ਸ੍ਰੀ ਮੁਕਤਸਰ ਸਾਹਿਬ : ਮੁਕਤਸਰ ਥਾਣਾ ਸਿਟੀ ਪੁਲਿਸ ਨੇ ਥਾਣੇ ’ਚ ਆਏ ਇਕ ਸਿਪਾਹੀ ’ਤੇ ਨਸ਼ਾ ਕੀਤੇ ਹੋਣ ਦੇ ਸ਼ੱਕ ’ਚ ਜਦ ਡੋਪ ਟੈਸਟ ਕਰਵਾਇਆ ਤਾਂ ਰਿਪੋਰਟ ਪਾਜ਼ੇਟਿਵ ਪਾਈ ਗਈ। ਇਸ ਤੋਂ ਬਾਅਦ ਸਿਪਾਹੀ ਦੇ ਖ਼ਿਲਾਫ਼ ਮਾਮਲਾ ਦਰਜ ਕਰ ਉਸਨੂੰ ਗ੍ਰਿਫ਼ਤਾਰ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਜਾਣਕਾਰੀ ਅਨੁਸਾਰ ਥਾਣਾ ਸਿਟੀ ਸ੍ਰੀ ਮੁਕਤਸਰ ਸਾਹਿਬ ਪੁਲਿਸ ਨੇ ਉਕਤ ਮਾਮਲਾ ਥਾਣਾ ਇੰਚਾਰਜ ਨਵਪ੍ਰੀਤ ਸਿੰਘ ਦੇ ਬਿਆਨਾਂ ’ਤੇ ਦਰਜ ਕੀਤਾ ਹੈ। ਪੁਲਿਸ ਵੱਲੋਂ ਦਰਜ ਮਾਮਲੇ ਅਨੁਸਾਰ ਪਿੰਡ ਕੱਟਿਆਂਵਾਲੀ ਨਿਵਾਸੀ ਸਿਪਾਹੀ ਨਰਪਿੰਦਰਜੀਤ ਸਿੰਘ ਕਿਸੇ ਕੰਮ ਦੇ ਸਬੰਧ ’ਚ ਥਾਣਾ ਸਿਟੀ ਮੁਕਤਸਰ ਆਇਆ ਸੀ। ਦੱਸਿਆ ਗਿਆ ਹੈ ਕਿ ਉਕਤ ਸਿਪਾਹੀ ਦਾ ਕੋਈ ਨਸ਼ਾ ਕੀਤਾ ਹੋਇਆ ਸੀ, ਜਿਸਦਾ ਸ਼ੱਕ ਹੋਣ ’ਤੇ ਥਾਣਾ ਇੰਚਾਰਜ ਐੱਸਆਈ ਨਵਪ੍ਰੀਤ ਸਿੰਘ ਨੇ ਨਰਪਿੰਦਰਜੀਤ ਸਿੰਘ ਦਾ ਡੋਪ ਟੈਸਟ ਕਰਵਾਉਣ ਦੇ ਲਈ ਏਐੱਸਆਈ ਬਲਵਿੰਦਰ ਸਿੰਘ, ਹੌਲਦਾਰ ਮਨਦੀਪ ਸਿੰਘ ਤੇ ਸਿਪਾਹੀ ਖੁਸ਼ਦੀਪ ਸਿੰਘ ਦੇ ਹਵਾਲੇ ਕਰ ਸਿਵਲ ਹਸਪਤਾਲ ਭੇਜਿਆ। ਸਿਵਲ ਹਸਪਤਾਲ ’ਚ ਡਾਕਟਰ ਨੇ ਉਸਦਾ ਡੋਪ ਟੈਸਟ ਕਰਨ ਦੇ ਬਾਅਦ ਜੋ ਰਿਪੋਰਟ ਸੌਂਪੀ ਉਸ ਵਿੱਚ ਸਿਪਾਹੀ ਨਰਪਿੰਦਰਜੀਤ ਸਿੰਘ ਦਾ ਡੋਪ ਟੈਸਟ ਪਾਜ਼ੇਟਿਵ ਪਾਇਆ ਗਿਆ। ਥਾਣਾ ਇੰਚਾਰਜ ਨਵਪ੍ਰੀਤ ਸਿੰਘ ਦੇ ਅਨੁਸਾਰ ਸਿਪਾਹੀ ਨਰਪਿੰਦਰਜੀਤ ਸਿੰਘ ਦੀ ਡੋਪ ਟੈਸਟ ਰਿਪੋਰਟ ਪਾਜ਼ੇਟਿਵ ਆਉਣ ਦੇ ਚਲਦਿਆਂ ਉਸਦੇ ਖਿਲਾਫ਼ 27\61\85 ਐੱਨਡੀਪੀਐੱਸ ਐਕਟ ਤਹਿਤ ਮਾਮਲਾ ਦਰਜ਼ ਕਰ ਲਿਆ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਉਸਦੀ ਗ੍ਰਿਫ਼ਤਾਰੀ ਹੋ ਚੁੱਕੀ ਹੈ।
