ਜਗਰਾਓਂ : ਜਗਰਾਓਂ ਪੁੁਲਿਸ ਨੇ ਚੋਰੀ ਦੇ ਸ਼ੱਕ ਵਿਚ ਚਾਰ ਬੱਚਿਆਂ ਦੀ ਮਾਂ ‘ਤੇ ਤਸ਼ੱਦਦ ਕਰਦਿਆਂ ਉਸ ਨੂੰ ਬੇਹੋਸ਼ ਕਰ ਦਿੱਤਾ। ਉਪਰੰਤ ਪੁਲਿਸ ਔਰਤ ਨੂੰ ਹਸਪਤਾਲ ਲੈ ਕੇ ਪੁੱਜੀ। ਕਈ ਘੰਟੇ ਇਲਾਜ ਤੋਂ ਬਾਅਦ ਹੋਸ਼ ਵਿਚ ਆਈ ਰਮਨ ਵਾਸੀ ਜਗਰਾਓਂ ਨੇ ਦੱਸਿਆ ਕਿ ਉਹ ਪਿੰਡ ਮਲਕ ਦੀ ਢਾਅ ਬਸਤੀ ਦੇ ਇਕ ਘਰ ਵਿਚ ਸਫ਼ਾਈ ਦਾ ਕੰਮ ਕਰਦੀ ਸੀ। ਤਿੰਨ ਮਹੀਨੇ ਪਹਿਲਾਂ ਉਹ ਉੱਥੋਂ ਹਟ ਗਈ। ਜਿਸ ਘਰ ਵਿਚ ਉਹ ਕੰਮ ਕਰਦੀ ਸੀ, ਉਸ ਘਰ ਦੇ ਮਾਲਕਾਂ ਨੇ ਜਗਰਾਓਂ ਥਾਣਾ ਸਦਰ ਵਿਖੇ ਉਸ ਖ਼ਿਲਾਫ਼ ਪੁੁਲਿਸ ਨੂੰ ਸ਼ਿਕਾਇਤ ਦਿੱਤੀ ਕਿ ਉਸ ਨੇ ਕਾਂਟੇ ਚੋਰੀ ਕੀਤੇ ਹਨ।
ਇਸ ਮਾਮਲੇ ਵਿਚ ਪੁਲਿਸ ਦੇ ਸੁਨੇਹੇ ‘ਤੇ ਉਹ ਆਪਣੇ ਸਹੁੁਰੇ ਅਤੇ ਪਰਿਵਾਰਕ ਮੈਂਬਰਾਂ ਨਾਲ ਥਾਣੇ ਪੁੱਛਗਿੱਛ ਵਿਚ ਸ਼ਾਮਲ ਹੋਣ ਲਈ ਪਹੁੰਚੀ। ਉਸ ਨੇ ਦੋਸ਼ ਲਾਇਆ ਕਿ ਪੁਲਿਸ ਨੇ ਉਸ ਦੇ ਪਰਿਵਾਰ ਨੂੰ ਬਾਹਰ ਖੜ੍ਹਾ ਕਰ ਦਿੱਤਾ ਅਤੇ ਉਸ ਨੂੰ ਇਕ ਕਮਰੇ ਵਿਚ ਲਿਜਾ ਕੇ ਕੁੱਟਮਾਰ ਕਰਨੀ ਸ਼ੁੁਰੂ ਕਰ ਦਿੱਤੀ। ਦੋ ਮਹਿਲਾ ਪੁਲਿਸ ਮੁਲਾਜ਼ਮਾਂ ਨੇ ਉਸ ਦੇ ਮੂੰਹ ‘ਤੇ ਥੱਪੜ ਮਾਰੇ। ਉਸ ਨੇ ਦੋਸ਼ ਲਾਇਆ ਕਿ ਇਕ ਪੁਲਿਸ ਮੁਲਾਜ਼ਮ ਨੇ ਕਰੰਟ ਵਾਲਾ ਡੰਡਾ ਉਸ ਦੀ ਗਰਦਨ ‘ਤੇ ਲਗਾਉਂਦਿਆਂ ਉਸ ‘ਤੇ ਤਸ਼ੱਦਦ ਕੀਤਾ ਤਾਂ ਉਹ ਬੇਹੋਸ਼ ਹੋ ਕੇ ਡਿੱਗ ਪਈ।
ਉਸ ਤੋਂ ਬਾਅਦ ਉਸ ਦੀ ਜਗਰਾਓਂ ਦੇ ਕੇਅਰਵੈੱਲ ਹਸਪਤਾਲ ਵਿਖੇ ਆ ਕੇ ਅੱਖ ਖੁੱਲ੍ਹੀ। ਇਸ ਮੌਕੇ ਪੀੜਤਾ ਦੇ ਪਰਿਵਾਰ ਵਾਲਿਆਂ ਨੇ ਕਿਹਾ ਕਿ ਉਹ ਬਾਹਰ ਖੜ੍ਹੇ ਰਮਨ ਦੀਆਂ ਚੀਕਾਂ ਸੁਣਦੇ ਰਹੇ। ਪੁਲਿਸ ਤੋਂ ਡਰਦੇ ਉਸ ਨੂੰ ਛੁਡਵਾ ਨਾ ਸਕੇ। ਪੁਲਿਸ ਮੁਲਾਜ਼ਮ ਰਮਨ ‘ਤੇ ਅੰਨ੍ਹਾ ਤਸ਼ੱਦਦ ਕਰਦਿਆਂ ਉਸ ਨੂੰ ਕਾਂਟੇ ਚੋਰੀ ਕਰਨ ਦਾ ਜੁਰਮ ਕਬੂਲਣ ਲਈ ਕਹਿ ਰਹੇ ਸਨ ਪਰ ਰਮਨ ਰੋਂਦੀ, ਚੀਕਾਂ ਮਾਰਦੀ ਇਹੀ ਕਹਿ ਰਹੀ ਸੀ ਕਿ ਉਸ ਨੇ ਚੋਰੀ ਨਹੀਂ ਕੀਤੀ।
ਕੇਅਰਵੈੱਲ ਹਸਪਤਾਲ ਦੇ ਡਾ. ਅਵਤਾਰ ਸਿੰਘ ਨੇ ਦੱਸਿਆ ਕਿ ਰਮਨ ਦੇ ਸਰੀਰ ‘ਤੇ ਚਾਹੇ ਬਾਹਰੀ ਕੋਈ ਸੱਟ ਨਹੀਂ ਹੈ ਪਰ ਉਸ ਦਾ ਮੈਡੀਕਲ ਚੈੱਕਅੱਪ ਦੌਰਾਨ ਉਸ ਦੀ ਹਾਲਤ ਅਜੇ ਸਥਿਰ ਹੈ। ਇਸ ਸਬੰਧੀ ਜਦੋਂ ਜਗਰਾਓਂ ਦੇ ਡੀਐੱਸਪੀ ਸਤਿੰਦਰ ਸਿੰਘ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਨੇ ਦੋਸ਼ਾਂ ਨੂੰ ਨਕਾਰਦਿਆਂ ਕਿਹਾ ਕਿ ਉਹ ਫਿਰ ਵੀ ਇਸ ਮਾਮਲੇ ਦੀ ਜਾਂਚ ਕਰਨਗੇ।
