ਜੀਰਾ : ਅੱਜ ਸਵੇਰੇ ਚਿੱਟੇ ਦਿਨ ਕਰੀਬ ਗਿਆਰਾਂ ਵਜੇ ਮੌਜਦੀਨ ਦੇ ਨੇੜੇ ਕੁਝ ਲੁਟੇਰਿਆਂ ਵੱਲੋਂ ਇਕ ਔਰਤ ਦੇ ਗਲ ਵਿਚੋਂ ਸੋਨੇ ਦੀ ਚੇਨ ਖਿੱਚਣ ਦਾ ਵਿਰੋਧ ਕਰਨ ਲਈ ਆਏ ਇੱਕ ਦੁਕਾਨਦਾਰ ਦੇ ਸੱਟਾਂ ਮਾਰ ਕੇ ਲੁਟੇਰੇ ਫ਼ਰਾਰ ਹੋ ਗਏ। ਸਿਵਲ ਹਸਪਤਾਲ ਜੀਰਾ ਵਿਖੇ ਪੀੜਤ ਔਰਤ ਅਮਰਜੀਤ ਕੌਰ ਪਤਨੀ ਅਮਨਪ੍ਰੀਤ ਸਿੰਘ ਵਾਸੀ ਪਿੰਡ ਮੱਲੋ ਕੇ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਕੁਝ ਖਰੀਦਦਾਰੀ ਕਰਨ ਲਈ ਉਹ ਜੀਰਾ ਸ਼ਹਿਰ ਵਿੱਚ ਆਏ ਸਨ ਕਿ ਟੈਲੀਫੋਨ ਐਕਸਚੇਂਜ ਦੇ ਨੇੜੇ ਸਥਿਤ ਮੌਜਦੀਨ ਕੋਲ ਕੁਝ ਲੁਟੇਰੇ ਉਸਦੇ ਗਲ ਵਿੱਚ ਪਾਈ ਸੋਨੇ ਦੀ ਚੇਨ ਖਿੱਚਣ ਦੀ ਕੋਸ਼ਿਸ਼ ਕਰਨ ਲੱਗੇ । ਇਸੇ ਦੌਰਾਨ ਨੇੜੇ ਹੀ ਸਥਿਤ ਨਾਰੰਗ ਬੂਟ ਹਾਊਸ ਦੇ ਮਾਲਕ ਵਿੱਕੀ ਨਾਰੰਗ ਅਤੇ ਕੁਝ ਵਿਅਕਤੀਆਂ ਨੇ ਲੁਟੇਰਿਆਂ ਦਾ ਵਿਰੋਧ ਕੀਤਾ ਤਾਂ ਪਿੱਛੋ ਕੁੱਝ ਹੋਰ ਲੁਟੇਰੇ ਆ ਗਏ ਅਤੇ ਉਹ ਆਪਣੇ ਸਾਥੀਆਂ ਨੂੰ ਛੁਡਾ ਕੇ ਲੈ ਗਏ।
ਪੀੜਤ ਵਿੱਕੀ ਨਾਰੰਗ ਨੇ ਦੱਸਿਆ ਕਿ ਜਦੋਂ ਉਨ੍ਹਾ ਨੇ ਉਕਤ ਔਰਤ ਦੇ ਗਲ ਵਿੱਚੋਂ ਚੇਨੀ ਖਿੱਚ ਰਹੇ ਲੁਟੇਰਿਆਂ ਵਿੱਚੋਂ 2 ਨੂੰ ਕਾਬੂ ਕਰ ਲਿਆ ਤਾਂ ਇੰਨੇ ਸਮੇਂ ਵਿੱਚ ਪਿੱਛੋਂ ਕੁਝ ਹੋਰ ਲੁਟੇਰੇ ਗੱਡੀ ਤੇ ਆਏ ਜਿਨ੍ਹਾਂ ਨੇ ਉਸ ਉਪਰ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ ਅਤੇ ਆਪਣੇ ਸਾਥੀਆਂ ਨੂੰ ਛੁਡਾ ਕੇ ਲੈ ਗਏ। ਵਿਕੀ ਨਾਰੰਗ ਨੇ ਦੱਸਿਆ ਕਿ ਲੁਟੇਰੇ ਨੂਰਪੁਰ ਦੇ ਰਹਿਣ ਵਾਲੇ ਹਨ ਅਤੇ ਜਾਂਦੇ ਸਮੇਂ ਆਪਣਾ ਮੋਟਰ ਸਾਈਕਲ ਘਟਨਾ ਸਥਾਨ ਤੇ ਹੀ ਛੱਡ ਗਏ ਜੋ ਉਨ੍ਹਾਂ ਨੇ ਆਪਣੇ ਕਬਜ਼ੇ ਵਿੱਚ ਲੈ ਲਿਆ ਹੈ ਅਤੇ ਜਿਸ ਗੱਡੀ ਤੇ ਲੁਟੇਰੇ ਆਏ ਸਨ ਉਸ ਦਾ ਉਹਨਾਂ ਨੇ ਨੰਬਰ ਵੀ ਨੋਟ ਕਰ ਲਿਆ ਹੈ।
ਇਸ ਦੌਰਾਨ ਸਾਬਕਾ ਵਿਧਾਇਕ ਕੁਲਬੀਰ ਸਿੰਘ ਜੀਰਾ ਸਿਵਲ ਹਸਪਤਾਲ ਜੀਰਾ ਵਿਖੇ ਪਹੁੰਚੇ ਅਤੇ ਵਿੱਕੀ ਨਾਰੰਗ ਦਾ ਹਾਲ ਚਾਲ ਪੁੱਛਣ ਉਪਰੰਤ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਉਨ੍ਹਾਂ ਨੇ ਦੱਸਿਆ ਕਿ ਜੀਰਾ ਸ਼ਹਿਰ ਵਿੱਚ ਸ਼ਾਇਦ ਹੀ ਕੋਈ ਦਿਨ ਜਾਂਦਾ ਹੋਵੇ ਜਦੋਂ ਕੋਈ ਲੁੱਟ ਖੋਹ ਨਾ ਹੁੰਦੀ ਹੋਵੇ ਅਤੇ ਸ਼ਰੇਆਮ ਗੁੰਡਾਗਰਦੀ ਦਾ ਅੱਜ ਜੋ ਨੰਗਾ ਨਾਚ ਹੋਇਆ ਹੈ ਇਸ ਨੇ ਕਾਨੂੰਨ ਅਤੇ ਵਿਵਸਥਾ ਦੀ ਪੋਲ ਖੋਲ ਕੇ ਰੱਖ ਦਿੱਤੀ ਹੈ। ਉਨਾ ਨੇ ਐੱਸਐੱਸਪੀ ਫਿਰੋਜ਼ਪੁਰ ਨੂੰ ਕੀਤੀ ਸ਼ਿਕਾਇਤ ਵਿੱਚ ਇਸ ਪਾਸੇ ਉਚੇਚਾ ਧਿਆਨ ਦੇਣ ਦੀ ਮੰਗ ਕੀਤੀ ਹੈ।
