ਜੇਐੱਨਐੱਨ, ਜੈਪੁਰ : ਰਾਜਸਥਾਨ ਦੇ ਹਨੂੰਮਾਨਗੜ੍ਹ ਜ਼ਿਲ੍ਹੇ ਵਿਚ 15 ਸਾਲ ਦੇ ਇਕ ਨਾਬਾਲਗ ਨੇ ਕੁਲਹਾੜੀ ਨਾਲ ਵਾਰ ਕਰ ਕੇ ਮੰਜੀ ’ਤੇ ਸੌਂ ਰਹੇ ਆਪਣੇ ਮਾਤਾ-ਪਿਤਾ ਦੀ ਹੱਤਿਆ ਕਰ ਦਿੱਤੀ। ਉਸ ਨੇ ਛੋਟੇ ਭਰਾ ਦੇ ਸਿਰ ’ਤੇ ਵੀ ਕੁਲਹਾੜੀ ਨਾਲ ਵਾਰ ਕੀਤਾ, ਜਿਸ ਨੂੰ ਗੰਭੀਰ ਹਾਲਤ ਵਿਚ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ। ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਉਹ ਘਰ ਤੋਂ ਫਰਾਰ ਹੋ ਗਿਆ। ਉਸ ਨੇ ਪਿੰਡ ਤੋਂ ਕੁਝ ਦੂਰ ਜਾ ਕੇ ਲੋਕਾਂ ਨੂੰ ਮਾਤਾ-ਪਿਤਾ ਦੀ ਹੱਤਿਆ ਦੇ ਬਾਰੇ ਵਿਚ ਜਾਣਕਾਰੀ ਦਿੱਤੀ। ਸੂਚਨਾ ਮਿਲਣ ’ਤੇ ਪੁਲਿਸ ਮੌਕੇ ’ਤੇ ਪੁੱਜੀ। ਗੰਭੀਰ ਰੂਪ ਨਾਲ ਜ਼ਖ਼ਮੀ ਦੋਸ਼ੀ ਦੇ ਛੋਟੇ ਭਰਾ ਨੂੰ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ। ਪੁਲਿਸ ਨੇ ਦੋਸ਼ੀ ਨੂੰ ਹਿਰਾਸਤ ਵਿਚ ਲੈ ਕੇ ਕੁਲਹਾੜੀ ਬਰਾਮਦ ਕੀਤੀ ਹੈ।
ਨੋਹਰ ਪੁਲਿਸ ਥਾਣਾ ਅਧਿਕਾਰੀ ਰਵਿੰਦਰ ਸਿੰਘ ਨੇ ਦੱਸਿਆ ਕਿ ਫੇਫਾਨਾ ਪਿੰਡ ਵਿਚ 42 ਸਾਲਾ ਸ਼ੀਸ਼ਪਾਲ ਆਪਣੀ ਪਤਨੀ ਇੰਦਰਾ (38) ਦੋ ਮੁੰਡਿਆਂ ਅਜੇ (15) ਤੇ ਵਿਜੇ (14) ਨਾਲ ਰਹਿੰਦੇ ਸਨ। ਜੋੜਾ ਖੇਤੀ ਕਰਦਾ ਸੀ। ਉਨ੍ਹਾਂ ਦੇ ਵੱਡੇ ਬੇਟੇ ਅਜੇ ਨੂੰ ਨਸ਼ੇ ਦੀ ਆਦਤ ਪੈ ਗਈ ਸੀ। ਇਸ ਕਾਰਨ ਪਰਿਵਾਰ ਨੇ ਉਸ ਨੂੰ ਨਸ਼ਾ ਮੁਕਤੀ ਕੇਂਦਰ ਵਿਚ ਭੇਜਿਆ ਸੀ। ਉੱਥੇ ਕੁਝ ਦਿਨ ਰਹਿਣ ਤੋਂ ਬਾਅਦ ਉਹ ਵਾਪਸ ਘਰ ਆ ਗਿਆ। ਘਰ ਆਉਣ ਤੋਂ ਬਾਅਦ ਅਜੇ ਫਿਰ ਨਸ਼ਾ ਕਰਨ ਲੱਗਾ ਤਾਂ ਪਿਤਾ ਨੇ ਉਸ ਨੂੰ ਫਿਰ ਨਸ਼ਾ ਮੁਕਤੀ ਕੇਂਦਰ ਵਿਚ ਭੇਜਣ ਦਾ ਫ਼ੈਸਲਾ ਕੀਤਾ। ਇਸ ਤੋਂ ਨਾਰਾਜ਼ ਹੋ ਕੇ ਉਸ ਨੇ ਬੁੱਧਵਾਰ ਰਾਤ ਕਰੀਬ 9 ਵਜੇ ਘਰ ਵਿਚ ਮੰਜੀ ’ਤੇ ਸੌਂ ਰਹੇ ਮਾਤਾ-ਪਿਤਾ ਦੀ ਕੁਲਹਾੜੀ ਨਾਲ ਵਾਰ ਕਰ ਕੇ ਹੱਤਿਆ ਕਰ ਦਿੱਤੀ।
ਕੁਲਹਾੜੀ ਦੇ ਵਾਰ ਨਾਲ ਤੜਫਦੇ ਮਾਤਾ-ਪਿਤਾ ਦੀ ਆਵਾਜ਼ ਸੁਣ ਕੇ ਦੋਸ਼ੀ ਦਾ ਛੋਟਾ ਭਰਾ ਮੌਕੇ ’ਤੇ ਪੁੱਜਾ ਤਾਂ ਉਸਦੇ ਸਿਰ ’ਚ ਵੀ ਵਾਰ ਕੀਤਾ। ਲਹੂ-ਲੁਹਾਣ ਹਾਲਤ ਵਿਚ ਜ਼ਮੀਨ ’ਤੇ ਡਿੱਗ ਕੇ ਛੋਟਾ ਭਰਾ ਬੇਹੋਸ਼ ਹੋ ਗਿਆ। ਉਸ ਨੂੰ ਮਿ੍ਰਤਕ ਸਮਝ ਕੇ ਦੋਸ਼ੀ ਉੱਥੋਂ ਨਿਕਲ ਗਿਆ। ਘਰ ਤੋਂ ਭੱਜ ਕੇ ਦੋਸ਼ੀ ਨੇ ਪਿੰਡ ਵਾਸੀਆਂ ਨੂੰ ਮਾਤਾ-ਪਿਤਾ ਤੇ ਭਰਾ ਦੀ ਹੱਤਿਆ ਕਰਨ ਦੀ ਗੱਲ ਕਹੀ। ਪਿੰਡ ਵਾਸੀਆਂ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ। ਪੁਲਿਸ ਨੇ ਮੌਕੇ ’ਤੇ ਪੁੱਜ ਕੇ ਮਿ੍ਰਤ ਜੋੜੇ ਨੂੰ ਹਸਪਤਾਲ ਦੀ ਮੋਰਚੀ ਵਿਚ ਪਹੁੰਚਾਇਆ। ਉੱਥੇ ਜ਼ਖ਼ਮੀ ਵਿਜੇ ਨੂੰ ਹਸਪਤਾਲ ਵਿਚ ਭਰਤੀ ਕਰਵਾਇਆ, ਜਿਥੇ ਉਸਦਾ ਇਲਾਜ ਚੱਲ ਰਿਹਾ ਹੈ।
