ਭਿਆਨਕ ਸੜਕ ਹਾਦਸੇ ’ਚ ਇਕੋ ਘਰ ਦੇ ਤਿੰਨ ਜੀਆਂ ਸਮੇਤ ਚਾਰ ਦੀ ਮੌਤ

ਡੇਰਾਬੱਸੀ : ਅੰਬਾਲਾ-ਚੰਡੀਗੜ੍ਹ ਮੁੱਖ ਮਾਰਗ ’ਤੇ ਬੁੱਧਵਾਰ ਦੇਰ ਰਾਤ ਭਿਆਨਕ ਸੜਕ ਹਾਦਸੇ ’ਚ ਇੱਕੋ ਪਰਿਵਾਰ ਦੇ ਤਿੰਨ ਜੀਆਂ ਸਮੇਤ ਚਾਰ ਵਿਅਕਤੀਆਂ ਦੀ ਮੌਤ ਹੋ ਗਈ ਜਦਕਿ ਇਕ ਕੁੜੀ ਹਰਲੀਨ ਕੌਰ ਦੀ ਲੱਤ ਟੁੱਟ ਗਈ। ਮ੍ਰਿਤਕਾਂ ਦੀ ਪਛਾਣ ਅਜੈਬ ਸਿੰਘ, ਹਰਜੀਤ ਕੌਰ ਧਾਮੀ ਤੇ ਸ਼ਰਨਜੀਤ ਕੌਰ ਧਾਮੀ ਵਜੋਂ ਹੋਈ ਹੈ ਜਿਹੜੇ ਕਿ ਇੱਕੋ ਪਰਿਵਾਰ ਨਾਲ ਸਬੰਧਤ ਸਨ ਤੇ ਆਰਟਿਗਾ ਕਾਰ ’ਚ ਸਵਾਰ ਹੋ ਕੇ ਹਰਿਆਣਾ ਤੋਂ ਵਾਪਸ ਮੋਹਾਲੀ ਪਰਤ ਰਹੇ ਸਨ, ਜਦ ਕਿ ਚੌਥੇ ਮ੍ਰਿਤਕ ਦੀ ਪਛਾਣ ਗੌਰਵ ਵਜੋਂ ਹੋਈ ਹੈ ਜਿਹੜਾ ਵਧਵਾ ਰਾਮ ਕਾਲੋਨੀ ਪਾਣੀਪਤ ਦਾ ਰਹਿਣ ਵਾਲਾ ਸੀ। ਘਟਨਾ ਦੇਰ ਰਾਤ ਇਕ ਵਜੇ ਦੀ ਦੱਸੀ ਜਾ ਰਹੀ ਹੈ ਜਿਸ ਨਾਲ ਮੋਹਾਲੀ ਦੇ ਸੈਕਟਰ 80 ਵਿਖੇ ਰਹਿੰਦੇ ਪਰਿਵਾਰ ’ਚ ਮਾਤਮ ਛਾ ਗਿਆ।

ਜਾਣਕਾਰੀ ਅਨੁਸਾਰ ਹਾਦਸਾ ਤੇਜ਼ ਰਫ਼ਤਾਰ ਸਵਿਫਟ ਕਾਰ ਦਾ ਸੰਤੁਲਨ ਵਿਗੜਨ ਕਾਰਨ ਵਾਪਰਿਆ ਹੈ ਜੋ ਕਿ ਦੂਜੀ ਸਾਈਡ ਤੋਂ ਆ ਰਹੀ ਅਰਟਿੱਗਾ ਕਾਰ ਨਾਲ ਟਕਰਾਅ ਗਈ ਜਿਸ ਕਾਰਨ ਸਵਾਰ ਔਰਤਾਂ ਤੇ 4 ਮਹੀਨੇ ਦੀ ਬੱਚੀ ਗੰਭੀਰ ਜ਼ਖ਼ਮੀ ਹੋ ਗਈ। ਜਦੋਂ ਇਨ੍ਹਾਂ ਨੂੰ ਨੇੜਲੇ ਹਸਪਤਾਲ ਲਿਜਾਇਆ ਗਿਆ ਤਾਂ ਡਾਕਟਰਾਂ ਨੇ ਇਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਘਟਨਾ ਤੋਂ ਬਾਅਦ ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਆਰਟਿਗਾ ਦੀ ਛੱਤ ’ਤੇ ਵੱਜੀ ਸਵਿਫਟ

ਏਐੱਸਆਈ ਗੁਲਸ਼ਨ ਕੁਮਾਰ ਨੇ ਦੱਸਿਆ ਕਿ ਆਰਟਿਗਾ ਸਵਾਰ ਦਵਿੰਦਰ ਸਿੰਘ ਧਾਮੀ (57) ਵਾਸੀ ਮਕਾਨ ਨੰਬਰ 404 ਸੈਕਟਰ 80 ਮੋਹਾਲੀ ਨੇ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਹੈ। ਉਸ ਨੇ ਦੱਸਿਆ ਹੈ ਕਿ ਉਹ ਤੇ ਉਸ ਦੀ ਪਤਨੀ ਹਰਜੀਤ ਕੌਰ ਧਾਮੀ (56), ਨੂੰਹ ਸ਼ਰਨਜੀਤ ਕੌਰ ਧਾਮੀ (33), ਪੋਤੀ ਹਰਲੀਨ ਕੌਰ ਧਾਮੀ ਤੇ ਪੋਤਰਾ ਅਜੈਬ ਸਿੰਘ ਉਮਰ ਕਰੀਬ ਚਾਰ ਮਹੀਨੇ, ਮੰਗਲਵਾਰ ਟੈਕਸੀ ਕਿਰਾਏ ’ਤੇ ਲੈ ਕੇ ਫਰੀਦਾਬਾਦ ਹਰਿਆਣਾ ’ਚ ਪ੍ਰੋਗਰਾਮ ਅਟੈਂਡ ਕਰਨ ਲਈ ਗਏ ਸਨ। ਬੁੱਧਵਾਰ ਨੂੰ ਪ੍ਰੋਗਰਾਮ ਅਟੈਂਡ ਕਰਕੇ ਉਹ ਵਾਪਸ ਮੋਹਾਲੀ ਆਪਣੇ ਘਰ ਆ ਰਹੇ ਸਨ। ਰਾਤ ਡੇਢ ਵਜੇ ਦੇ ਕਰੀਬ ਉਹ ਡੇਰਾਬੱਸੀ ਨੇੜੇ ਪਿੰਡ ਜਨੇਤਪੁਰ ਨੇੜੇ ਪੁੱਜੇ ਤਾਂ ਦੂਜੇ ਪਾਸਿਓਂ ਤੇਜ਼ ਰਫਤਾਰ ਨਾਲ ਆ ਰਹੀ ਚਿੱਟੇ ਰੰਗ ਦੀ ਸਵਿਫਟ ਕਾਰ ਪਲਟ ਕੇ ਉਨ੍ਹਾਂ ਦੀ ਆਰਟਿਗਾ ਗੱਡੀ ਦੀ ਛੱਤ ਉੱਪਰ ਜ਼ੋਰਦਾਰ ਤਰੀਕੇ ਨਾਲ ਵੱਜੀ। ਹਾਦਸਾ ਐਨਾ ਭਿਆਨਕ ਸੀ ਕਿ ਦੋਨੋਂ ਗੱਡੀਆਂ ਦੇ ਪਰਖੱਚੇ ਉੱਡ ਗਏ ਜਿਸ ’ਚ ਬਿਆਨਕਰਤਾ ਦੇ ਪਰਿਵਾਰ ਦੇ ਤਿੰਨ ਜੀਆਂ ਦੀ ਮੌਤ ਹੋ ਗਈ।

ਡਰਾਈਵਰ ਪੀਜੀਆਈ ਦਾਖ਼ਲ

ਦਵਿੰਦਰ ਨੇ ਦੱਸਿਆ ਕਿ ਕਾਰ ਡਰਾਈਵਰ ਅਮਿਤ ਕੁਮਾਰ ਪੀਜੀਆਈਐੱਮਆਰ ਚੰਡੀਗੜ੍ਹ ਵਿਖੇ ਜ਼ੇਰੇ ਇਲਾਜ ਹੈ ਅਤੇ ਉਸ ਨੇ ਆਪਣੇ ਪਰਿਵਾਰ ਨੂੰ ਇਲਾਜ ਲਈ ਇੰਡਸ ਹਸਪਤਾਲ ’ਚ ਦਾਖਲ ਕਰਵਾਇਆ ਜਿਥੇ ਡਾਕਟਰਾਂ ਵੱਲੋਂ ਚੈੱਕ ਕਰਨ ਤੋਂ ਬਾਅਦ ਉਸ ਦੀ ਪਤਨੀ, ਨੂੰਹ ਤੇ ਚਾਰ ਮਹੀਨੇ ਦੇ ਬੱਚੇ ਨੂੰ ਮ੍ਰਿਤਕ ਕਰਾਰ ਦੇ ਦਿੱਤਾ। ਹਾਦਸੇ ਦੀ ਮਨਹੂਸ ਖਬਰ ਮਿਲਦਿਆਂ ਮਿ੍ਰਤਕਾਂ ਦੇ ਪਰਿਵਾਰਾਂ ਵਿੱਚ ਮਾਤਮ ਛਾ ਗਿਆ। ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਸਵਿਫਟ ਕਾਰ ’ਚ ਖੱਬੇ ਪਾਸੇ ਬੈਠੇ ਗੌਰਵ ਵਾਸੀ ਵਧਵਾ ਰਾਮ ਕਾਲੋਨੀ ਵਾਸੀ ਪਾਣੀਪਤ ਦੀ ਵੀ ਮੌਤ ਹੋ ਗਈ ਹੈ। ਪੁਲਿਸ ਨੇ ਸਵਿਫਟ ਕਾਰ ਦੇ ਡਰਾਈਵਰ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।