ਰੂਪਨਗਰ : ਸ਼ਹਿਰ ‘ਚ ਇਕ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇੱਥੋਂ ਦੇ ਸ਼ਿਵਾਲਿਕ ਪਬਲਿਕ ਸੀਨੀਅਰ ਸੈਕੰਡਰੀ ਸਕੂਲ ‘ਚ 9ਵੀਂ ਜਮਾਤ ਦੇ ਵਿਦਿਆਰਥੀ ਸੁਖਪ੍ਰੀਤ ਸਿੰਘ (15) ਨੇ ਸਰਹਿੰਦ ਨਹਿਰ ‘ਚ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ। ਉਹ ਆਪਣੇ ਪਿਤਾ ਨਾਲ ਸਵੇਰੇ ਸਕੂਲ ਲਈ ਰਵਾਨਾ ਹੋਇਆ ਸੀ। ਸੁਖਪ੍ਰੀਤ ਖੁਦ ਸਕੂਟੀ ਚਲਾ ਰਿਹਾ ਸੀ ਤੇ ਸਕੂਲ ਬੈਗ ਅੱਗੇ ਰੱਖਿਆ ਹੋਇਆ ਸੀ। ਉਸ ਨੇ ਸਰਹਿੰਦ ਨਹਿਰ ਨੇੜੇ ਸਕੂਟੀ ਰੋਕੀ ਤੇ ਬਿਨਾਂ ਕੁਝ ਕਹੇ ਨਵੇਂ ਪੁਲ ’ਤੇ ਛਾਲ ਮਾਰ ਦਿੱਤੀ। ਇਹ ਸਭ ਪਿਤਾ ਦੀਆਂ ਅੱਖਾਂ ਦੇ ਸਾਹਮਣੇ ਹੋਇਆ। ਨੌਜਵਾਨ ਪੁੱਤਰ ਨੇ ਨਹਿਰ ‘ਚ ਛਾਲ ਮਾਰ ਦਿੱਤੀ ਤਾਂ ਉਸ ਨੂੰ ਗਹਿਰਾ ਸਦਮਾ ਲੱਗਾ। ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਫਿਲਹਾਲ ਉਸ ਦੀ ਲਾਸ਼ ਨਹਿਰ ‘ਚੋਂ ਨਹੀਂ ਮਿਲੀ ਹੈ।
ਸੁਖਪ੍ਰੀਤ ਨੇ ਆਤਮਹੱਤਿਆ ਕਿਉਂ ਕੀਤੀ, ਇਸ ਬਾਰੇ ਹੋਰ ਜਾਣਕਾਰੀ ਹਾਸਲ ਕੀਤੀ ਜਾ ਰਹੀ ਹੈ। ਹਾਲਾਂਕਿ ਉਹ ਪਿਛਲੇ ਡੇਢ ਮਹੀਨੇ ਤੋਂ ਸਕੂਲ ਨਹੀਂ ਜਾ ਰਿਹਾ ਸੀ ਅਤੇ ਕਿਸੇ ਗੱਲ ਨੂੰ ਲੈ ਕੇ ਮਾਨਸਿਕ ਤੌਰ ‘ਤੇ ਪ੍ਰੇਸ਼ਾਨ ਰਹਿੰਦਾ ਸੀ। ਸਕੂਲ ਪ੍ਰਬੰਧਕਾਂ ਅਨੁਸਾਰ ਸੁਖਪ੍ਰੀਤ ਡੇਢ ਮਹੀਨੇ ਤੋਂ ਸਕੂਲ ਨਹੀਂ ਆ ਰਿਹਾ ਸੀ ਅਤੇ ਇਸ ਦਾ ਕਾਰਨ ਪਰਿਵਾਰ ਵੱਲੋਂ ਸਕੂਲ ‘ਚ ਸੁਖਪ੍ਰੀਤ ਦਾ ਬਿਮਾਰ ਹੋਣਾ ਦੱਸਿਆ ਗਿਆ ਹੈ। ਹਰਮਨਜੀਤ ਸਿੰਘ (45) ਗੁਰੂਨਗਰ ਦਾ ਰਹਿਣ ਵਾਲਾ ਹੈ ਅਤੇ ਸਵੇਰੇ 8.15 ਵਜੇ ਬੇਟੇ ਨਾਲ ਡਾਕਟਰ ਅੰਬੇਡਕਰ ਚੌਕ ਤੋਂ ਸਕੂਲ ਲਈ ਰਵਾਨਾ ਹੋਇਆ। ਹਰਮਨਜੀਤ ਸਰਕਾਰੀ ਅਧਿਆਪਕ ਹੈ ਤੇ ਉਸ ਦੇ ਦੋ ਪੁੱਤਰ ਹਨ। ਸੁਖਪ੍ਰੀਤ ਛੋਟਾ ਮੁੰਡਾ ਹੈ।
