ਰਿਸ਼ੀਕੇਸ਼ : ਥਾਣਾ ਮੁਨੀਕੇਰੇਤੀ ਖੇਤਰ ਅਧੀਨ ਪੈਂਦੇ ਤਪੋਵਨ ਪੁਲਿਸ ਚੌਕੀ ਵਿੱਚ ਨੀਮ ਬੀਚ ਨੇੜੇ ਅੱਜ ਤਿੰਨ ਨੌਜਵਾਨਾਂ ਦੀ ਗੰਗਾ ਵਿੱਚ ਡੁੱਬਣ ਨਾਲ ਮੌਤ ਹੋ ਗਈ। ਨੀਮ ਬੀਚ ‘ਤੇ ਅੱਠ ਦੋਸਤ ਇੱਕ ਦੋਸਤ ਦਾ ਜਨਮਦਿਨ ਮਨਾ ਰਹੇ ਸਨ। ਜਿਸ ਨੌਜਵਾਨ ਦਾ ਅੱਜ ਜਨਮ ਦਿਨ ਸੀ, ਉਹ ਵੀ ਗੰਗਾ ਵਿੱਚ ਡੁੱਬ ਗਿਆ ਹੈ।
ਐਸਡੀਆਰਐਫ ਅਤੇ ਆਫ਼ਤ ਪ੍ਰਬੰਧਨ ਟੀਮ ਕਰ ਰਹੀ ਭਾਲ
ਐਸਡੀਆਰਐਫ ਦੀ ਟੀਮ ਅਤੇ ਆਫ਼ਤ ਪ੍ਰਬੰਧਨ ਟੀਮ ਗੰਗਾ ਵਿੱਚ ਡੁੱਬੇ ਨੌਜਵਾਨਾਂ ਦੀ ਭਾਲ ਕਰ ਰਹੀ ਹੈ। ਐਸਡੀਆਰਐਫ ਦੇ ਇੰਸਪੈਕਟਰ ਕਵਿੰਦਰ ਸਿੰਘ ਸਾਜਵਾਨ ਨੇ ਦੱਸਿਆ ਕਿ ਸ਼ਨੀਵਾਰ ਦੁਪਹਿਰ ਕਰੀਬ ਤਿੰਨ ਵਜੇ ਮੁਨੀਕੇਰੇਤੀ ਥਾਣੇ ਤੋਂ ਸੂਚਨਾ ਮਿਲੀ ਸੀ ਕਿ ਨੀਮ ਬੀਚ ਨੇੜੇ ਤਿੰਨ ਨੌਜਵਾਨ ਗੰਗਾ ਵਿੱਚ ਡੁੱਬ ਗਏ ਹਨ।
ਅੱਠ ਨੌਜਵਾਨ ਇੱਥੇ ਦੋਸਤ ਦਾ ਜਨਮ ਦਿਨ ਮਨਾਉਣ ਆਏ ਸਨ
ਘਟਨਾ ਦੀ ਜਾਣਕਾਰੀ ਦਿੰਦੇ ਹੋਏ ਤਪੋਵਨ ਪੁਲਿਸ ਚੌਕੀ ਦੇ ਇੰਚਾਰਜ ਸਤੇਂਦਰ ਕੁਮਾਰ ਨੇ ਦੱਸਿਆ ਕਿ ਰਿਸ਼ੀਕੇਸ਼ ਤੋਂ 8 ਦੋਸਤ ਇੱਥੇ ਆਪਣਾ ਜਨਮ-ਦਿਨ ਮਨਾਉਣ ਆਏ ਸਨ। ਨੀਮ ਬੀਚ ‘ਤੇ ਉਹ ਗੰਗਾ ਵਿਚ ਇਸ਼ਨਾਨ ਕਰਨ ਲਈ ਉਤਰੇ ਸਨ। ਗੰਗਾ ਦੇ ਪਾਣੀ ਦਾ ਪੱਧਰ ਕਾਫੀ ਵੱਧ ਗਿਆ ਸੀ। ਇਸ ਦੌਰਾਨ ਤਿੰਨ ਨੌਜਵਾਨ ਗੰਗਾ ਦੇ ਤੇਜ਼ ਵਹਾਅ ਦੀ ਲਪੇਟ ‘ਚ ਆ ਗਏ। ਜਿਨ੍ਹਾਂ ਦਾ ਪਤਾ ਨਹੀਂ ਲੱਗ ਸਕਿਆ। ਮੌਕੇ ‘ਤੇ ਪੁਲਿਸ ਐਸਡੀਆਰਐਫ ਦੀ ਟੀਮ ਅਤੇ ਡਿਜ਼ਾਸਟਰ ਮੈਨੇਜਮੈਂਟ ਟੀਮ ਬਚਾਅ ‘ਚ ਲੱਗੀ ਹੋਈ ਹੈ।
ਗੰਗਾ ‘ਚ ਡੁੱਬਣ ਵਾਲੇ ਤਿੰਨ ਨੌਜਵਾਨਾਂ ਦੀ ਪਛਾਣ
ਮੁਨੀਕੇਰੇਤੀ ਦੇ ਐਸਐਚਓ ਇੰਸਪੈਕਟਰ ਰਿਤੇਸ਼ ਸ਼ਾਹ ਨੇ ਦੱਸਿਆ ਕਿ ਗੰਗਾ ਵਿੱਚ ਡੁੱਬਣ ਵਾਲੇ ਤਿੰਨ ਨੌਜਵਾਨਾਂ ਦੀ ਪਛਾਣ ਕਰ ਲਈ ਗਈ ਹੈ। ਇਨ੍ਹਾਂ ਵਿੱਚ ਆਰੀਅਨ ਬੰਗਵਾਲ (16 ਸਾਲ) ਪੁੱਤਰ ਵਰਿੰਦਰ ਸਿੰਘ, ਵਤਸਲ ਬਿਸ਼ਟ (17 ਸਾਲ) ਅਤੇ ਪ੍ਰਤੇਕ (16 ਸਾਲ) ਪੁੱਤਰ ਰਾਕੇਸ਼ ਚੰਦਰ ਸਾਰੇ ਵਾਸੀ ਗਲੀ ਨੰਬਰ 28 ਗੁਮਾਨੀਵਾਲਾ, ਸ਼ਿਆਮਪੁਰ, ਰਿਸ਼ੀਕੇਸ਼ ਸ਼ਾਮਲ ਹਨ। ਉਨ੍ਹਾਂ ਦੱਸਿਆ ਕਿ ਅੱਜ ਵਤਸਲ ਬਿਸ਼ਟ ਦਾ ਜਨਮ ਦਿਨ ਸੀ, ਜਿਸ ‘ਤੇ ਇਹ ਸਾਰੇ ਦੋਸਤ ਇੱਥੇ ਪੁੱਜੇ ਸਨ।
ਗੰਗਾ ਦੇ ਇਹ ਘਾਟ ਹਨ ਬਹੁਤ ਖ਼ਤਰਨਾਕ
ਟਿਹਰੀ ਗੜ੍ਹਵਾਲ ਜ਼ਿਲ੍ਹੇ ਦੇ ਮੁਨੀਕੇਰੇਤੀ ਥਾਣੇ ਵਿਚ ਤਪੋਵਨ, ਸੱਚਾ ਧਾਮ ਆਸ਼ਰਮ, ਨੀਮ ਬੀਚ ਅਤੇ ਸਾਈਂ ਘਾਟ ਆਦਿ ਇਲਾਕੇ ਹਨ, ਜਿੱਥੇ ਨਹਾਉਣਾ ਬਹੁਤ ਖ਼ਤਰਨਾਕ ਹੈ। ਸਭ ਤੋਂ ਵੱਧ ਡੁੱਬਣ ਦੀਆਂ ਘਟਨਾਵਾਂ ਇਨ੍ਹਾਂ ਇਲਾਕਿਆਂ ਵਿੱਚ ਹੀ ਵਾਪਰ ਰਹੀਆਂ ਹਨ।
