ਫਤਹਿਗੜ੍ਹ ਸਾਹਿਬ : ਵਿਜੀਲੈਂਸ ਬਿਊਰੋ ਫਤਹਿਗੜ੍ਹ ਸਾਹਿਬ ਨੇ ਰਿਸ਼ਵਤ ਮੰਗਣ ਦੇ ਦੋਸ਼ ਵਿੱਚ ਇੱਕ ਪੰਜਾਬ ਪੁਲਿਸ ਦੇ ਏ.ਐਸ.ਆਈ ਗੁਰਭੇਜ ਸਿੰਘ ਅਤੇ ਇੱਕ ਹੌਲਦਾਰ ਗਿਆਨ ਸਿੰਘ ਖਿਲਾਫ ਮਾਮਲਾ ਕੇਸ ਦਰਜ ਕੀਤਾ ਹੈ।
ਵਿਜੀਲੈਂਸ ਬਿਓਰੋ ਫਤਹਿਗੜ੍ਹ ਸਾਹਿਬ ਦੇ ਇੰਸਪੈਕਟਰ ਪ੍ਰਿਤਪਾਲ ਸਿੰਘ ਸੰਧੂ ਨੇ ਦੱਸਿਆ ਕਿ ਸਤਪਾਲ ਸਿੰਘ ਵਾਸੀ ਰਾਮ ਨਗਰ ਅਮਲੋਹ ਨੇ ਸਰਕਾਰੀ ਟੋਲ ਫਰੀ ਨੰਬਰ ‘ਤੇ ਸ਼ਿਕਾਇਤ ਕੀਤੀ ਸੀ ਕਿ ਉਸ ਖਿਲਾਫ 27 ਦਸੰਬਰ,2021 ਨੂੰ ਮੰਡੀ ਗੋਬਿੰਦਗੜ੍ਹ ਵਿਖੇ ਇਕ ਕੇਸ ਵਿਚ ਵੱਖ-ਵੱਖ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਸੀ। ਜਿਸ ਦੀ ਜਾਂਚ ਏਐਸਆਈ ਗੁਰਭੇਜ ਸਿੰਘ ਵੱਲੋਂ ਕੀਤੀ ਜਾ ਰਹੀ ਸੀ। ਇਸ ਕੇਸ ਵਿੱਚ ਉਸ ਦੀ ਪਤਨੀ ਕਮਲਜੀਤ ਕੌਰ ਅਤੇ ਪੁੱਤਰ ਸੁਖਚੈਨ ਨੂੰ ਵੀ ਨਾਮਜ਼ਦ ਕੀਤਾ ਗਿਆ ਸੀ। ਸਤਪਾਲ ਸਿੰਘ ਨੇ ਆਪਣੀ ਪਤਨੀ ਅਤੇ ਬੇਟੇ ਦੇ ਝੂਠੇ ਨਾਮ ਕੇਸ ਪਾਉਣ ਨੂੰ ਲੈ ਕੇ ਆਪਣੇ ਵਾਰਡ ਦੇ ਇਕ ਨਿਵਾਸੀ ਅਜੀਤ ਸਿੰਘ ਨਾਲ ਗੱਲ ਕੀਤੀ, ਜਿਸ ਤੋ ਬਾਅਕ ਅਜੀਤ ਸਿੰਘ ਨੇ ਗੁਰਭੇਜ ਸਿੰਘ ਨੂੰ ਮੰਡੀ ਗੋਬਿੰਦਗੜ੍ਹ ਸਥਿਤ ਆਪਣੇ ਘਰ ਬੁਲਾਇਆ ਤਾਂ ਹੌਲਦਾਰ ਗਿਆਨ ਸਿੰਘ ਨੇ ਪਤਨੀ ਅਤੇ ਲੜਕੇ ਦਾ ਨਾਂ ਕੇਸ ਵਿਚੋ ਕੱਢਣ ਲਈ 50,000 ਰੁਪਏ ਦੀ ਮੰਗ ਕੀਤੀ | ਹੌਲਦਾਰ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਇਨ੍ਹਾਂ ਪੈਸਿਆ ਵਿੱਚੋ 20 ਹਜਾਰ ਰੁਪਏ ਐਸਐਚਓ ਨੂੰ, 10 ਹਜ਼ਾਰ ਰੁਪਏ ਏਐਸਆਈ ਗੁਰਭੇਜ ਸਿੰਘ ਨੂੰ ਦਿੱਤੇ ਜਾਣੇ ਹਨ ਅਤੇ 4-5 ਹਜ਼ਾਰ ਰੁਪਏ ਕਾਗਜ਼ਾਂ ’ਤੇ ਖਰਚ ਕੀਤੇ ਜਾਣ। ਸਤਪਾਲ ਸਿੰਘ ਨੇ ਮੌਕੇ ‘ਤੇ 5 ਹਜ਼ਾਰ ਦੇ ਕੇ ਉਸ ਦੀ ਵੀਡੀਓ ਰਿਕਾਰਡਿੰਗ ਕਰ ਲਈ ਅਤੇ ਸਰਕਾਰ ਦੇ ਨੰਬਰ ਤੇ ਭੇਜ ਦਿੱਤੀ। ਜਾਂਚ ਤੋ ਬਾਅਦ ਉਕਤ ਵਿਅਕਤੀਆਂ ਖਿਲਾਫ ਮਾਮਲਾ ਦਰਜ ਕਰ ਲਿਆ ਗਿਆ ਹੈ।
