸਰਦੀਆਂ ਦੇ ਮੌਸਮ ਕਾਰਨ ਨਹੀਂ ਸਗੋਂ ਮੰਗ ਤੇ ਸਪਲਾਈ ਵਿਚਕਾਰ ਅਸੰਤੁਲਨ ਕਾਰਨ ਹੈ। ਜੂਨ ਮਹੀਨੇ ਦੀ ਤਿੱਖੀ ਗਰਮੀ ਦੇ ਦਿਨਾਂ ਵਿਚ ਵੀ ਆਂਡਿਆਂ ਦੀ ਕੀਮਤ 500 ਰੁਪਏ ਪ੍ਰਤੀ ਸੌ ਨੂੰ ਪਾਰ ਕਰ ਗਈ ਸੀ। ਇਸ ਦੇ ਨਾਲ ਹੀ ਫਰਵਰੀ ‘ਚ ਠੰਡ ਹੋਣ ਦੇ ਬਾਵਜੂਦ ਆਂਡਿਆਂ ਦਾ ਰੇਟ 398 ਰੁਪਏ ਪ੍ਰਤੀ ਸੌ ਤਕ ਹੀ ਰਿਹਾ।
ਜ਼ਿਲ੍ਹੇ ਤੋਂ ਬਿਹਾਰ ਨੂੰ ਸਪਲਾਈ
ਜ਼ਿਲ੍ਹੇ ਵਿਚ ਕੁੱਲ 12 ਥੋਕ ਵਿਕਰੇਤਾ ਹਨ। ਜਲੰਧਰ ਤੋਂ ਦੇਸ਼ ਦੇ ਕਈ ਰਾਜਾਂ ਨੂੰ ਥੋਕ ਵਿਚ ਅੰਡੇ ਸਪਲਾਈ ਕੀਤੇ ਜਾਂਦੇ ਹਨ। ਇਸ ਵਿਚ ਜੰਮੂ, ਹਿਮਾਚਲ, ਬਿਹਾਰ, ਬੰਗਾਲ ਤੇ ਸ੍ਰੀਨਗਰ ਨੂੰ ਸਪਲਾਈ ਦਿੱਤੀ ਜਾਂਦੀ ਹੈ। ਇਸ ਸਬੰਧੀ ਥੋਕ ਆਂਡਿਆਂ ਦੇ ਵਪਾਰੀ ਜਸਵੰਤ ਸਿੰਘ ਸੇਤੀਆ ਦਾ ਕਹਿਣਾ ਹੈ ਕਿ ਸਮੇਂ ਦੇ ਬੀਤਣ ਨਾਲ ਯੂਪੀ ਅਤੇ ਬਿਹਾਰ ਵਿਚ ਪੋਲਟਰੀ ਦਾ ਕਾਰੋਬਾਰ ਸ਼ੁਰੂ ਹੋਣ ਤੋਂ ਬਾਅਦ ਹੁਣ ਉੱਥੇ ਸਪਲਾਈ ਘਟਦੀ ਜਾ ਰਹੀ ਹੈ। ਇਸ ਲਈ ਸ੍ਰੀਨਗਰ ਤੇ ਜੰਮੂ ਸਣੇ ਇਲਾਕਿਆਂ ਵਿਚ ਅੱਜ ਵੀ ਸਪਲਾਈ ਜਾਰੀ ਹੈ। ਹਾਲਾਂਕਿ ਬਰਫਬਾਰੀ ਕਾਰਨ ਆਉਣ ਵਾਲੇ ਦਿਨਾਂ ‘ਚ ਇੱਥੇ ਪਹੁੰਚਣ ਦੇ ਰਸਤੇ ਬੰਦ ਹੋ ਗਏ ਹਨ।
ਜ਼ਿਲ੍ਹੇ ਵਿਚ ਲੁਧਿਆਣਾ ਤੇ ਮਲੇਰਕੋਟਲਾ ਤੋਂ ਹੁੰਦੀ ਹੈ ਸਪਲਾਈ
ਅੰਡੇ ਵਪਾਰੀ ਰਾਜ ਕੁਮਾਰ ਦਾ ਕਹਿਣਾ ਹੈ ਕਿ ਜ਼ਿਲ੍ਹੇ ਵਿਚ ਲੁਧਿਆਣਾ, ਸਮਰਾਲਾ, ਮਲੇਰਕੋਟਲਾ, ਬਰਨਾਲਾ ਤੇ ਪਠਾਨਕੋਟ ਦੇ ਕੁਝ ਪੋਲਟਰੀ ਫਾਰਮ ਸਪਲਾਈ ਕਰਦੇ ਹਨ। ਉਨ੍ਹਾਂ ਦੱਸਿਆ ਕਿ ਸੂਬੇ ਵਿਚ ਸਭ ਤੋਂ ਵੱਧ ਪੋਲਟਰੀ ਫਾਰਮ ਲੁਧਿਆਣਾ ਤੇ ਪਠਾਨਕੋਟ ਵਿਚ ਹਨ। ਹਾਲਾਂਕਿ ਪਠਾਨਕੋਟ ਤੋਂ ਸਪਲਾਈ ਘੱਟ ਹੈ। ਕਿਉਂਕਿ ਉਥੋਂ ਜੰਮੂ ਨੂੰ ਸਪਲਾਈ ਕਰਨ ਦਾ ਰੁਝਾਨ ਜ਼ਿਆਦਾ ਹੈ।
ਅੰਡੇ ਵਿਚ ਵਿਟਾਮਿਨ ਬੀ ਦੀ ਭਰਪੂਰ ਮਾਤਰਾ ਹੁੰਦੀ ਹੈ
ਅੰਡੇ ਵਿਟਾਮਿਨ ਬੀ ਨਾਲ ਭਰਪੂਰ ਹੁੰਦੇ ਹਨ। ਡਾ: ਮੁਨੀਸ਼ ਮਹਿਤਾ ਦੱਸਦੇ ਹਨ ਕਿ ਵਿਟਾਮਿਨ ਬੀ ਤਣਾਅ ਘਟਾਉਣ ਵਿਚ ਮਦਦਗਾਰ ਹੁੰਦਾ ਹੈ। ਇਸ ਤੋਂ ਇਲਾਵਾ ਆਂਡੇ ‘ਚ ਮੌਜੂਦ ਵਿਟਾਮਿਨ ਡੀ ਅਤੇ ਪ੍ਰੋਟੀਨ ਵਰਗੇ ਪੋਸ਼ਕ ਤੱਤ ਹੱਡੀਆਂ ਨੂੰ ਮਜ਼ਬੂਤ ਬਣਾਉਣ ‘ਚ ਮਦਦਗਾਰ ਹੁੰਦੇ ਹਨ। ਉਬਲੇ ਅੰਡੇ ਦੇ ਅੰਦਰ ਦਾ ਪੀਲਾ ਹਿੱਸਾ ਸਰੀਰ ਵਿਚ ਆਇਰਨ ਦੀ ਕਮੀ ਨੂੰ ਪੂਰਾ ਕਰਦਾ ਹੈ। ਇਮਿਊਨਿਟੀ ਵਧਾਉਣ ਦੇ ਨਾਲ-ਨਾਲ ਭਾਰ ਨੂੰ ਕੰਟਰੋਲ ਕਰਨ ਲਈ ਵੀ ਅੰਡੇ ਦਾ ਸੇਵਨ ਕਰਨਾ ਚਾਹੀਦਾ ਹੈ। ਇਸ ਦੇ ਨਾਲ ਹੀ ਅੰਡੇ ਵਿਚ ਅਮੀਨੋ ਐਸਿਡ, ਫਾਸਫੋਰਸ ਸਣੇ ਕਈ ਗੁਣ ਮੌਜੂਦ ਹੁੰਦੇ ਹਨ।
ਦੋ ਰੰਗਦਾਰ ਅੰਡੇ ਖਾਣ ਯੋਗ
ਅੰਡੇ ਦੀਆਂ ਦੋ ਕਿਸਮਾਂ ਖਾਣ ਯੋਗ ਹੁੰਦੀਆਂ ਹਨ। ਜਿਸ ਵਿਚ ਇਕ ਚਿੱਟਾ ਤੇ ਦੂਜਾ ਭੂਰਾ ਹੁੰਦਾ ਹੈ। ਅੰਡੇ ਵਪਾਰੀ ਜਸਪਾਲ ਸਿੰਘ ਦਾ ਕਹਿਣਾ ਹੈ ਕਿ ਭੂਰੇ ਰੰਗ ਦਾ ਆਂਡਾ ਲਾਲ ਮੁਰਗੇ ਦਾ ਹੁੰਦਾ ਹੈ, ਜਿਸ ਨੂੰ ਦੇਸੀ ਵੀ ਕਿਹਾ ਜਾਂਦਾ ਹੈ। ਇਸੇ ਤਰ੍ਹਾਂ ਚਿੱਟਾ ਆਂਡਾ ਚਿੱਟੀ ਮੁਰਗੀ ਦਾ ਹੁੰਦਾ ਹੈ। ਭੂਰੇ ਰੰਗ ਦੇ ਮੁਰਗੀਆਂ ਦੀ ਗਿਣਤੀ ਘੱਟ ਹੁੰਦੀ ਹੈ।
ਸਾਲ ਭਰ ਦੀਆਂ ਕੀਮਤਾਂ ਵਿਚ ਤਬਦੀਲੀ ਦਾ ਅੰਕੜਾ
ਜਨਵਰੀ: 409 ਰੁਪਏ
ਫਰਵਰੀ: 398 ਰੁਪਏ
ਮਾਰਚ: 384 ਰੁਪਏ
ਅਪ੍ਰੈਲ: 369 ਰੁਪਏ
ਮਈ: 350 ਰੁਪਏ
ਜੂਨ: 502 ਰੁਪਏ
ਜੁਲਾਈ: 496 ਰੁਪਏ
ਅਗਸਤ: 414 ਰੁਪਏ
ਸਤੰਬਰ: 442 ਰੁਪਏ
ਅਕਤੂਬਰ: 421 ਰੁਪਏ
ਨਵੰਬਰ: 510 ਰੁਪਏ
ਦਸੰਬਰ: 527 ਰੁਪਏ
