ਫਾਜ਼ਿਲਕਾ : ਪਿਛਲੇ ਚਾਰ ਦਿਨਾਂ ਤੋਂ ਫਾਜ਼ਿਲਕਾ ’ਚ ਨਿਕਲੀ ਢਾਈ ਕਰੋੜ ਰੁਪਏ ਦੀ ਲਾਟਰੀ ਦੇ ਮਾਲਕ ਦੀ ਭਾਲ ਜਾਰੀ ਸੀ। ਇਸ ਤਹਿਤ ਲਾਟਰੀ ਦੇ ਮਾਲਕ ਨੇ ਖ਼ੁਦ ਸਬੰਧਤ ਲਾਟਰੀ ਦੇ ਸੰਚਾਲਕ ਨਾਲ ਗੱਲਬਾਤ ਕੀਤੀ। ਇਸ ਤੋਂ ਬਾਅਦ ਟਿਕਟ ਮਿਲਾਉਣ ਤੋਂ ਬਾਅਦ ਆਖ਼ਰ ਮਾਲਿਕ ਦੀ ਭਾਲ ਪੂਰੀ ਹੋ ਗਈ। ਇਹ ਇਨਾਮ ਫਾਜ਼ਿਲਕਾ ਦੇ ਪਿੰਡ ਰਾਮਕੋਟ ਦੇ ਕਿਸਾਨ ਭਾਲਾ ਰਾਮ ਨੂੰ ਮਿਲਿਆ ਹੈ। ਭਾਲਾ ਰਾਮ ਅੱਠ ਏਕੜ ਜ਼ਮੀਨ ਦਾ ਮਾਲਕ ਹੈ।
ਲਾਟਰੀ ਏਜੰਟ ਰੂਪ ਚੰਦ ਤੇ ਬੌਬੀ ਬਵੇਜਾ ਨੇ ਦੱਸਿਆ ਕਿ ਪੰਜ ਦਿਨ ਪਹਿਲਾਂ ਉਨ੍ਹਾਂ ਦੀ ਦੁਕਾਨ ਤੋਂ ਨਾਗਾਲੈਂਡ ਡਿਅਰ 500 ਮੰਥਲੀ ਲਾਟਰੀ ਦਾ ਟਿਕਟ ਨੰਬਰ 249092 ਖ਼ਰੀਦਿਆ ਗਿਆ ਸੀ। ਇਸ ਦੇ ਮਾਲਕ ਦੀ ਭਾਲ ਕੀਤੀ ਜਾ ਰਹੀ ਸੀ। ਬੁੱਧਵਾਰ ਨੂੰ ਭਾਲਾ ਰਾਮ ਵਾਸੀ ਰਾਮਕੋਟ ਦਾ ਉਨ੍ਹਾਂ ਨੂੰ ਫੋਨ ਆਇਆ ਕਿ ਉਨ੍ਹਾਂ ਕੋਲ ਲਾਟਰੀ ਦੀ ਟਿਕਟ ਹੈ। ਰੂਪ ਚੰਦ ਨੇ ਦੱਸਿਆ ਕਿ ਭਾਲਾ ਰਾਮ ਨੂੰ ਛੇਤੀ ਹੀ ਇਹ ਇਨਾਮ ਦਿਵਾਇਆ ਜਾਵੇਗਾ।
ਬੱਚਿਆਂ ਦੀ ਪੜ੍ਹਾਈ ’ਤੇ ਖ਼ਰਚ ਕਰਨਗੇ ਪੈਸਾ : ਭਾਲਾ ਰਾਮ
ਭਾਲਾ ਰਾਮ ਨੇ ਦੱਸਿਆ ਕਿ ਉਸ ਦੇ ਵੱਡੇ ਭਰਾ ਦੀ ਮੌਤ ਹੋ ਗਈ ਸੀ, ਜਿਸ ਕਾਰਨ ਉਹ ਲਾਟਰੀ ਚੈੱਕ ਨਹੀਂ ਕਰ ਸਕਿਆ ਸੀ। ਮੰਗਲਵਾਰ ਰਾਤ ਉਹ ਆਪਣੇ ਲੋਕਾਂ ’ਚ ਬੈਠੇ ਸਨ। ਇਸ ਦੌਰਾਨ ਗੱਲ ਚੱਲੀ ਕਿ ਫਾਜ਼ਿਲਕਾ ’ਚ ਰੂਪ ਚੰਦ ਲਾਟਰੀ ਵਾਲਿਆਂ ਦੀ ਦੁਕਾਨ ਤੋਂ 2.50 ਕਰੋੜ ਰੁਪਏ ਦਾ ਇਨਾਮ ਨਿਕਲਿਆ ਹੈ। ਇਸ ਤੋਂ ਬਾਅਦ ਉਸ ਨੇ ਆਪਣੀ ਲਾਟਰੀ ਦਾ ਨੰਬਰ ਚੈੱਕ ਕੀਤਾ ਤਾਂ ਉਹ ਟਿਕਟ ਉਸ ਦੀ ਹੀ ਸੀ। ਉਹ ਖੇਤੀ ਦਾ ਕੰਮ ਕਰਦਾ ਹੈ। ਉਸ ਦਾ ਇਕ ਪੁੱਤਰ ਤੇ ਇਕ ਧੀ ਹੈ। ਇਹ ਪੈਸਾ ਉਹ ਆਪਣੇ ਬੱਚਿਆਂ ਦੀ ਪੜ੍ਹਾਈ ’ਤੇ ਖ਼ਰਚ ਕਰੇਗਾ।
ਪਿਛਲੇ ਹਫ਼ਤੇ ਵੀ ਲਾਟਰੀ ’ਚ ਨਿਕਲਿਆ ਸੀ ਨੌਂ ਹਜ਼ਾਰ ਦਾ ਇਨਾਮ
ਭਾਲਾ ਰਾਮ ਨੇ ਦੱਸਿਆ ਕਿ ਸਾਲ 1990 ਤੋਂ ਲਾਟਰੀ ’ਚ ਆਪਣੀ ਕਿਸਮਤ ਅਜ਼ਮਾ ਰਿਹਾ ਹੈ। ਉਸ ਨੇ ਦੱਸਿਆ ਕਿ ਪਿਛਲੇ ਹਫ਼ਤੇ ਨੌਂ ਹਜ਼ਾਰ ਦਾ ਇਨਾਮ ਨਿਕਲਿਆ ਸੀ। ਇਸ ਤੋਂ ਪਹਿਲਾਂ ਉਸ ਨੂੰ ਦੋ ਹਜ਼ਾਰ ਤੇ 50 ਹਜ਼ਾਰ ਦੇ ਇਨਾਮ ਮਿਲ ਚੁੱਕੇ ਹਨ। ਇਸ ਲਈ ਉਸ ਨੇ ਲਾਟਰੀ ਖ਼ਰੀਦਣਾ ਛੱਡਿਆ ਨਹੀਂ।
