ਦਿੱਲੀ ਨਾਲੋਂ ਵੀ ਵੱਧ ਜ਼ਹਿਰੀਲੀ ਹੋਈ ਪੰਜਾਬ ਦੀ ਹਵਾ, ਸੂਬੇ ’ਚ ਹਵਾ ਪ੍ਰਦੂਸ਼ਣ ਸਿਖਰਲੇ ਪੱਧਰ ’ਤੇ ਪੁੱਜਿਆ

ਪਟਿਆਲਾ: ਪੰਜਾਬ ਦੀ ਹਵਾ ਦਿੱਲੀ ਨਾਲੋਂ ਵੀ ਵੱਧ ਜ਼ਹਿਰੀਲੀ ਹੋ ਗਈ ਹੈ। ਬੁੱਧਵਾਰ ਆਥਣ ਤੱਕ ਦਿੱਲੀ ’ਚ ਏਅਰ ਕੁਆਲਟੀ ਇੰਡੈਕਸ ( ਹਵਾ ਦੀ ਗੁਣਵਤਾ ਦਾ ਪੱਧਰ) 277 ਜਦੋਂਕਿ ਪੰਜਾਬ ’ਚ 400 ਦਾ ਅੰਕਡ਼ਾ ਵੀ ਟੱਪ ਗਿਆ। ਇਸ ਦੇ ਨਾਲ ਹੀ ਬੁੱਧਵਾਰ ਨੂੰ ਪਰਾਲੀ ਸਾਡ਼ਨ ਦੇ 1778 ਮਾਮਲੇ ਦਰਜ ਹੋਏ ਹਨ ਜੋ ਕਿ ਮੰਗਲਵਾਰ ਨੂੰ ਸਿਰਫ਼ 604 ਸਨ। ਦੋ ਦਿਨ ਤੋਂ ਅਸਮਾਨ ਵਿਚ ਛਾਈ ‘ਸਮੋਗ’ ਕਰਕੇ ਸੂਰਜ ਦੀ ਚਮਕ ਵੀ ਫਿੱਕੀ ਰਹੀ ਤੇ ਦਿਸਣ ਹੱਦ ਘਟ ਹੋਣ ਕਰਕੇ ਰਾਹਗਿਰਾਂ ਨੂੰ ਦਿਨ ਸਮੇਂ ਹੀ ਵਾਹਨਾਂ ਦੀ ਬੱਤੀਆਂ ਜਗਾਉਣੀਆਂ ਪਈਆਂ। ਹਵਾ ਪ੍ਰਦੂਸ਼ਣ ਕਰਕੇ ਅੱਖਾਂ ਵਿਚ ਜਲਣ ਤੇ ਸਾਹ ਲੈਣ ਵਿਚ ਦਿੱਕਤ ਦਾ ਸਾਹਮਣਾ ਵੀ ਕਰਨਾ ਪਿਆ ਹੈ।

ਏਅਰ ਕੁਆਲਟੀ ਇੰਡੈਕਸ ਅਨੁਸਾਰ ਬੱੁਧਵਾਰ ਸਵੇਰ ਤੋਂ ਹੀ ਹਵਾ ਪ੍ਰਦੂਸ਼ਣ ਵਧਣਾ ਸ਼ੁਰੂ ਹੋ ਗਿਆ। ਸਵੇਰ ਤੋਂ ਸ਼ਾਮ ਤੱਕ ਖੰਨਾ ਵਿਚ ਹਵਾ ਪ੍ਰਦੂਸ਼ਣ ਸਭ ਤੋਂ ਵੱਧ 417 ਅਤੇ ਬਠਿੰਡਾ ਵਿਚ ਸਭ ਤੋਂ ਘੱਟ 165 ਤੱਕ ਦਰਜ ਕੀਤਾ ਗਿਆ। ਦੂਸਰੇ ਨੰਬਰ ’ਤੇ 417 ਏਕਿਊਆਈ ਨਾਲ ਲੁਧਿਆਣਾ ਦੂਸਰੇ ਨੰਬਰ ’ਤੇ ਰਿਹਾ। ਖੰਨਾ ਵਿਚ ਸਵੇਰ ਏਅਰ ਕੁਆਲਟੀ ਇੰਡੈਕਸ ਸਵੇਰ ਸਮੇਂ ਹੀ 400 ਦਾ ਅੰਕਡ਼ਾ ਟੱਪ ਗਿਆ ਜਦੋਂਕਿ ਲੁਧਿਆਣਾ ਵਿਚ 397, ਪਟਿਆਲਾ ’ਚ 327 ਤੇ ਜਲੰਧਰ ਵਿਚ 407 ਦਰਜ ਕੀਤਾ ਗਿਆ। ਸ਼ਾਮ ਚਾਰ ਵਜੇ ਤੱਕ ਅੰਮ੍ਰਿਤਸਰ ਦਾ ਏਕਿਊ ਆਈ 320, ਬਠਿੰਡਾ 165, ਜਲੰਧਰ 333, ਖੰਨਾ 417, ਲੁਧਿਆਣਾ 408, ਮੰਡੀ ਗੋਬਿੰਦਗਡ਼੍ਹ 219, ਪਟਿਆਲਾ 368 ਤੇ ਰੂਪ ਨਗਰ ਵਿਚ 281 ਦਰਜ ਕੀਤਾ ਗਿਆ ਹੈ।

ਵੱਖ-ਵੱਖ ਸ਼ਹਿਰਾਂ ’ਚ ਏਅਰ ਕੁਆਲਟੀ ਇੰਡੈਕਸ

ਸ਼ਹਿਰ ਸਮਾਂ ਸਵੇਰੇ 11 ਵਜੇ ਦੁਪਹਿਰ 02.00 ਵਜੇ 04.00 ਵਜੇ

ਅਮ੍ਰਿੰਤਸਰ 268 300 320

ਬਠਿੰਡਾ 145 161 165

ਜਲੰਧਰ 316 331 333

ਖੰਨਾ 407 415 417

ਲੁਧਿਆਣਾ 393 407 408

ਗੋਬਿੰਦਗਡ਼੍ਹ 169 197 219

ਪਟਿਆਲਾ 327 354 368

ਰੂਪਨਗਰ 264 283 281

ਪਰਾਲੀ ਸਾਡ਼ਨ ਦੇ ਮਾਮਲੇ ਘਟੇ, ਪ੍ਰਦੂਸ਼ਣ ਦੇ ਕਈ ਕਾਰਨ : ਡਾ. ਵਿਗ

ਪੰਜਾਬ ਪ੍ਰਦੂਸ਼ਣ ਰੋਕਥਾਮ ਬੋਰਡ ਚੇਅਰਮੈਨ ਡਾ. ਆਦਰਸ਼ਪਾਲ ਵਿਗ ਦੱਸਦੇ ਹਨ ਕਿ ਹਵਾ ਵਿਚ ਪ੍ਰਦੂਸ਼ਣ ਦੇ ਕਈ ਕਾਰਨ ਹਨ, ਇਸ ਲਈ ਕਿਸੇ ਇਕ ਬੰਦੇ ਨੂੰ ਜ਼ਿੰਮੇਵਾਰ ਨਹੀਂ ਮੰਨਿਆ ਜਾ ਸਕਦਾ ਹੈ। ਮੌਸਮ ਵਿਚ ਤਬਦੀਲੀ, ਬੱਦਲਵਾਲੀ ਜਾਂ ਫਿਰ ਹਵਾ ਵਿਚ ਭਾਰੀ ਤੱਤਾਂ ਦੀ ਮਾਤਰਾ ਵਧਣ ਕਰਕੇ ਵੀ ਪ੍ਰਦੂਸ਼ਣ ਆਪਣਾ ਅਸਰ ਦਿਖਾਉਂਦਾ ਹੈ। ਕੁਝ ਦਿਨਾਂ ਤੋਂ ਮੌਸਮ ਖ਼ਰਾਬ ਹੋਣ ਬਾਰੇ ਚੇਅਰਮੈਨ ਨੇ ਕਿਹਾ ਕਿ ਤੇਜ਼ ਹਵਾ ਜਾਂ ਫਿਰ ਮੀਂਹ ਨਾਲ ਫ਼ਰਕ ਪੈ ਸਕਦਾ ਹੈ। ਚੇਅਰਮੈਨ ਵਿਗ ਨੇ ਕਿਹਾ ਕਿ ਹੁਣ ਪਰਾਲੀ ਸਾਡ਼ਨ ਦੇ ਮਾਮਲੇ ਪਹਿਲਾਂ ਨਾਲੋਂ ਘਟੇ ਹਨ।