ਲੁਧਿਆਣਾ : ਕੈਸ਼ ਕੁਲੈਕਟ ਵਾਲੀ ਕੰਪਨੀ ਦੀ ਕੈਸ਼ ਵੈਨ ਦਾ ਕਸਟੋਡੀਅਨ ਬੜੇ ਹੀ ਸ਼ਾਤਰ ਢੰਗ ਨਾਲ ਵੈਨ ਵਿਚੋਂ 2 ਕਰੋੜ 19 ਲੱਖ ਰੁਪਏ ਲੈ ਕੇ ਰਫੂਚੱਕਰ ਹੋ ਗਿਆ। ਇਸ ਮਾਮਲੇ ਵਿਚ ਥਾਣਾ ਡਵੀਜ਼ਨ ਨੰਬਰ 6 ਦੀ ਪੁਲਿਸ ਨੇ ਕੰਪਨੀ ਤੇ ਵੌਲਟ ਮੈਨੇਜਰ ਪਿੰਡ ਬੱਲੋਵਾਲ ਦੇ ਵਾਸੀ ਕੋਮਲ ਕ੍ਰਿਸ਼ਨ ਦੀ ਸ਼ਿਕਾਇਤ ਲੈ ਕੇ ਵੈਨ ਕਸਟੋਡੀਅਨ ਪਿੰਡ ਬੱਲੋਵਾਲ ਦੇ ਵਾਸੀ ਹਰਮਿੰਦਰ ਸਿੰਘ ਦੇ ਖਿਲਾਫ ਮੁੱਕਦਮਾ ਦਰਜ ਕਰ ਲਿਆ ਹੈ। ਜਾਣਕਾਰੀ ਦਿੰਦਿਆਂ ਕੋਮਲ ਕ੍ਰਿਸ਼ਨ ਨੇ ਦੱਸਿਆ ਕਿ ਉਹ ਰੇਡੀਅਟ ਕੈਸ਼ ਮੈਨੇਜਮੈਂਟ ਸਰਵਿਸ ਵਿੱਚ ਬਤੌਰ ਵੌਲਟ ਮੈਨੇਜਰ ਨੌਕਰੀ ਕਰਦਾ ਹੈ। ਬੀਤੇ ਦਿਨੀ ਵੈਨ ਕਸਟੋਡੀਅਨ ਹਰਮਿੰਦਰ ਸਿੰਘ ਨੂੰ ਗੰਨਮੈਨ ਸੋਹਣ ਸਿੰਘ ਦੇ ਨਾਲ ਬੈਂਕਾਂ ਚੋਂ ਰਕਮ ਇਕੱਠੀ ਕਰਨ ਲਈ ਭੇਜਿਆ। ਕਸਟੋਡੀਅਨ ਅਤੇ ਗੰਨਮੈਨ ਨੇ ਪੱਖੋਵਾਲ ਰੋਡ ਦੇ ਏਯੂ ਸਮਾਲ ਫਾਇਨਾਂਸ ਬੈਕ ਚੋ 1 ਕਰੋੜ ਰੁਪਏ ਕੁਲੈਕਟ ਕੀਤੇ, ਜਿਸ ਤੋਂ ਬਾਅਦ ਹਰਮਿੰਦਰ ਸਿੰਘ ਅਤੇ ਗੰਨਮੈਨ ਏਯੂ ਸਮਾਲ ਫਾਇਨਾਂਸ ਬੈਕ ਮਾਲ ਰੋਡ ਤੇ ਗਏ ਜਿੱਥੋਂ ਉਨਾ ਨੇ 1 ਕਰੋੜ 46 ਲੱਖ ਰੁਪਏ ਦੀ ਰਕਮ ਹਾਸਲ ਕੀਤੀ। ਕੁਲੈਕਸ਼ਨ ਕਰਨ ਤੋਂ ਬਾਅਦ ਦੋਵੇਂ ਕੈਨਰਾ ਬੈਂਕ ਗਿੱਲ ਰੋਡ ਤੇ ਪਹੁੰਚੇ। ਇਸ ਵਾਰ ਹਰਮਿੰਦਰ ਸਿੰਘ ਨੇ ਬਹਾਨੇ ਨਾਲ਼ ਗੰਨਮੈਨ ਸੋਹਣ ਸਿੰਘ ਨੂੰ ਗੱਡੀ ਤੋਂ ਹੇਠਾਂ ਉਤਾਰ ਦਿੱਤਾ। ਸ਼ਾਮ ਵੇਲੇ ਕੈਸ਼ ਵਾਲਾ ਟਰੰਕ ਏਯੂ ਸਮਾਲ ਫਾਇਨਾਂਸ ਬੈਂਕ ਪੱਖੋਵਾਲ ਰੋਡ ਤੇ ਪਹੁੰਚਿਆਂ।ਸੀਵੀਸੀ ਰਮਨਜੋਤ ਅਤੇ ਅਜੀਤ ਸਿੰਘ ਨੇ ਜਦ ਟਰੰਕ ਖੋਲਿਆ ਤਾਂ ਟਰੰਕ ਵਿੱਚ ਸਿਰਫ਼ 26 ਲੱਖ 80 ਹਜ਼ਾਰ ਰੁਪਏ। 2 ਕਰੋੜ 19 ਲੱਖ 20 ਹਜ਼ਾਰ ਰੁਪਏ ਮੁਲਜ਼ਮ ਹਰਮਿੰਦਰ ਸਿੰਘ ਖੁਰਦ ਬੁਰਦ ਕਰ ਗਿਆ ਸੀ। ਇਸ ਮਾਮਲੇ ਸਬੰਧੀ ਥਾਣਾ ਡਵੀਜ਼ਨ ਨੰਬਰ 6 ਦੀ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਗਈ। ਕਾਰਵਾਈ ਕਰਦਿਆਂ ਪੁਲਿਸ ਨੇ ਮੁਲਜ਼ਮ ਨੂੰ ਹਰਮਿੰਦਰ ਸਿੰਘ ਦੇ ਖਿਲਾਫ ਐਫ ਆਈ ਆਰ ਦਰਜ ਕਰ ਲਈ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਮੁਲਜ਼ਮ ਨੂੰ ਜਲਦੀ ਹੀ ਗ੍ਰਿਫਤਾਰ ਕਰ ਲਿਆ ਜਾਵੇਗਾ।
