ਮਜੀਠਾ: ਕਸਬਾ ਮਜੀਠਾ ਵਿਖੇ ਦੋ ਧਿਰਾਂ ਵਿੱਚ ਹੋਈ ਲੜਾਈ ਵਿੱਚ ਦੋਹਾਂ ਧਿਰਾਂ ਵੱਲੋ ਜੰਮ ਕੇ ਇੱਟਾਂ ਰੋੜੇ, ਡਾਗਾਂ ਸੋਟੇ ਅਤੇ ਗੋਲ਼ੀਆਂ ਚਲਾਉਣ ਦਾ ਸਮਾਚਾਰ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਅੱਜ ਬਾਅਦ ਦੁਪਹਿਰ ਖਾਸਾ ਪੱਤੀ ਮਜੀਠਾ ਵਿਖੇ ਦੋ ਧਿਰਾਂ ਜਿਨ੍ਹਾਂ ਵਿੱਚ ਇੱਕ ਪਾਸੇ ਰਵੀ ,ਗੱਬਰ ਵਾਸੀ ਖ਼ਾਸਾ ਪੱਤੀ ਮਜੀਠਾ ਅਤੇ ਇਨ੍ਹਾਂ ਨਾਲ ਕੁਝ ਅਣਪਛਾਤੇ ਵਿਅਕਤੀ ਅਤੇ ਦੂਸਰੇ ਪਾਸੇ ਸੁਖਚੈਨ ਸਿੰਘ ਵਾਸੀ ਖ਼ਾਸਾ ਪੱਤੀ ਮਜੀਠਾ ਇਸ ਦੇ ਨਾਲ ਜੋਬਨ, ਗਗਨ ਵਾਸੀ ਦਾਦੂਪੁਰਾ, ਸਾਜਨ, ਰਾਜੂ ਗਾਲੋਵਾਲੀ ਇਨ੍ਹਾਂ ਨਾਲ ਕੁਝ ਅਣਪਛਾਤੇ ਵਿਅਕਤੀ ਜਿਨ੍ਹਾਂ ਦੋਹਾਂ ਧਿਰਾਂ ਕੋਲ ਪਿਸਤੌਲ, ਦੁਨਾਲੀ ਬੰਦੂਕ, ਡਾਂਗਾਂ, ਸੋਟੇ ਆਦਿ ਸਨ, ਵਿਚਕਾਰ ਕਿਸੇ ਗੱਲ ਤੋਂ ਝਗੜਾ ਹੋ ਗਿਆ ਅਤੇ ਦੋਹਾਂ ਧਿਰਾਂ ਨੇ ਮੁਹੱਲੇ ਵਿੱਚ ਜੰਮ ਕੇ ਪੱਥਰਬਾਜ਼ੀ ਕੀਤੀ। ਇੱਕ ਦੂਸਰੇ ਨੂੰ ਡਾਂਗਾਂ ਸੋਟਿਆਂ ਨਾਲ ਮਾਰਿਆ ਕੁੱਟਿਆ ਅਤੇ ਅਨੇਕਾਂ ਫਾਇਰ ਵੀ ਕੀਤੇ। ਜਿਸ ਨਾਲ ਇਲਾਕੇ ਵਿੱਚ ਭਾਰੀ ਦਹਿਸ਼ਤ ਵਾਲਾ ਮਾਹੌਲ ਬਣ ਗਿਆ। ਲੋਕਾਂ ਨੇ ਆਪਣੇ ਘਰਾਂ ਅੰਦਰ ਵੜ ਕੇ ਆਪਣੀਆਂ ਜਾਨਾਂ ਬਚਾਈਆਂ।
ਜਾਣਕਾਰੀ ਅਨੁਸਾਰ ਦੋਹਾਂ ਧੜਿਆਂ ਵਿੱਚ ਕੁਝ ਦਿਨ ਪਹਿਲਾਂ ਵੀ ਮਾਮੂਲੀ ਝਗੜਾ ਹੋ ਚੁੱਕਾ ਹੈ। ਥਾਣਾ ਮਜੀਠਾ ਵਿਖੇ ਇਤਲਾਹ ਮਿਲਣ ਤੇ ਐਸਐੱਚਓ ਮਨਮੀਤਪਾਲ ਸਿੰਘ ਦੀ ਅਗਵਾਈ ਵਾਲੀ ਪੁਲਿਸ ਪਾਰਟੀ ਨੇ ਮੌਕੇ ‘ਤੇ ਪੁੱਜ ਕੇ ਸਥਿਤੀ ਨੁੰ ਕਾਬੂ ਕੀਤਾ ਅਤੇ ਇੱਕਦਮ ਹਰਕਤ ਵਿੱਚ ਆਕੇ ਨਾਕਾਬੰਦੀ ਕਰਕੇ ਦੋਹਾਂ ਧਿਰਾਂ ਦੇ 5 ਵਿਅਕਤੀਆਂ ਨੂੰ ਕਾਬੂ ਕਰਕੇ ਇਨ੍ਹਾਂ ਪਾਸੋਂ ਦੋ ਪਿਸਤੌਲ 32 ਬੋਰ ਅਤੇ ਇੱਕ ਰਾਈਫਲ 32 ਬੋਰ, ਬਰਾਮਦ ਕਰ ਕੇ ਬਣਦੀਆਂ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕਰਕੇ ਅਗਲੀ ਕਾਰਵਾਈ ਅਮਲ ਵਿੱਚ ਹੈ।
